التحريات أثبتت علاقتها مع زميلها بالعمل.. والمتمهة ترد: "محصلش" حصل "اليوم السابع" على نص التحقيقات التى باشرتها نيابة حوادث شرق القاهرة، برئاسة المستشار إبراهيم أبو عقل، وبإشراف المستشار محمد عبد الشافى، المحامى العام الأول لنيابات شرق القاهرة، مع موظفة حى المطرية، وتدعى " ناهد.م.ك "، المتهمة بقتل زوجها وأبنائها الأربعة من خلال إضرام النيران فى شقة الزوجية، مما تسبب فى تفحم الجثث، وذلك بشارع شجرة مريم، بالمطرية. بدأت تحقيقات النيابة فى القضية رقم 10170 لسنة 2014 إدارى المطرية، بتاريخ 26 نوفمبر 2014، فى تمام العاشرة صباحاَ، وفتح وكيل نيابة الحوادث، محضراَ للتحقيق أثبت فيه أن المتهمة حضرت إلى غرفة التحقيق، وبمناظرتها تبين أنها سيدة فى منتصف العقد الرابع من العمر، متوسطة الطول، خمرية البشرة، ترتدى جلباب أسود اللون، لم يتبين بها ثمة إصابات ظاهرية. وتلى المحقق الإتهامات المنسوبة إليها، وهى قتل زوجها وأبنائها الأربعة من خلال إضرام النيران فى شقة الزوجية، وأبلغها أنها الآن تقف أمام النيابة العامة وهى الجهة التى تتولى التحقيق معها، فأنكر الاتهامات الموجهة إليها. وإلى نص التحقيقات: س: ما قولك فيما هو منسوب إليك من أنك متهمة بقتل المجنى عليه سامى حمادة صادق، ورباب سامى حمادة، ويارا سامى حمادة، ومحمد سامى حمادة، ومحمود سامى حمادة عمداَ؟ ج : محصلش. س : ما قولك فيما هو منسوب إليك من أنك متهمة بإشعال النيران بمسكن معد للمعيشة عمداَ مما ترتب عليه وفاة المجنى عليهم سالف الذكر؟ ج : محصلش. س : ما قولك فيما هو منسوب إليك من أنك متهمة بإتلاف منقولات الشقة محل الحادث؟ ج : محصلش. س : ما الذى حدث إذاَ وما هى ظروف ضبطك وعرضك علينا؟ ج: اللى حصل أن أنا حصل مشاكل بينى وبين جوزى قبل الواقعة بيوم، وطلعت قعدت عند أخويا فى الدور اللى فوقى، وفوجئت بجوزى بيتصل بيا حوالى الساعة 7 ونص، وقالى تعالى انزلى قعدى معايا إنتى وأخوك نتكلم، ونزلت أنا وجوز أختى وقعدنا معاه، وبعد كده نزل أخويا، وقعدنا أدام جوزى، وبدأ يقول لى قوللى الحقيقة، إنتى ماشية مع صاحبك فى الشغل، قولت له إيه الكلام العبيط اللى بتقوله ده، وراح قال لى أنا عندى استعداد أطلقك بس قولى الحقيقة، وقولت له مش عاوزه أطلق أنا عايزه أعيش معاكم، قال لى لأ إنتى تعرفى واحد اسمه "أحمد. ع" معاكى فى الشغل، قولت له دا زميل لى فى الشغل ومافيش بينى وبينه أى حاجة، وقولت له أنا عندى استعداد أجيبه لك وتقعد معاه وتعرف إنى صديقته بس، وماردش عليا واخواتى ماكنش ليهم أى رد فعل ولا اتكلموا معاه. وتابعت المتهمة: وروحت قولت له أنا مقدرش أعيش معاك غير لما تروح تتنازل عن محضر الزنا، فقالى اعترفى بالحقيقة أحسن لك، قولت له والله مافيش حاجة بينى وبينه، إحنا مجرد زملاء فى العمل فقط، روحت سبناه أنا وإخواتى وطلعنا فوق عند شقة أخويا فى الدور اللى فوقه، وبعد كده لقيته اتصل بيا ويقول لى إنتى هتنزلى تبيتى عندى فى بيتك، قولت له مقدرش أنزل أعيش معاك، إلا لما تتنازل عن محضر الزنا بكرة، وبعد المكالمة دى بحاجة بسيطة سمعت صوت تليفون بيرن ببص لقيته هو بيرن عليا تانى، ورديت عليه وقال لى خلاص أنا هتنازل عن المحضر وإنزلى علشان تبيتى معايا. وأضافت المتهمة: وبعدها لقيت التليفون بيرن وبامسك التليفون لقيت فى حاجة زى القنبلة والبيت بيترج، وببص من الشباك لقيت الشباك بتاع الشقه مطلع نار كتيرة، وفضلت أصوت وأقول ولادى وجوزى الحقونى، ونزلت أخدت مفتاح الشقة علشان افتح الشقة أشوف فى أيه، ولما نزلت على السلم حاولت أفتح باب الشقة بتاعى لقيت شباب المنطقة منعونى أفتح الشقة، وأخدوا هما منى المفتاح، فتحوا علشان يلحقوا أى حاجة جوه، والكلام ده كان حوالى الساعة 9 ونص بالليل. وقالت: بعد كده نزلت وقفت فى الشارع ولقيت الناس جابوا لى جثتين متفحمين، ويقولوا لى عيالك دول، وأول ما شفتهم أغمى عليا، والناس أخدتنى والمباحث جت وأخدونى على الشارع اللى جنب البيت، يسألوا فىّ وبعد كده نسيت أقول إن الدنيا لما كانت بتولع اتصلت كتير بعبد الرازق أخو جوزى، ولما رد عليا بعد كده مرة قال لى عايزة أيه وأنا منهاره، قولت له تعالى الشقه مولعه وأخوك فوق والعيال معاه، قال لى إنتى عايزة تحبسينى ما تتصليش بيا تانى، وبعد كده المباحث أخدتنى. س : متى وأين حدث ذلك؟ ج : ده حصل يوم 25/11/2014 حوالى الساعة 9 ونص بالليل فى الشقة بتاعتى بشارع شجرة مريم بالمطرية. س : ما سبب تواجدك بالزمان والمكان سالف الذكر؟ ج : أنا كنت قاعده فى شقة أخويا فى الدور اللى فوق شقتى. س : ومن كان برفقتك آنذاك؟ ج : كان معايا أخويا ومراته وعياله وجوز أختى وأختى. س : وما طبيعة العلاقة فيما بين سالف الذكر والمجنى عليه سامى حماده صادق؟ ج : العلاقة ما كنتش كويسه ومتوترة بينه وبين جوزى علشان اللى قاله جوزى إنى على علاقة مع واحد تانى. س : ما طبيعة العلاقة فيما بينك وبين المجنى عليه؟ ج : العلاقة كانت مش كويسة فى الفترة الأخيرة بسبب إنه شك فىّ واتهمنى بالزنا. المتهمة: جوزى مضطرب وحاول ينتحر من حوالى 10 أيام س : هل كان يعانى زوجك المجنى عليه من أى إضطرابات نفسية فى الفترة الأخيرة؟ ج : جوزى فعلا كان مضطرب فى الفترة الأخيرة وحاول ينتحر من حوالى عشرة أيام لإنه بلع شريط برشام ترامادول، وأخدته وطلعت على المستشفى ولحقته والحمد لله، ونسيت أقول أن فى نفس يوم الواقعة الصبح اتصل بيا وأنا فى الشغل قاعدة مع زملائى، وقال لى أنا هموت لك العيال وهموت نفسى علشان ترتاحى، ولو لقيت حد صاحى من العيال خلى بالك منه، روحت اتصلت بيارا بنتى، قولت لها خدى إخواتك وإطلعى على خالك علشان بابا هيموتك إنت واخواتك، فقالت لى إنتى بتخوفينى ليه ده بابا بيحبنا، وفضلت أتابعهم بالتليفون. س : ما التصرف الذى بدر منك عقب ذلك؟ ج : أنا اتصلت بأخويا مصطفى قولت له خلى بالك من العيال أحسن سامى عايز يموتهم ويموت نفسه، قال لى متخفيش هو بيهددك، مفيش حد بيموت عياله. س: ما طبيعة العلاقة فيما بينك وأشقائك وأزواجهم وشقيق المجنى عليه؟ ج : إحنا كنا كويسين مع بعض لإن إحنا اللى جوزنا عبد الرازق أخوه. س: هل كان يوجد بشقتك أنت وزوجك المجنى عليه ثمة أسطوانات غاز أو مواد قابلة للاشتعال أو الانفجار أو ثمة أجهزة تكييفات؟ ج : لا ما فيش حاجة عندى من الحاجات دى. س : هل حدث ثمة انفصال فيما بينكم فى الفترة السابقة؟ ج : لا خالص وأول مشكلة تحصل بينى وبينه هى اللى راح اتهمنى فيها بالزنا. س : أين يتواجد أشقاؤك فى الوقت الحالى؟ ج : أنا أخويا مصطفى موجود معايا بره، وأخويا حسام معرفش هو فين. س : ما قولك فيما قدمه المدعو عبد الرازق حماده صادق، من أجندة مدون بها مكاتبات وأشعار ورسائل قال أنها لشخص يدعى "أحمد ع"؟ ج : الإجندة بتاعتى فعلا، وأنا اللى بكتب الحاجات دى لنفسى، وأنا عمرى ما هقتل ولادى وجوزى. س : ما قولك فيما قرره سالف الذكر بأنك قتلت شقيقه وأولاده الأربعة؟ ج : زى ما قولت قبل كده أنا ما قتلتش أولادى ولا جوزى ولا ولعت فى الشقة. س : ما هى مدى علاقتك بالمدعو أحمد عطا؟ ج : ده مجرد زميل لىّ فى الشغل. س : هل سبق لك الإتصال بسالف الذكر؟ ج : أيوه أنا كنت بتصل به بس مجرد زميل. س : هل سبق لزوجك المجنى عليه معرفته بذلك الاتصال بهذا الشخص؟ ج : أيوه. س : ما رد فعله؟ ج : علشان كده هو جالى الشغل وعمل مشكلة لاعتقاده أن زميلى ده على علاقة عاطفية بيا بس ده محصلش هو مجرد زميلى. س : أنت متهمة بالتسبب فى وفاة المجنى عليه؟ ج : محصلش. س : ما قولك فيما سطره الرائد أحمد يحيى معاون مباحث قسم شرطة المطرية، بأن التحريات السرية توصلت إلى وجود علاقة بينك وبين المدعو "أحمد ع"؟ ج : التحريات دى مش مضبوطة. س : هل لك سوابق؟ ج : لا. س : هل لديك أقوال أخرى؟ ج : لا موضوعات متعلقة .. 25 مارس.. نظر تجديد حبس موظفة بحى المطرية متهمة بقتل زوجها وأبنائها
