اتجاهات

الخميس/15/9/2011
محمد موافى: سلام من الله عليكم ورحمة منه وبركاته الشعب يريد تحقيق الأمن فماذا يحدث بعد أن تعدت القضيه تأمين المواطني الي الخوف علي أمن البلد كلها .. حالة الإنفلات الأمني المتمثلة في الإعتداء علي مقر الشرطه المتمثله أيضاٌ في المواجهات المسلحة بين المواطنين في زيادة معدلات الجريمه .. هل القضيه هي إنفلات أمني أم أيضا هي إنفلات مجتمعي وإنفلات أخلاقي خلال الشهور الخمسة الإخيرة قدمت الشرطه 25 شهيداً ونحو 800 جريح في ملاحقة الجريمه .. تعالوا نبدأ من الجمعة الأخيره – الجمعة الماضيه وما أدراك الجمعة الماضيه جمعة تصحيح المسار التي أراد لها البعض الخروج عن المسار – جمعة مواجهة سفارة إسرائيل التي إنتقلت الي مديرية أمن الجيزة الواقعة التي أصابتنا جميعاً بالفزع وأصبح التساؤل ذلك جري مع واحده من أهم مقار الداخلية فماذا يمكن أن يجري مع المواطن العادل في مواجهة البلطجه .. وزير الداخلية دعي رجاله بضبط النفس وعدم إطلاق الرصاص بعدها أقر مجلس الوزراء تفعيل العمل بقانون الطوارئ .. السؤال الي متي ضبط النفس .. دخلنا مرة أخري مرحلةً أخري من محاولة منع المساس بهيبة الدولة – البلد الآن بحاجه لكلمة حق دون منافقة الناس ودون اللعب علي مشاعرهم وعواطفهم ولا حتي منافقة الحكومه .. أيها الساده الليله معنا وزير داخلية مصر – مصر بعد الثوره – الرجل الذي خرج من الميدان الي الوزاره بهدف إعادة الهيبه والأمن وبمحاسبة المقصرين وبإعادة هيكلة جهاز الشرطه أو ما سُمِّي بإعادة الهيكله وإعادة المصالحة بين الشعب والشرطه علي الرغم من أن الأمن كل يوم يغيب عن اليوم الذي سبقه بفعل ما نشهده في الشارع – قبل اللقاء أوأكد أنني شخصياً مشفق علي اللواء/ منصور عيسوي فهو بين ضغوط وهجوم من كل إتجاه .. أشفق علي وزير الداخلية ولكني أشفق علي مصر أكثر التي سيُسأل عنها كل مذيع ، كل صحفي ، كل صاحب قلم يحاول أن يحقق مكاسب خاصه علي حساب البلد يحاول أن يحقق مكاسب بنفاق قطاعات من الناس أو ببيع البلد كلها لإرضاء بعض قطاعات الناس أو حتي بعضهم لإرضاء الحكومه والسلطه .. مصر بحاجه الآن للبحث عن الحقيقة .. أيها الساده بعد الفاصل نحاول قراءة ما حدث وما قد يحدث حتي نعرف مصر رايحه علي فين ؟ خلونا نبدأ بتصريحات مجموعة الأزمة الوزارايه التي وزير الإعلام أسامة هيكل
بسم الله الرحمن الرحيم .. شهدت مصر أمس يوماً عصيباً أصاب جموع المصريين بالألم والقلق وبات واضحاً أن تصرفات البعض أصبحت تهدد الثوره المصريه وأدت للمساس بهيبة الدولة في الداخل والخارج وأمام هذا الوضع الخطير أجتمع المجلس الأعلي للقوات المسلحة مع مجلس الوزراء المصغَّر وتمت مناقشة الأزمة وأبعادها في الداخل والخارج وإتفقت الآراء علي مجموعة من النقاط أثناء المناقشات
أولا : أن مصر تتعرض لمحنه حقيقية تهدد كيان الدولة ككل وهو ظرف إستثنائي تستوجب مواجهته بإجراءات قانونية حاسمة .
ثانيا : أن البعض إستغل ضبط النفس الواضح من جانب الأمن في التعامل مع المتظاهرين وحاولوا إستفزازهم بصورة غير مسبوقة ..
ثالثا :أن ما حدث بالأمس هو خروجٍ واضح عن القانون ولا يمكن بأي حال من الأحوال أن يوصف من إرتكبوا هذه الأفعال بأنهم شرفاء .
رابعا : أن ما حدث أدي للمساس بصورة مصر أمام المجتمع الدولي واضر بمصالحها وهو أمر لم يعد ممكننا التجاوزعنه وإنتهي الإجتماع الي مجموعة من النقاط :
1- إتخاذ الإجراءات القانونية لإحالة المقبوض عليهم ومن يثبت تورطهم بالتحريض أو المشاركة في أحداث أمس الي محكمة أمن الدولة طوارئ .
2- تطبيق كافة النصوص القانوني المتاحه بقانون الطوارئ الذي كان مستهدفاً وقفه خلال الفتره القادمه و ذلك إنطلاقا من الحفاظً علي الدولة وهيبتها .
3- تؤكد مصر إلتزامها الكامل بإتفاقياتها الدولية بما في ذلك تأمين كافة البعثات الدبلوماسيه الأجنبية داخل الأراضي المصريه .
4- مناشدة كافة القوي الوطنية والسياسية المصرية ووسائل الإعلام المختلفه بتحمل مسؤلياتهم في مواجهة ظاهرة الإنفلات الأمني والأخلاقي وعدم السير في طريق التحريض لمحاولة إثبات الوجود وإرضاء فئه من المجتمع علي حساب أمن الوطن كله
5- قيام أجهزة الأمن من الآن فصاعداً بإتخاذ ما يلزم من إجراءات قانونية للتصدي لأعمال البلطجه وتأمين المنشآت وإستخدام كافة صلاحياتها القانونية بما في ذلك حقها الشرعي في الدفاع عن النفس حفاظاً علي أمن الوطن ..ووفقنا الله لخدمة مصر .
فاصل
محمد موافى: مشاهدينا أهلا بحضراتكم من جديد شوفنا بيان المجموعه أو الإجتماع الطارئ للمجموعة الوزاريه اللي ألقاه وزير الإعلام أسامة هيكل شوفنا المسألة بقة مرعبة مفزعة لكل الناس مصر رايحه علي فين ؟ ضيف حضراتكم النهارده المسؤول رقم واحد عن الأمن في مصر سيادة اللواء/ منصور العيسوي وزير الداخلية أهلاً بك يافندم
اللواء// منصور العيسوي : أهلا بك يافندم
محمد موافى: سيادة اللواء/ نبدأ من الجمعة الماضيه .. نبدأ من مديرية الأمن المواجهات كانت عند السفاره أو الإعتصام عند السفاره كلنا غضب من إسرائيل من مقتل 6 جنود سواء كان العمل مشروع أو غير مشروع إن إحنا نعتصم عند السفاره إنما كان فيه رأي عام موافق شويه علي كده إيه اللي نقل الشراره من السفارة لحاد مديرية الأمن ؟
اللواء/ منصور العيسوي : هو في البداية طبعا إحنا كان فيه إتفاق في اليوم السابق علي يوم الجمعة إنه حنخلي ميدان التحرير بالكامل إعتباراً من الساعه 12 مساء يوم الخميس الي 12 فجر يوم الجمعة ونتيح للمتظاهرين الذين تجمعوا في ميدان التحرير كل الحريه أن يدخلوا ميدان التحرير ويقيموا فيه الإعتصام بتاعهم
محمد موافى: زي كل جمعة
اللواء/ منصور العيسوي : زي كل جمعة وعندنا معلومة إنهم حيتحركوا من ميدان التحرير حيتجهوا الي مبني وزارة الداخلية وحيتجهوا الي مبني رئيس الوزراء والي مبني مجلسي الشعب والشوري حيبدوا فيه إعتراضهم حيقولوا فيه طلباتهم ثم يعودوا مرةً أخري لميدان التحرير وكان متوقع أو كان مفترض إن كل الإعتصام ده حينتهي تماماً في تمام الساعه السادسه مساءاً .. اللي حصل فعلاً يوم الخميس بالليل حوالي الساعة العاشره مساءاً بدأت الأفراد تتوافد علي ميدان التحرير كلمنا مدير أمن القاهره فقلت له يبقي ما فيش مبرر نستني لحد الساعه 12 إخلي الميدان بدءاً من الساعو 10 فأخلينا بالفعل الميدان من الساعه 10 وبدأت الناس تتوافد علي ميدان التحرير كانت أعداد طبعاً ما هياش كبيره ألفين وثلاث آلاف وإبتدت تتزايد شويه الجمعة كانت الآلاف لسه ما هياش كبيره بعد صلاة الجمعة إبتدت الأعداد تتزايد شويه الأعداي يعني يمكن كانت في حدود ال 20 ألف واحد
محمد موافى: ما كنتش مليونيه يافندم
