بدأنا تانى فى الخطابات، التأمين وعدم التأمين من الداخلية لأندية الأهلى والزمالك وإنبى على ماتشات إفريقيا، عاملة زى الفيلم العربى القديم «من حكمدار العاصمة إلى أحمد إبراهيم، لا تشرب الدواء فيه سم قاتل»، أعتقد أنه فى الأيام القادمة سنشهد ونسمع الكثير من داخلية مصر مع الأندية.. سيناريو مكرر ومحفوظ وطبعا حكومتنا سايبة الناس تخبّط فى بعضها وماعندهاش أى مشكلة.. عادى، إيه يعنى يخرج الزمالك أو الأهلى أو إنبى؟ على الأقل مصر ترتاح، قصدى الحكومة ترتاح من وجع القلب والدماغ بتاع الكورة، الله يلعنها فى كل كتاب، بتموِّت ناس وبتهين الشرطة وبنخلّى الحكومة تتحرك، ودى لوحدها كارثة، إزاى المجلس بتاعنا يتحرك، هوّ مبسوط ومرتاح كده، الناس عملت كل ما تستطيع لإيجاد حل لعدم تجميد النشاط بس برضه النشاط وقف من ورا الحكومة بتاعتنا.. ممكن يكون المجلس العسكرى هو بتاع تجميد النشاط بتاع الكورة بس مش عارف ليه الطايرة والباسكت شغال واليد كمان هيشتغل يعنى مافيش إلا الكورة، ممكن يكون بتوع الكورة دمهم تقيل على الناس بتوع السياسة علشان كده بيعلِّموهم الأدب.. مؤخرا وبعد ماتشات الذهاب للأهلى والزمالك بدأت التصريحات والخطابات من الوزارة للأندية.. كلام مكرر ومتعودين عليه وأيضا كلام ماسخ مالوش معنى من داخلية مصر لعدم القدرة على التأمين. أعتقد أنه بعد أن أُلغى النشاط الكروى فى مصر بفعل فاعل وبقرار من حد من فوق لا بد أن ناخد قرار أيضا بإلغاء البطولة الإفريقية من مصر وعدم إشراك أى نادٍ مصرى علشان الداخلية بتاعتنا تعبانة وهلكانة ومالهاش فى تأمين المباريات، طيب أنا عاوز أعرف هما فين حاليا؟ الله يكون فى عونهم تعبانين والله.. أنا باتكلم عن الوزير مش عن الظباط الغلابة لأنهم عبد المأمور فى التنفيذ، يعنى لو القرار تم، تلاقيهم أول ناس والوزير بيتفرج فى البيت فى التكييف على الأنتريه، يعنى أنا مش عاوز أحمّل الظباط ولا صف الظباط ولا العساكر أى مسؤولية لأنها تقع على الوزير والقيادات أصحاب القرار الجهنمى بتاع «من غير تأمين».. والله حاجة تحزّن على أمن مصر.. يا جماعة الخير إحنا داخلين على الصيف يعنى مصر محتاجة عملة صعبة والعملة الصعبة بتيجى من السياحة والأخيرة عاوزة أمن، وطالما الداخلية أو الحكومة الوطنية مش قادرة تأمِّن يبقى مش هنشوف سايح واحد. والله مصر هىّ اللى ساحت مع الناس بتوع القرار قاصدين يرجّعونا أكثر من 100 سنة ورا بسياسة عقيمة وتفكير قديم أتمنى طبعا أن لا يصل إلى إلغاء أيضا مباريات مصر للمنتخب على المستوى الدولى والله هيكون عليه العوض ومنه العوض فى كل مصر من سياحة لاقتصاد، والحكومة طبعا مكبرة دماغها وشايفة نفسها صح، طالما شغالين بالمثل القديم بتاع خالتى «الباب اللى ييجى منه الريح إقفله فى وش المصريين واستريح»، عمار يا مصر، حكومتك مش عارفة تأمِّن ماتش، طيب تأمِّن إزاى 85 مليون مصرى؟ والله عيب عليكم الكلام ده