اللواء/ منصور العيسوي : مليونية مين ما فيش مليونيه إطلاقاً في ميدان التحرير – مليونية مين ميدان التحرير كله مساحته 100 ألف متر – 100 ألف متر مربع بما فيه مداخل الشوارع الجانبية شارع التحرير علي شارع القصر العيني كل ديه 100 ألف متر لو إفترضت علي كل متر من 3 لثلاث أنفار لا يتجاوز 300 ألف ساعة ميدان التحرير يبقي بالكامل 300 ألف مليونيه إطلاقا ما حصلش إطلاقاً مليونية في ميدان التحرير الكلام ده غير صحيح يعني ما حصلش إطلاقاً مليونيه في ميدان التحرير الكلام ده غير صحيح يعني مش حنخش في القصة ديه إنما اللي حصل بدأت بعد صلاة الظهر تتجه مجموعات من الشباب اللي موجود في ميدان التحرير الي مبني وزارة الداخلية بدأو طبعا بعملية سباب وبتاع أنا إديت توجيهات للقوات اللي موجودة إنها تلتزم بضبط النفس الي أبعد حد ما يحتكوش إطلاقاً بالناس اللي جايه ناحية ميدان التحرير وأدخلت جميع القوات النظاميه اللي موجودة المخصصه لتأمين مبني الوزارة الي داخل مبني الوزاره وأغلقنا الأبواب دخلوا إبتدوا يحدفوا شوية طوب وبتاع مافيش كانت تجاوزات كثيره الي حدٍ ما وفيه شتائم طبعا وبتاع ثم عادوا مرةً أخري الي
محمد موافى: معالي الوزير إحنا شوفنا التجاوزات علي الهواء .. إحنا شوفنا شعار النسر الكبير بتاع وزارة الداخلية
اللواء/ منصورالعيسوي : آه ما هو الكلام دا حصل ثلاث مرات يعني هم دخلوا شارع الشيخ ريحان عند مبني وزارة الداخلية ثلاث مرات المره الأولي خرجوا طلعوا مروا علي مجلس الوزراء و علي مجلس الشعب ثم عادوا الي ميدان التحرير ثم جاءت موجةً أخري بعد كده بفتره ثم الموجة الثالثه اللي هي بدأت عملية حطيم الرخام بتاع الوجهة وبعدين أخذوا الرخام ده وإبتدوا يحدفوا بيه قوات داخل الوزاره – الوزاره الباب بتاعها مقفول حاولو يفتحوا المبني ما عرفوش يفتحو المبني باب الوزاره إبتدوا يحدفوا الطوب نبهنا طبعا الأفراد والقوات تتواجد في الداخل بعيدا عن مرمي الطوب والأحجار اللي بيحدفوا بها قعدوا فتره طويله ثم خرجوا بعد كده من هناك الي مجلس الشعب وبعد كده طلعوا علي السفاره الإسرائيلية – في الحقيقه طبعاً موقف السفارة الإسرائيلية موقف غريب جداً إنت رايح السفاره الإسرائيلية عشان تهد السور بدأت تهد السور وبعدين جيه ميدان التحرير من يدَّعي أن الأفراد الموجودين عند السفاره الإسرائيلية غير كافيين وكالب الناس قبل ما تنصرف من ميدان التحرير تتجه الي مبني السفارة الإسرائيلية وبالفعل خرج مجموعة من ميدان التحرير قبل ما ينصرفوا
محمد موافى: وكان مفعوم الغضب اللي عند السفاره
اللواء/ منصور العيسوي : بالظبط
محمد موافى: يا فندم أنا ممكن أقول أنا مستغرب من اللي حصل إنما أنا بأكلم الرجل المسؤول عن الأمن تفسيره إيه – المعلومات اللي عنده إيه – إيه اللي نقل الشرارة من السفارة لمديرية الأمن
اللواء/ منصور العيسوي : حضرتك سؤال بسيط جداً المليونية ديه اللي معموله الهدف منها إيه
محمد موافى: يعني إسمها تصحيح المسار
اللواء/ منصور العيسوي : تصحيح المسار .. طيب إيه علاقته ده بحكاية تصحيح المسار
محمد موافى: ما أنا بأسأل حضرتك
اللواء/ منصور العيسوي : أنا بأسأل بس الناس اللي دعوا الي هذه المليونيه طيب إنت عايز تصحح مسار إيه علاقة وزارة الداخلية بتصحيح المسار
محمد موافى: طيب خليني ألف بالمسار وألف بالسؤال شويه وزير الداخلية دعي أفراد الوزارة جميعا الي ضبط النفس وعدم إطلاق النار والتعامل والصبر و كل الكلام ده – الدعوي لضبط النفس تقررت من وزير الداخلية هل ديه إجراء أحترازي أم أن لدي وزير الداخلية معلومات عن خطه محدده – عن مخطط خلينا إن صح التعبير للإيقاع بين الشعب والشرطة أو إن الأمن يفضل
اللواء/ منصور العيسوي : طبعا ضبط النفس دا أساساً إحنا بنديه توجيهات للقوات وللضباط لإن الفتره السابقة الشرطة كانت مستهدفة علي وجه الخط رغم إن لو قعدنا نسترتجع أحداث 25 و26 و27 وما تلاها – 25 و26 لم تكن الشرطه مستهدفه أساساً و27 لم تكن الشرطه مستهدفه و28 الصبح لغاية الظهر ما كنتش الشركه مستهدفه بدأ الإستهداف بعد أن تراجعت قوات الأمن المركزي أو إنسحبت قوات الأمن المركزي من ميدان التحرير
محمد موافى: لأ دا يمكن يافندم من قبليها من الساعه 3,30 عند قسم البساتين البدايه يعني إستهداف الأقسام
اللواء/ منصور العيسوي : لأ إستهداف الأقسام ديه عمليه مقصوده – دا إستهداف الأقسام في توقيت واحد ديه عمليه بالقطع مخطط لها
محمد موافى: مين يافندم
اللواء/ منصور العيسوي : مش عايزين نخش المفروض إن فيه لجنة تقصي الحقائق وهذه اللجنه المفروض كانت مكلفه إنها تفحص كل هذه المسائل إقتحام أقسام الشرطه وأقتحام السجون دا عمليه بالقطع مستهدفه مقصوده
محمد موافى: أنا كمواطن لازم أعرف ما هو المسأله كده أنا بقيت مرعوب وأنا بأتفرج علي المناظر والأحداث اللي بتحصل يعني مديرية الأمن أنا إفتكرت جمعة الغضب أنا كنت علي الهواء قلت يا جماعه اللي بنشوفه ده مش جمعة الغضب مش مشاهد مسجله لأ دا علي الهواء بيحصل قدام مدرية أمن الجيزة فيهمني أعرف مين اللي رتب
اللواء/ منصور العيسوي : قصد حضرتك الجمعة الأخيره ديه
محمد موافى: الجمعة الأخيره
اللواء/ منصور العيسوي : آه
محمد موافى: كنت بأذكر الناس لأ يا جماعه ديه مش جمعة الغضب
اللواء/ منصور العيسوي : ما هو دا اللي إحنا بنتسأله بالقطع فيه ناس دفع الناس ديه فيه ناس أصلاً بتهدف إلي إسقاط الدولة مش إسقاط جهاز الشرطه هم أسقطوا جهاز الشرطه في خلال فتره من الفترات وهم بيسعوا الي الإحتكاك بالقوات المسلحه أساساً
محمد موافى: معالي الوزير السيد اللواء منصور العيسوي وزير الداخلية بيتقال عليه كده في الشارع رجل قلبه جامد بجرة قلم مشي 500 لواء بجرة قلم عمل كذا بجرة قلم غير جهاز وسمي جهاز وأنا مش منظر حضرتك تقول لي ناس يعني أنا عايز أعرف مين أصل كل ما نسأل حد يقول لنا ناس من له المصلحة في عدم عودة الأمن – من له المصلحة إكتمال منظومة الفوضي
اللواء/ منصور العيسوي : اللي له المصلحة في إسقاط الدولة مش إسقاط جهاز الشرطة أو إسقاط القوات المسلحه – إسقاط الدولة هناك من له مصلحة بالقطع في إسقاط الدولة أساساً مش إسقاط بس جهاز الشرطه لأ إسقاط جهاز الشرطه وإسقاط القوات المسلحه ثم إسقاط الدولة
محمد موافى: مين
اللواء/ منصور العيسوي : عشان تعم الفوضي بالقطع فيه جهات كثيره جداً فيه دول أخري بالقطع لها هذا الهدف بغذي وبالقطع فيه ناس في الداخل بتعمل في إطار هذا المشروع
محمد موافى: معالي الوزير تم ضبط حوالي 111 واحد الداخلية والشرطه العسكريه ضبطت حوالي 111 واحد في أحداث المديرية هل جري التحقيق معاهم والا التحقيق معاهم في النيابة علي طول
اللواء/ منصور العيسوي : دول شباب صغير مغرر بهم يعني لما تيجي تستوجي أي حد من اللي إتمسكوا قدام السفاره أو قدام مديرية أمن الجيزة حتلاقيهم شباب كلهم 18 و19 و20 سنه و25 سنه كل ده شباب أساساً مغرر بهم دا هم أصلا جاي ولو سألته إنت عايز إيه بالظبط من إقتحام مبني السفاره عاوز إيه من الإعتداء علي مديرية أمن الجيزة ما بيبقاش عارف إنما اللي مكلفه عارف وللأسف حتلاقي اللي مكلفه أو اللي بيدفعه الي هذا العمل مش حتلاقيه موجود لا في ميدان التحرير ولا في السفاره ولا قدام مديرية أمن الجيزة
محمد موافى: مش حلاقيه في الثلاث أماكن دول ومش حلاقيه برضه التحقيقات مش حتجيب رجله ولا ديه مسأله بعيده عن وزارة الداخلية ؟
اللواء/ منصور العيسوي : لأ المفروض التحقيقات تجيبه والمفروض المعلومات تجيبه والمفروض التحريات تجيبه لازم حتجيب كل هؤلاء الأفراد بنجمع فعلا معلومات وحنتوصل الي هؤلاء الأفراد وبالقطع حيتخذ ضدهم إجراء في وقت من الأوقات
محمد موافى: معالي الوزير حضرتك دعيت لضبط النفس دعيت لعدم إطلاق الرصاص لكن شوفنا بيان إجتماع مجموعه الأزمه الوزاريه إن تفعيل قانون الطوارئ – ضبط النفس كفايه عليه كده وتفعيل قانون الطوارئ – شكل الآداء أو شكل التعامل في الفتره اللي جايه مع مثل هذه الأحداث حيبقي إيه
اللواء/ منصور العيسوي : شكل التعامل لابد أن يتغير أولا حالة الطوارئ موجودة مش من دلوقت من قبل الثوره من فترات طويله حالة الطوارئ موجودة في مصر وحالة الطوارئ كانت بتتيح لوزير الداخلية أن يدلي قرارات إعتقال سواء سياسي أو جنائي وبعد أن قامت هذه الثوره أنا كنت حريص علي أن أنهي جميع قرارات الإعتقال اللي موجودة في السجون وأخرجت بالفعل جميع المعتقلين السياسيين وبما فيهم الجنائيين ويمكن حتي بعض زمايلي في الوزارة إعترضوا علي إن أنا بأخرج المعتقلين الجنائيين والسياسيين في وقت وزارة الداخلية فيه في أضعف حالاتها دا الكلام ده من بعد ما توليت بفتره بسيطه جداً وكانت فعلا وزارة الداخلية لسه ما إستردتش حاجه لا قوتها ولا عفيتها ولا حاجه خالص ولا أفرادها – كانت في أضعف حالاتها ومع ذلك خرجنا ليه لإن أنا كنت واثق تماماً أن السياسيين الموجودين في السجون أو الإسلاميين اللي موجودين في السجون سواء كان من جماعة الجهاد ولا من الجماعات الإسلاميه أو من غيرها يعني أو من الإخوان المسلمين أو غيرهم دا ناس ليها فكر – الفكر لا يواجه ولا يجابه بإنك إنت تعتقد صاحبه الفكر يجابه بإنك إنت تحاور صحبه يا تقنعه يا يقنعك إنما لا يواجه وإنك إنت تشيله كده وتعتقله وترميه في السجن بالسنه والإثنين وال 3 وال 4 فقلنا لابد أن يعود هؤلاء الناس لممارسة الحياه الطبيعية ويمارس دورهم في خدمة المجتمع وبالقطع فيهم عدد كبير جداًً عاد وبقوة وبيبتدوا يفكروا يعملوا أحزاب سياسيه وبالقطع حيتوقفوا عن ممارسة إذا كان فيه بعض جماعات كانت بتمارس العنف بالقطع توقفت بالفعل وأعلنت بالفعل تواجدهم – فالأمور ديه بالنسبه للجماعه السياسيين والإسلاميين بالقطع كان القرار بالنسبه لي شخصياً مقتنع به تماماً وأعتقد إن هو جيه في مكانه بالنسبه للجنائيين – الجنائي اللي ما كنش عليه أحكام ومعتقل كان لازم نديه فرصة إن هو يتوب وطلعنا عدد كبير منهم لغاية دلوقت أنا ما ضبطش حد فيه في قضيه إحنا ضبطنا كثير جداً من القضايا الجنائيه بس مش من دول جايز من الهاربين من السجون حضرتك عارف السجون في خلال الفتره اللاحقه ل25 يناير هربوا حوالي 23 ألف واحد
محمد موافى: فيه عمليات ملاحقه شديدة
اللواء/ منصور العيسوي : دول حنظبطهم
محمد موافى: يمكن آخرهم خنوفه بتاع عزبة أبو قرن
اللواء/ منصور العيسوي : فبقول لحضرتك دا لسه لغايه دلوقت عندنا حوالي 6 آلاف واحد أو 6 آلاف و500 واحد من المسجونين هربانين يعني أتظبط عدد كبير أكثر من 17 ألف واحد إنما لسه موجود 6 آلاف و500 واحد مسجون ودول مسجونين مش معتقلين
محمد موافى: وكل هذه الإجراءات كانت تتنافي تماماً مع فكرة الطوارئ الآن حنعود لتفعيل قانون الطوارئ إيه الجديد
اللواء/ منصور العيسوي : كثيرين دلوقت بيطالبوا بتطبيق قرارات الإعتقال فيما يمتثل بأعمال البلطجه أعمال البلطجه في فتره من الفترات روعت البلد بالقطع وأنا كنت بأقول لزمايلي مش عايزين نلجأ لقانون الطوارئ مش عايزين نلجأ لعملية الإعتقال الجنائي السياسي دا إحنا طبعاً رافضينه تماما أنا شخصيا رافضه وأرجو أن تنتهي خدمتي في الوزاره ولا أصدر قرار واحد بإعتقال أي صاحب رأي أياً ما كان إسلامي أو ليبرالي أنا الجنائيين دا وضع مختلف اللي بيمارس أعمال البلطجه دلوقت بيمارس أعمال تجارة السلاح – تجارة السلاح النهارده يعني فيه حجم كبير من تجارة السلاح في البلد
محمد موافى: بس دول يافندم مش محتاجين قانون طوارئ
اللواء/ منصور العيسوي : محتاج إيه
محمد موافى: يعني دول محتاجين الإجراءات العاديه
اللواء/ منصور العيسوي : الإجراءات العاديه في أعمال البلطجه ما بتنفعش الإجراءات القانونيه بتنفع مع البلطجي ساعة لما تظبطه مش محتاجه أمر أعمل له محضر وأبعته النيابه والنيابه بتحوله للمحكمه وبيأخذ عقوبته المقرره في القانون إنما اللي بيمارس أعمال البلطجه ما بتظبطهوش ومابتلاقيش شاهد عليه مش حينفع تسيبه لو فضلنا نسيبه فتره طويله بالقطع حيرتكب كثير من الجرائم
محمد موافى: طيب لو فضلنا يا فندم يعني كلمة بقي ضبط النفس من أكثر الكلمات التي رددها وزير الداخلية
اللواء/ منصور العيسوي : ضبط النفس في مواجهة مظاهرات أياً ما كانت مقوله إنها سلميه ما ينفعش إن أنا أواجه مظاهره بتدعي إنها سلميه بإطلاق رصاص أوبإطلاق رش إحنا كنا بنستخدم الغاز وأنا دلوقت بأحاول بقدر الإمكان نقلل من إستخدام حتي الغاز المسيل للدموع – رغم الغاز المسيل للدموع ده زي ما بعض إخواننا في حقوق الإنسان يقول لك القوي المفرطه – لا قوه مفرطه ولا نيله لإن ده ما بيعملش إصابات
محمد موافى: ما هو بعد أحداث مسرح البالون لما حصل هجوم علي وزارة الداخلية وضربتوا غاز بقي كل الجمل الإسطلاح اللي ماشي
اللواء/ منصور العيسوي : قوي مفرطه ودا كلام طبعا فيه تجاوز كثير جداً لحقائق وحتي بعض جمعيات حقوق الإنسان قالت هذا الكلام والكلام ده غير صحيح دا قصة مسرح البالون ده إصابات شرطه أكثر من إصابات المواطنين أين هي القوي المفرطه
محمد موافى: طيب أصابات الشرطه أكثر من إصابات المواطنين في مواجهات الألترس بتاع الأهلي إصابات الشركه أكثر من إصابات الأهلاويه يعني الي متي ضبط النفس بهذه الصوره
اللواء/ منصور العيسوي : ضبط النفس في المظاهرات السلميه حيستمر فيما عدا هذا لابد أن يضع كل إنسان في زهنه إنه إذا تجاوزت فسوف يتم حسابك حساباً عسيراً وفقاً للقانون لازم
محمد موافى: معالي الوزير حصل هجوم علي أقسام شرطه وحضرتك قلت ضبط النفس وبعدين قلت أي حد حيتقدم ما فيش – يعني ما فيش تعامل بالحسني وحصل – وحصل – وحصل و كل مره برضه بنقول المره الجايه لأ مش حيحصل
اللواء/ منصور العيسوي : إقتحام الشرطه وإقتحام وزارة الداخلية ده خط أحمر وأنا مش حأسمح إطلاقاً لأي بني آدم يفكر في إنه يقتحم وزارة الداخلية وحسيبه اللي حيفكر يخش وزارة الداخلية سوف أقاومه وفقاً للقانون – القانون بيبيح لي في بعض الحالات لما تبقي فيه خطوره علي الأرواح أو خطوره علي الممتلكات إستخدام السلاح وأنا لن أسمح لأي إنسان في إنه يفكر يقتحم وزارة الداخلية أو مبني قسم من أقسام الشرطه خلال الفتره القادمه الموضوع ده لابد أن ينتهي
محمد موافى: يعني لن يحدث
اللواء/ منصور العيسوي : طبعا لابد أن ينتهي لابد أن يضع كل إنسان في زهنه إنك إذا إقتحمت مبني قسم الشرطه قد تواجه بإستخدام السلاح إذا كان هناك خطوره علي المبني وأو خطوره علي الفرد أو خطوره علي الأفراد المدنيين حتي اللي موجوديه جوه القسم قد تواجه زي ما قلت لحضرتك – دا حق الدفاع الشرعي دا مكفول مثل جهاز الشرطه
محمد موافى: معالي الوزير ديه نقطه محتاجه كلام كتير خلينا نرجع لها بس بعد ما نشوف الشارع بيقول إيه معانا تقرير عن رأي المواطنين في الأحداث اللي شافوها وأصابتنا كلنا بالرعب
فاصل " تقرير "
رجل :إحنا محتاجين للشرطه الشرطه دلوقت أمن وآمان علي أساس البلد بقي فيها إنفلات أمني المفروض ترجع عشان المهاطرات اللي موجودة ديه ويبقي فيه تحجيم للبلطجيه .
رجل آخر : أنا شايف إن إحنا محتاجين الشرطه جداً لإن فيه حاجات مثلا البلطجيه وحاجات في الشارع ولازم الشرطه ترجع بس لازم ترجع أنزه من الأول كتير وأنظف وأحسن من الأول كتير
رجل آخر : لازم الشرطه ترجع وترجع بقوه يمسكوا البلطجيه والمصايب اللي حاصله ديه دا مصيبه يعني دا أمن بلد
رجل آخر: الشرطه هي الأمن والأمان بصراحه لو ما فيش أمن وآمان في الشرطه حتبقي البلد فوضي
رجل آخر : حيحققوا تفعيل الطوارئ نحس إن إحنا ماشيين كده براحتنا ما فيش أي حاجه
رجل : الظابط أخويا إبني وأمين الشرطه أخويا وإبني لازم الأمن ينزل والجيش ده لازم ينزل دا البلطجيه هي اللي بتعمل كده ما فيش حد بيحب مصر يعمل كده
رجل : لإن هي الشرطه حصن الأمان للمصريين كلها
رجل : مش كل الناس اللي هي بتعمل كده فيه فئه اللي هي بيطلق عليها الفئه الضاله هي اللي بتعمل كده المستفاده – فيه إستفاده إن هم يوقعوا الشرطه توقع الناس عشان يبقي شكل البلد كله غلط
سيده : بوجودهم في الشارع بنحس بالأمان في كل حاجه بصراحه فإحنا زعلانين من اللي بيحصل فيهم دلوقت
رجل : لازم كلنا نقف إيد واحده مع الشرطه وندعمها ولازم نحافظ عليهم لإن في الآخر الناس ديه بتحافظ علينا الناس ديه بتشتغل عشان تحافظ علينا وعلي أمننا ولازم عشان نحافظ علي الأمن الخارجي بتاعنا نبقي داخليا الناس ديه تقف وتحافظ علينا
سيده : كل اللي بيعمل الحاجات ديه لصالح مين هم عايزين يخربوا مصر وخلاص عشان مش قادرين عليها عايزين يخربوها بأي طريقه إن كانت طبعا اللي بيحصل دا إحنا ما نرضاش بيه أبداً بس حرام كمان العسكريه اللي بيموت أو بيضرب هو ذنبه إيه بيؤدي عمله ما بيؤديش أكثر من كده يعني لو إحنا بنفكر صح إحنا ممكن نعمل مظاهرات بس سلميه ونطلب إللي إحنا عايزينه لكن اللي إحنا بنعمله ده خراب للبلد كل واحد بياخد قرشين من بلد خارجيه أو أي حاجه وبييجي يخرب هنا وما بيفكرش غير في نفسه وبس
محمد موافى: مشاهدينا أهلا بحضراتكم مره ثانيه في إتجاهات ولقاء وزير الداخلية سيادة اللواء منصور العيسوي سيادة اللواء معالي الوزير إحنا شوفنا في التقرير آخر مواطنه بتتكلم بتتكلم علي إن كل واحد بيأخذ له قرشين أنا شخصياً مش مصدق إن فيه واحد ممكن ياخد فلوس عشان ينزل يعمل بلطجه بالطريقه ديه دا حيخليني أرجع لرقم 181 مليون جنيه معونات جت فيه كتابات قالت هذه المعونات أثرت في الحاله الأمنيه إيه رأي حضرتك في الكلام ده
اللواء/ منصور العيسوي : دا كلام صحيح طبعا ال180 مليون جنيه دول عملوا بيهم مساجد مثلاً طبعا إتصرفت في حاجات بتضر بأمن البلد بالقطع فيه جزء منها قد يكون بالنسبه للجمعيات المشهره
محمد موافى: هي جمعيات أسامة جمعة
اللواء/ منصور العيسوي : واللي بتبقي بتاخد بعلم وزارة التضامن قد يكون ده مفيد بالنسبه لهذه الجمعيات إنما اللي مش مسجل بيصرفه فين السياسيين اللي بيخدوا الفلوس ديه بيصرفوها فين
محمد موافى: هل لدي وزارة الداخلية معلومات عن مين اللي وصله فلوس وصرفها فين ؟
اللواء/ منصور العيسوي : فيه لجنه برئاسة مساعد أول وزير العدل بتبحث هذا الكلام وإذا كانت فيه معلومات لدينا إحنا بنسلمها لهذه اللجنه وإذا كانت معلومات في أجهزة المعلومات الأخري بالقطع حتديها للجنه واللجنه حتنتهي من فحصها وبالقطع حتذيع تقريرها وبالقطع قد يدين ناس وقد لا يدينهم مش عايزين ندين حد إحنا عايزين نقول إن هذا الشعب شعب محترم شعب بيسعي لمصلحة بلده ما بيسعاش لمصلحة حد تاني إنما إذا كان فيه من بيسعي الي تخريب البلد لابد أن يكون هناك معاه موقف ولابد أن يكون هذا الموقف حاسم وحاتم وعادل
محمد موافى: يافندم نتنمني أن نري الموقف الحاسم حتي الموقف العنيف شارع كله دلوقت بيتكلم الناس كلها بتتكلم الآن نفسها تشوف رد فعل قوي مش عايزه تشوف مديرية أمن بتهاجم تاني قسم شرطه بيهاجم تاني خلينا نخش جوه مديرية الأمن أو القسم الظابط اللي جوه اللي حيدافع اللي حضرتك بتقول حيدافع دفاع شرعي ما هو خايف ان هو لو عمل أي حاجه ودافع دفاع شرعي ثاني يوم حيبقي عند النيابه
اللواء/ منصور العيسوي : حأقول لحضرتك حاجه هوفي فتره من الفترات كان الكلام ده كان الإحساس ده كان موجود – كان موجود فعلا لدي جهاز الشرطه كله كان موجود لدي جميع الظباط والأفراد ليه لأنه في خلال الفتره اللاحقه ل 25 يناير وعملية التحقيقات اللي تمت مع كثير جداً من الظباط والأفراد فيه ناس كانت بتدافع عن الأقسام فإستجوبت كما لو كانت بتضرب في مظاهره دا وضع طبعا بيختلف اللي بيدافع عن قسم دا بيدافع عن حق شرعي كفله القانون
محمد موافى: بس إسمح لي غضب داخل وزارة الداخلية غضب من كثير من الظباط تجاه وزير الداخلية إن هو بعد ما قال أن الذي قتل أمام أي قسم مش شهيد دا بلطجي هدد أو قال إن هو حيحيل كل الضباط المتهمين في الأقسام الي العمل في ديوان الوزاره
اللواء/ منصور العيسوي : لا..لا..لأ ثانيه واحده بس الكلام دا أنا قلته ما رجعتش فيه لأ الظباط اللي متهمين في قضايا أنا بأحميهم طبعاً الظباط المتهمين في قضايا لابد أن أجنبهم مواجهة المواطن ما أنا لازم أبعدهم عن المواطن لغاية ما تنتهي المحاكمات إذا الحكم لصالحه وإن شاء الله بندعوا إن ربنا يكرمهم جميعا ويرجعوا لعملهم إذا الحكم لصالحه حيرجع مكانه الحته اللي هو فيها إنما دلوقت أنا بأجنبه من مواجهة جمهور غاضب ما عندوش بيان بالحقائق اللي مظبوطه هل الضابط ده ضرب في مظاهره ولا ضرب دفاعا عن القسم فبالتالي المسائل بالنسبة له غائبه بالنسبه لمصر فمينفعش إن أنا أعرض الضابط بتاعي في لمواجهة مع الجمهور إنما دا مش موقف
محمد موافى: كأجراء حمايه
اللواء/ منصور العيسوي : أنا لسه بأقول قلت الكلام ده وما زلت بأقوله الذي قتل أمام قسم شرطه أو أمام السجون عشان يقتحم السجن ويسرق السلاح ويطلع المساجين ده بلطجي شهيد إيه مين يقول إن ده شهيد اللي بيقول شهيد قد يكون سياسي إنما في واقع الحال اللي داخل يقتحم إسم ويسرق السلاح ويطلع مساجين ممكن ده يبقي شهيد إحنا مش عايزين نخش في الشهاده الشهاده ديه علاقه بينه وبين
محمد موافى: قضيه مختلفه تماما .. طيب معالي الوزير اللي حصل ده كان حصل يوم 28 يناير من 28 يناير لغاية النهارده خليني أرجع لمسألة المعونات فيه فلوس دخلت من هذا التوقيت ما كانش فيه وزارة داخليه أو وزارة الداخلية كانت غايبه أو وزارة الداخلية كان عندها نكسه أشبه بنكسة يوليو
اللواء/ منصور العيسوي : أيوه
محمد موافى: هل الكلام ده مش حيتعرف فترت الفلوس اللي دخلت في غياب الأمن
اللواء/ منصور العيسوي : الفلوس اللي دخلت في غياب الأمن طبعا مش ما هو اللي بيخش فلوس ما بيجيش يدي علناً يعني أنا لو دخلت فلوس مش حأدي علنا قدام الناس حأديهالك كده خفيه
محمد موافى: طيب أنا ما لقتش حد خفيه ولا علني يديلي هههه
اللواء/ منصور العيسوي : ههههه فيه ناس قبضت طبعا من جهات خارجيه وديه بالنسبه لنا فيه حاجات مرصوده بالفعل وإحنا إدناها بالفعل الذي يجري التحقيق في وزارة العدل لدينا فعلاً معلومات
محمد موافى: يعني حنجد في الفتره اللي جايه مفاجآت بأسماء بمبالغ
اللواء/ منصور العيسوي : بالقطع طبعا المستشار اللي بيجري التحقيقات حيعلن نتيجة التحقيق وقد يستدعي ناس يستجوبهم بالقطع
محمد موافى: معالي الوزير أنا عايز أتكلم – يعني أتكلمنا عن ضباط الشرطه اللي كانوا في الأقسام ساعة الثوره الي الآن كيف يدافع الضابط عن نفسه الوزاره من جوة فيها مشاكل كتير أو مش مشاكل فيها نوع من أنواع التذمر أو الغضب كان فيه معلومات أمنية إن كان حيبقي فيه النهارده أو أمبارح مظاهرة لأمناء الشرطه هم الناس رجعوا في كلامهم عشان الحداث اللي جاريه لإن الوزير
اللواء/ منصور العيسوي : لأ أمناء الشرطه تم بالفعل مش مظاهره متضررين من الوزاره دا هم مظاهره داعمين للوزاره هم طلعوا فعلا
محمد موافى: هم كانوا بتكلموا يعني الوزير إدي 200% للعاملين المدنيين وماداش ولا للظباط ولا
اللواء/ منصور العيسوي : لا .. لا ..لأ الوزير ما بيفرقش بين العاملين في الوزاره سواء كانوا ظباط والا مدنيين والا أفراد لأ ال200% ديه بتاعة السيد وزير الماليه ديه علي كافة موظفي الدولة وللأسف الشديد ما بتنطبقش علينا ما إنطبقتش علي أفراد فبالتالي ما أخدوش منها يعني إنما المظاهره اللي قامت بيها أمناء الشرطه ديه هذه المسيره اللي طلعت قدام الوزاره وقابلها السيد مساعد وزير الأفراد والسيد مساعد أول وزير الأمن ديه مظاهره داعمه للوزاره وليست ضد الوزاره وما كنوش طالبين حاجات فئويه
محمد موافى: لو بنتكلم عن تطهير وزارة الداخلية
اللواء/ منصور العيسوي : برضه تطهير أنا بأعترض علي كلمة تطهير ديه
محمد موافى: ما أنا حأقول لحضرتك بس أنا مش بأتهم أو بأقولها من باب الإتهام أو النقد أنا بأتكلم عن تطهير وزارة الداخلية ما أنا محتاج هذا المكان .. هناك أشياء يجب أن تطهر فيه وهو برضه محتاج دعم مالي محتاج إعادة نظر في مرتبات الضباط والأفراد والأمناء
اللواء/ منصور العيسوي : أولا مسألة مقولة التطهير ديه مقوله الحقيقه سيئه جداً لا ينبغي لإن النهارده لو أطلقت هذه الكلمه في وزارات – وزارة الداخلية كانت أكثر الوزارات فساداً ده مش صحيح هو اللي أفسد الدولة هو وزارة الداخلية دا فيه وزارات نهبت الدولة مش عايزين نحط أسامي ولا عايزين نقول وزارة إيه ولا وزارة إيه إنما مش وزارة الداخلية فيه طبعاً فساد في جميع الوزارات وفيه فساد من ضمن التطهير دا معناه إن كل الناس فاسده وده مش صحيح إحنا بنعمل تقييمات لما بنعمل تقييم بنحط ضابط لهذا بندور السلوكيات نمرة واحد اللي بنلاقي عنده سلوكيات منحرفه بنمشيه ونمرة 2 الآداء أنا بأطلع الناس آداء وقد يكون سلوكه 10 علي 10 يعني ألنهاده الظابط لما أطالبه مثلا عشان يتعين مدير أمن ولا يتعين مدي مصلحة وآداؤه مش علي مستوي بنمشيه
محمد موافى: معالي الوزير انا أخطأت التعبير أنا ما بأتكلم علي تطهير أو فساد أنا بأتكلم عن إعادة النظر في الوضع المادي لضابط الشرطه علشان يبقي مكتفي عشان دا يبقي نوع من الدعم يبقي فيه تشجيع
اللواء/ منصور العيسوي : لابد إعادة النظر في هذا الكلام لأنه مش بس ضابط شرطه دا جميع موظفي الدولة عايز سياسة مرتباتهم كمان مرتبات الشرطه ضمناً ومرتب أفراد الشرطه بالذات سواء كانوا أمناء ولا أفراد الدرجه الأولي طبعا مرتبات هزيله ودا يمكن سبب أساسي في العجز اللي موجود عندنا ما حدش بيرضي يقبل يشتغل في جهاز الشرطه كفرد أو كأمين شرطه المرتبات ضئيله فمشاكلها عديده
محمد موافى: معالي الوزير من الجمعة اللي فاتت حضرتك قررت رفع حالة الطوارئ داخل أقسام الشرطه وإلغاء الإيجازات هل هذه الحاله من التأهب مازالت مستمره ؟
اللواء/ منصور العيسوي : آه
محمد موافى: الي متي ؟
اللواء/ منصور العيسوي : لفتره بسيطه لغاية ما تنضبط الأمور في الشارع حتعود الأمور كما كانت
محمد موافى: حالة الطوارئ برضه صاحبها حديث عن الأفراد اللي موجودين مش كفايه الأفراد لما حينشغلوا داخل القسم حينسوا الشارع
اللواء/ منصور العيسوي : ما هي ديه مشكلتهم في الجهاز النهارده الحوادث اللي موجدوده في الشارع كثيره بشكل غير عادي الوقفات الإحتجاجيه ما بتبطلش قدام مجلس الوزراء وقدام وزارة الزراعه وقدام وزارة الري ما فيش – هل هذه الوقفات الإحتجاجيه ديه ما بتستهلكش جزء كبير من جهد الأفراد اللي موجودة في الشرطه بتستهلك جزء كبير جداً هذا الجهد مش المفروض يبقي موجود في الدوريات في الشارع النهارده الناس بتطالب بإيه بتطالب بأن يكون هناك تواجد شرطي في الدوريات في الشارع في الميادين الوقفات الإحتجاجيه ديه بتسحب من هذا الرصيد بالإضافه إنه الرصيد أصلاً ما هواش كبير بتسحب من هذا الرصيد وتكون النتيجه إنك إنت تواجدك في الشارع مش مؤثر لإنك كل شويه .. حأقول لحضرتك حاجه أنا النهارده الحملات اللي بيعملها مدير أمن القاهره ومدير أمن الجيزة في الميادين مثلا في ميدان رمسيس ولا في ميدان العتبه هل أنا كل ما أعمل حمله في ميدان رمسيس وأفضي الميدان آأعد في ميدان رمسيس ثلاث أربع تشكيلات من الأمن المركزي أو من فرق الأمن عشان تؤمن عدم عودة البياعين
محمد موافى: طبعا هم عندهم مظاهره في حته تانيه
اللواء/ منصور العيسوي : مش ممكن ما هو شويه في ميدان العتبه وشويه في ميدان رمسيس وشويه في ميدان مش عارف إيه وبعدين عايزين نعمل في روكسي وبعدين عايزين نعمل في حلوان الكلام ده دا إستهلاج للقوات في غير مكانها يعني المفروض هذه القوات تتفرغ تماماً للدوريات وللمورات اللي موجودة في الشوارع والطرق
محمد موافى: طيب معالي الوزير إحنا عندنا رفع حالة طوارئ في الشرطه أو في جهاز الشرطه كله عندنا مظاهرات فئويه ومطالبات هنا أو هنا وبرضه مطالبين إن إحنا لا تتكرر الهجوم علي مقرات الشرطه يعني ديه معادله
اللواء/ منصور العيسوي : حأقول لحضرتك حاجه مقررات الشرطه أنا مدي تعليمات لمديرية الأمن التعدي علي أقسام الشرطه غير مسموح به إنت مش محتاج قرار منِّي عشان أقول لك إنت بتضرب نار القانون بيتيح لك حق الدفاع الشرعي ده حق مكفول مش لظابط الشرطه مكفول لأي مواطن في الشارع يتعرض لخطر جسين قد يودي بحياته من حقه أن يستخدم السلاح أي خطر جسيم قد يؤدي الي إصابة آخرين من حق المواطن أن يستخدم السلاح الممتلكات من حقه العرض دا إحنا بندرس قانون العقوبات في كلية الشرطه والظباط عارفين هذا الكلام فحق الدفاع الشرعي حق بكفله القانون إحنا في فتره من الفترات كنا
محمد موافى: ما هو دا لما ما يحصلش يا فندم يبقي تكاسل
اللواء/ منصور العيسوي : مش تكاسل لأ كان في وقت من الأوقات ما ينفعش إنك تطبقه ليه لإنك إنت الشعب كله متصور إنك إنت اللي قاتل كل الناس بتوع المتظاهرين فمينفعش كل يوم والثاني تضرب نار وتموت الناس فكان لابد أن نتوقف لغايه لما الناس تعرف إنه مش الشرطه هي اللي عملت كل الكلام ده فدلوقت مسألة التعدي علي الأقسام التعدي علي مباني السجون التعدي علي مديريات الأمن دا مسأله مرفوضه تماماً حد حيخش لابد أن يواجه ويواجه بحسم وفقاً للقانون والقانون بيبيح هذا – القانون بيبيح هذا مش أنا اللي بأدي له القرار يعني ما حدش يقول لي ما أحدش قرار من الوزير لأ دا القانون اللي بيديك أنا مش محتاج
محمد موافى: يعني حضرتك دا رساله لكل ضابط شرطه بيسمعنا علي الهواء إنت مش محتاج – المسأله لازم تدافع عن نفسك
اللواء/ منصور العيسوي : حق الدفاع الشرعي حق مكفول مش لضابط الشرطه بس للمواطن العادي إذا تعرضت حياته للخطر من حقه أن يدافع عن نفسه إذا تعرض حياة الآخرين وهو واقف للخطر من حقه أن يدافع عنهم إذا تعرضت ممتلكات الناس فإذا كان الظابط أو البتاع اللي بيؤمن منشأة مطالب بإنه يؤمنها من حقه أن يدافع عنها وبالتالي من حقه أن يدافع عن قسمه
محمد موافى: معالي الوزير إحنا بنتكلم عن تفعيل قانون الطوارئ القرار من أحداث الجمعة بلاش نتكلم عن الإثنين والا الثلاثاء خلينا الجمعة اللي جايه هل سنشهد تغير لافت في الآداء الأمني أوفي المواجهه يعني حنجد الحسم ؟
اللواء/ منصور العيسوي : لأ قولي حضرتك إيه التغير اللي في رأيك عاوزه يحدث ؟
محمد موافى: إن اللي يقرب نحو مديرية أمن ولا مقر شرطه يُعامل معاه بعنف
اللواء/ منصور العيسوي : طبعا دا حيحصل بالفعل تعرض مبني الوزاره والكلام ده أنا قلته – أنا قاعد جوه مبني الوزاره خلاص اللي من بره ده إنما لو حط رجله جوه الوزاره مش حيطلع
محمد موافى: ما هو إنزال النسر ما هو ده سيادة الوزاره هيبة الدولة
اللواء/ منصور العيسوي : والقسم أي منشأه
محمد موافى: أنا بأتكلم علي النسر – النسر اللي علي الواجهه
اللواء/ منصور العيسوي : أي منشأه مكلف ضابط الشرطه أو فرد الشرطه مكلف بتأمينها أو حراستها عليه أن يدافع عنها حتي لو إقتدي الأمر إستخدام السلاح دا القانون هو أنا بأقول له أمر من عند الوزير دا القانون بيقول هذا الكلام
محمد موافى: وزارة الداخلية حتخلي ميدان التحرير الجمعة القادمه ودا حيبقي من ضبط النفس والا لأ مش حتخلي ميدان التحرير
اللواء/ منصور العيسوي : لأ حتخلي
محمد موافى: الجمعة اللي جايه ميدان التحرير حتسيبوا الميدان برضه ساعة
اللواء/ منصور العيسوي : آه إذا حبو يعملوا آه حنسيبه إيه المشكله طالما إن الدولة بتقول أن حق التظاهر حق دستوري ومكفول للمواطنين هذه التظاهر آه طبعا ما فيش مشكله نسيبه له برضه إيه المشكله ما فيش مشكله في القصه ديه إنما خروج ومخالفة القانون لابد أن يضع كل إنسان في إعتباره إنه إعتباراً من الفترات القادمه سوف يحاسب كل من يخالف القانون بحسم وبشده
محمد موافى: معالي الوزير الجزء اللي فات كله من اللقاء يعني أنا حسيت إن أنا بأدافع عن الشرطه أو جاي في صالح الأمن اللي هو المفترض إن إحنا كلنا نبقي في صالح الأمن – أمن البلد خلينا نقول بعض الإنتقادات اللي بتوجه
اللواء/ منصور العيسوي : هل من المنطق إن أنا كمصري أنزل أدمر المنشآت وأدمر سيارات هي الشرطه ديه هي العربيات بتاعة الشرطه وعربيات المطافي اللي سرقها واحد وعربيات الإسعاف وعربيات الأمن اللي بيحرقها المواطن ده ديه مش عربيات الدولة هي ديه عربيات منصور العيسوي والا عربيات حضرتك والا عربيات أي حد ديه عربيات الدولة مين اللي بيدفع ثمنها اللي بيدفع ثمنها ده
محمد موافى: لما عربية مطافي تتسرق وسوفنا اللي سرقها أنا لو قابلني أنا مش حيعرف ياخد مني حاجه يعني 50 واحد ينزلوا يأخذوا عربية مطافي أمال عربية الواحد العادي اللي واقف قدام بيته إيه اللي ممكن يتعمل فيها
اللواء/ منصور العيسوي : دا أخذها والناس جريت وراه ما لحقهوش بس من حسن الحظ ظابط آخر مسكه فبأقول لحضرتك أنا بأسأل سؤال المواطن اللي بيحرق عربية الشرطه ده بيحرق أي منشأة هو متصور إن المنشأه ديه بتاعة وزير الداخلية مثلاً دا ميراثه اللي سابهوله مثلاً أهله دا بتاع الدولة بتاعك يعنى إنت بتدفع ضريبه عشان الحكومه تشتري بها عربيات وتشتري عربيات إسعاف
محمد موافى: اللي تم تدميره 22 عربيه ؟
اللواء/ منصور العيسوي : في المره اللي فاتت
محمد موافى: في الجمعة اللي فاتت
اللواء/ منصور العيسوي : لأ أقل من كده شويه
محمد موافى: يبقي دخل معاهم سيارات مدنيه حضرتك
اللواء/ منصور العيسوي : آه طبعا فيه سيارات مدنيه
محمد موافى: معالي الوزير علي الرغم من كل التصريحات التي تتحدث عن خطه أمنيه لإعادة الأمن عن إستعادة هيبة الدولة لكن الناس مش حاسه بالكلام ده
اللواء/ منصور العيسوي :حأقول لحضرتك حاجه إحنا في فتره من الفترات كنا بنقول إن معندناش – عندنا عجز في أفراد الشرطه وبالتالي ما كنش ممكن تنزل أفراد شرطه رجلين في دوريات القاهره – القاهره إنت عارف حضرتك مش محافظه القاهره عشر محافظات في بعض فكنا قلنا حنستعين بسيارات حنوفر عساكر الأمن المركزي اللي بينزلوا التشريفات قلنا حنلغي التشريفات ديه وحنستعين بأفراد فرق الأمن وعساكر الأمن المركزي في الدوريات الراكبه بينزل في كل عربيه وأحنا أخذنا من القوات المسلحه
محمد موافى: شوفنا التشكيل اللي هو ماشي في الشارع ده
اللواء/ منصور العيسوي : أخدنا 200 عربيه من القوات المسلحه من فتره كده وأنا نزلتهم في القاهره والجيزة فقط طبعا 200 عربيه في 50 قسم ما يعملوش حاجه يعني بمعدل كل قسم 4 عربيات – 4 عربيات المفروض العربيه بتستخدم في 3 دوريات فمعني كده إنت حتشغل قسم الدوريه الصباحيه مثلا عربيتين والدوريه المسائيه عربيه دا ما ينفعش يعني عدد قليل ياإما حتتطبق العربيه تخلي العربيه تشتغل أكثر من 5 ساعات وقلنا حننزل العربيات ديه كل عربيه فيها 4 أفراد مسلحين من الأمن المركزي أو فرق المن ومعاهم ظابط لما تيجي تقسم ال 200 عربيه دول علي ال 50 قسم حيطلع كام عربيه في القسم العدد مش كفايه
محمد موافى: 4 عربيات مش كفايه تمام
اللواء/ منصور العيسوي : وبعدين إحما بنشتري فعلاً إنما السوق المحلي ما بيستفدش تقريبا كل المتوفر في السوق المحلي بنغطي به الطرق الطوالي مصر إسكندريه ومصر السويس ومصر إسماعيليه وبقية طرق الطوالي ديه وعشان نغطي به برضه إحنا عندنا برضه مش القاهره برضه عندنا إسكندريه وعندنا السويس
محمد موافى: أنا كمواطن أستني لحاد ما وزارة الداخلية تشتري كل الكلام ده عشان أبقي متطمن دا الحوادث في الطرق بقة كتير دا طريق الواحات كله مثلا علي سبيل المثال ما فهوش عربيه ما فهوش كمين وفيه حوادث سرقه
اللواء/ منصور العيسوي : طريق الواحات البحريه حالة المرور فيها تكاد تكون معدومه
محمد موافى: لأ الواحات هنا يافندم دا اكتوبر
اللواء/ منصور العيسوي : لأ دا من هنا لأكتوبر من أول طريق الفيوم لأ دا متأمن لأ فيه دوريه إنما أنا بأتكلم علي إيه في فتره من الفترات إنت عندك طرق حصل فيها فعلا عمليات سطو طريق مصر السويس دا حصل فيه بالفعل فإحنا دلوقت غطينا كل 30 كيلو يبقي فيه عربيتين عربيه أمن مركزي + عربية بحث جنائي بالإضافه طبعا لخدمات المرور – خدمات المرور مش مرتبطه
محمد موافى: ماذا ينقص وزارة الداخلية حتي تستعيد الأمن 100%
اللواء/ منصور العيسوي : حاجتين تتوقف المليونات اللي مالهاش لازمه أن تتوقف عمليات المطالبات الطائفيه الكثيره جداً اللي كل يوم مش عارف واقفه قدام وزير التعليم العالي واحده قدام وزارة التربيه والتعليم واحده قدام وزارة الزراعه ديه بتستهلك جهد وبتستهلك وقات مالهاش لازمه
محمد موافى: دا رقم واحد
اللواء/ منصور العيسوي : ونمرة 2 أن نستكمل إحتياجاتنا من السيارات من الركبات .. يوم ما أستكمل السيارات والمركبات تبقي كل القاهره فيها دوريات راكبه مسلحه بتأمن جميع طرقها جميع الطرق الطوالي علي مستوي الجمهوريه القاهره إسكندريه – القاهره السويس – القاهره الصعيد شرق وغرب حتبقي موجودة عندك حتؤمن هذه الطرق وحتبقي قوات الأمن المركزي المتبقيه موجودة للخدمات الخفيفه خدمات الكوره خدمات بتاع يعني باقي المتبقي منها حيبقي عدد محدود حيغطي الخدمات الفرد إنما النهارده
محمد موافى: إنما كعدد ضباط وكعدد أفراد
اللواء/ منصور العيسوي :لأ عدد ضباط ما فيش عجز – الناس كلها كانت متصوره إن العز في عدد الظباط ولذلك الكل يقول لك
محمد موافى: بس بنشوف الضباط دلوقت بتشتغل عدد ساعات كبيره
اللواء/ منصور العيسوي : ما هي عدد الساعات الكبيره ديه برضه الشرطه ما كنتش ملتزمه بقصة ال 8 ساعات ديه – ال 8 ساعات ديه بدأت بعد الثوره بالفعل يعني الشرطه ما فيش حاجه إسمها يوم أجازه ولا يوم راحه النبطشيات كانت بتشتغل صباح مساء ليل الصباح يشتغل من الساعه 8 الصبح لغاية 2 والمساء من الساعه 2 لغاية الساعه 10 والليل من 10 لغاية 8 الصبح وبييج ظابط الدوريه الصباحيه لما ينقل مسا يقول لك لأ إنت خلصت الساعه 2 الظهر ترجع يوم الجمعة الساعه 2 الظهر من الساعه 2 الي 2 يبقي 24 ساع دا راحه طبعا الكلام ده مش دلوقت الظباط بتطالب إنها تاخد راحاتها زيها زي أي موظف مدني فبتكون النتيجه إن ده بيقلل عدد الظباط
محمد موافى: ما هو عشان كده بأقول لحضرتك إن فيه عجز في عدد الظباط
اللواء/ منصور العيسوي : لأ برضه ما فيش عجز خالص
محمد موافى: رغم ده
اللواء/ منصور العيسوي :آه لإن عدد الضباط في الأقسام مش قليل يعني زمان كنا بنشتغل في القسم فيه 10 – 12 – 15 – 20 ظابط دلوقت فيه أكثر من كده
محمد موافى: أيوه بس زمان كنا قد إيه ودلوقت قد إيه برضه يعني
اللواء/ منصور العيسوي : لأ إنت بتتكلم عدد السكان يعني .. إحنا كنا بنشتغل في قسم الموسكي موجود 9 ظبَّاط مأمور ونائب و2 معاونين ظابط وشرطه وظابط مباحث واحد وظابط لإداري و3 ظباط نبطشيه النهارده ما فيش فيها قسم أقل من 20 ظابط
محمد موافى: بعيد عن الأقسام ومدريات الأمن حنيجي للقطاع أو الجهاز الأكبر جوه وزارة الدخليه اللي كان أثار جدل وإتعمل مشاكل كتير وتم إقتحام كل مقراتها قطاع أمن الدولة سابقا ً أو الأمن الوطني حالياً هل إنتهت عملية الهيكله أو إعادة التنظيم أو إعادة ترتيب البيت من الداخل
اللواء/ منصور العيسوي : لأ هو ما تقدرش تقول إنتهت عملية طبعاً إحنا العمليات الأولانيه إنتهت يعني إلغاء قرار أمن الدولة ونقل كل الظباط اللي كانوا مشتركين في عمليات الإعتقالات والتعذيب وبتاع الغالبيه 90% منهم تقريباً مشيناهم أي بني آدم إحنا عملنا التقييم أساساً قلنا زي ما بأقول لحضرتك بدأنا بالمسلك أو واحد حتي لو كان آداؤه 10 علي 10 ومسلكه فيه شائبه بنمشيه
محمد موافى: يعني أي متورط في قضية تعذيب
اللواء/ منصور العيسوي :كل مشيناه ليه هذا الجهاز في فتره من الفترات كان أحد إسباب إحتقان المواطنين ضد الوزاره فمبينفعش إحنا عايزينه يعود قوي .. عشان يعود قوي لابد أن يعود جهاز محترم
محمد موافى: خل هو عاد قوي ولا لسه ما عادش
اللواء/ منصور العيسوي :لأ هو عاد بس طبعاً خلي بالك إحنا قعدنا أنا مسكت الوزاره في أوائل شهر 3 ( 7 /3 أو 8/3 ) واخد بال حضرتك وقعدنا الجهاز ده فضلوا قاعدين في بيوتهم لإن لسه ما كناش لا إستلمنا مقرات ولا إستلمنا
محمد موافى: هل الجهاز دلوقت عاد وشوفنا شغله
اللواء/ منصور العيسوي : عاد وبيشتغل دلوقت
محمد موافى: هل شغل النهارده ظهر في قناة الجزيره أو في مكتب قناة الجزيره
اللواء/ منصور العيسوي : لا .. لا .. لأ قناة الجزيره مالناش علاقه بيها
محمد موافى: اللي أتكتب الأمن الوطني أقتحم
اللواء/ منصور العيسوي : ثانيه واحده قناة الجزيره ديه .. كلموني قالوا لي إنت أقتحمت – إحنا مالناش علاقه بها – قناة الجزيره دا قرار من السيد وزير الإعلام لإن المكتب الذي تدير منه قناة الجزيره البث دا مش مرخص وما ينفعش حد في الدنيا ما فيش بلد في الدنيا بتحترم شعبها وبتحترم قانونها أي دوله تيجي تقيم قناه من غير ما تاخد ترخيص
محمد موافى: أيو بس اللي ينفذ الكلام ده رجال الأمن الوطني
اللواء/ منصور العيسوي :نعم
محمد موافى: مين اللي دخل المكتب
اللواء/ منصور العيسوي : الأمن الوطني ما دخلش المكتب خالص لأ دا بتوع المصنفات الفنيه دول متصلين بالإذاعه ومتصلين بالإستعلامات دا شغلهم مع الإعلام والإستعلامات إنما مالوش علاقه بالأمن الوطني خالص المن الوطني لم يدخل مبني الجزيره
محمد موافى: معالي الوزير الأحداث اللي فاتت ديه كلها السؤال الأكبر اللي أنا قعدت ألح عليه اللي هو من وراء أحداث مريرية الأمن مش إحنا شايفين إن دا دور المن الوطني ما هو لما يبقي فيه خلط بين السياسه والفلوس فيه مسأله غير مفهومه
اللواء/ منصور العيسوي : حأقول لحضرتك حاجه المجموعات بتوع الألترس بتوع الأهلي والزمالك ما كانوا موجودين في ميدان التحرير مش كانوا موجودين في ميدان التحرير وكانوا موجودين بكثره دا هم أكثر من إئتلافات الثوره اللي كانت موجودة وهم الفئه المؤثره وهم اللي جم عندنا في الوزاره وهم اللي خرجوا من الوزاره علي مجلس الوزراء مجلس الشعب وهم اللي خرجوا من الوزاره ومجلس الوزراء علي السفاره ومنها من السفاره علي السفاره السعوديه ثم علي مديرية المن ما ينفعش دا إنت مشجع أهلاوي ولا مشجع زملكاوي بتخش في هههه
محمد موافى: يعني السؤال يا فندم هل
اللواء/ منصور العيسوي :من الذي حرك هؤلاء هو دا السؤال لابد أن نجد عليه وحنجد هذه الإجابه
محمد موافى: هل هذه الأحداث .. ما هو مين اللي المفترض إنه يجد هل الأمن الوطني هل الأحداث اللي بتجري ديه كلها تقول الناس لإعادة التساؤل بأهمية وجود جهاز أمني يعمل كمراقبة مثل هذه الأشياء ؟
اللواء/ منصور العيسوي : وهو ديه مش محتاجه إجابه أصله هل إحنا مش محتاجين جهاز أمني يؤمن البلد من الداخل هل النهارده مسموح في دوله من الدول أن تترك أمنها الداخلي سداح مداح لكل واحد حضرتك عارف كل الناس اللي بتشتغل في البلاد الأجنبيه مش اللي موجودة في البلاد بتبتدي تعمل تحريات وتعمل عمليات تجسس هل من المنطق أن تترك أمن بلدك سداح مداح لأي حد يعبث به لابد في كل دوله أي مكان تسميه أمن دوله تسميه أمن وطني تسميه أمن عام تسميه أي حاجه إنما لابد أن يكون هناك أمن داخلي – أقسام الشرطه غير مؤهله لهذه المسائل قسم الشرطه مؤهل في السرقه يعمل لك محضر إنما مش مؤهل
محمد موافى: من المهام السابقه لأمن الدولة سابقاً هو متابعة الموال المتدفقه من الخارج الي الداخل أو التحويلات المريبه التحويلات اللي إحنا بنتكلم عليها إحنا بنتكلم علي 181 مليون جنيه خلينا نفترض أن معظمها شرعي وذهب الي جمعيات حقوق إنسان محترمه لكن هناك أموال مشبوهة هل جهاز الأمن الوطني في هذا التوقيت بيعاد فيه تشكيله أو إعادة هيكلته إستطاع أن يراقب هذا؟
اللواء/ منصور العيسوي : ما هو مش بس جهاز الأمن الوطني بس يراقب هذا فيه أجهزه أخري ما إحنا عندنا جهاز ثاني الأموال العامه ودا بيتابع النشاط الإقتصادي بتاع البلد فبالقطع بيتابع مثل هذه الأمور الأمن الوطني آه طبعا من مهمته يبحث عن هذا ويتابعه ويتحري عنه ويعمل تقارير تفصيلية ويبعتها للأمن العام عشان يعمل الإجراء القانوني للضبط دا وضع طبيعي بالنسبه لجهاز الأمن الوطني وأجهزه أخري منها الرقابه الإداريه ومنها الأموال العامه عندنا في جهاز الشرطه فيه حاجات كتيره لازم
محمد موافى: معالي الوزير بعيداً عن السياسه بقه نرجع للأمن ثاني – للأمن الوطني – مباحث الأموال العامه – خلينا نتكلم علي المخدرات الفتره الأخيره اللي سبقت الثوره كان هناك حديث في الجرائد وفي الإعلام وفي الشوارع وفي كل حته إن فعلاً الشرطه كادت أن تقضي علي مخدر الحشيش الآن الدنيا سداح مداح
اللواء/ منصور العيسوي : آه عشان .. أنا حأقول لحضرتك حاجه الفتره بتاعة الثوره طبعاً جهاز الشرطه كله إنشغل في مسائل كثيره جداً رغم إن جهاز الإداره العامه للمخدرات بيتابع هذا النشاط إنما البلد كانت مفتوحه الثوره الليبيه في خلاف فتره من الفترات فتحت الحدود بيننا وبين ليبيا بدأ فيه تهريب كميات كبيره جداً من الأسلحه بدأت فيه كميات كبيره جداً من المخدرات ويعدين خلي بال حضرتك ما حدش يقدر يقول ما فيش دوله في الدنيا مهما كانت إمكانياتها ومهما كانت أنشطتها تستطيع تؤمن حدود التأمين كامل إستحاله ولا حتي الولايات المتحده المريكية ما فيش دوله تستطيع وإنت عندك حدودك الغربيه بتبدأ من البحر الأبيض المتوسط جنوباًَ لغاية لما تخش السودان والتشاد هل تستطيل إنك إنت تؤكد كل هذه الأمور الحدود مفتوحه أنا حأقول لحضرتك يعني إتظبطت في خلال اللي فاتت رغم إن أنا عارف إن فيه كميات كبيره من المخدرات موجودة في البلد وللأسف الشديد بتباع في كثير جداً من المناطق ومع ذلك إنه في خلال الشهور الماضيه تم ضبط أكبر كمية مخدرات في تاريخ مصر يعين في قضيه واحده جايه من بحر الله الأعظم وإشتركت معانا فيها القوات المسلحه إتظبط 8600 كيلو ما حصلتش في تاريخ مصر قضيه ثانيه إتظبطت في البحر الأحمر برضه تقريبا حوالي 3 طن ونصف حاجه زي كده
محمد موافى: السيد وزير الداخلية لما يتكلم عن هذه الكميات ربما ما خفي كان أعظم إحنا بنتكلم عن كميات مهوله من المخدرات وبنتكلم عن كميات الله أعلم بها من السلاح اللواء منصور العيسوي وزير الداخلية كرجل أمن هل خايف من المرحله اللي جايه من الكم الكبير من السلاح اللي دخل البلد
اللواء/ منصور العيسوي : لأ خايف من إيه من إستخدام المواطني لهذه الأسلحه .. طبعا أي بني آدم لازم يخاف إنما عايز أقول لك حاجه إحنا الشعب المصري دا بتحكمه قيم – إنت فاكر إن الشرطه والجيش هم الحاميين البلد إذا كنا بنقول هذا الكلام نبقي واهمين مش صحيح لأن مهما كانت إمكانيات القوات المسلحه ومهما كانت امكانيات الشرطه الداخلية عشان تأمن الداخل هنا حتبقي محدوده الذي يؤمن البلد ده قيم شعبه وأخلاقيات شعبه وأنا ضربت مثلا في كذا مره يعني أنا قلت مره من المرات وأنا كنت مدير أمن الجيزة في سنة 88 – 89 وحصل عطل في محولات الكهرباء بتاعة السد العالي وإنطفت مصركلها 3 أيام ما حصلش سرقه واحده ما حصلش عندنا في الجيزة ولا في البلد كلها رغم لو حصل الكلام ده البلد كلها تتسرق
محمد موافى: لكن دلوقت بيحصل يعني اللي مش حيخاف من القرآن لازم يخاف من السلطان
اللواء/ منصور العيسوي : طبعا إن الله يدعو للسلطان ما لا يدعو حد دا كلام صحيح إنما عايز أقول لسعادتك إنت بتقول خايف لأ مش خايف أنا راجل صعيدي وعندنا السلاح عزوه
محمد موافى: بلاش خايف هل تستطيعون إحتواء كل هذه الكميات
اللواء/ منصور العيسوي : أنا راجل صعيدي والسلاح في بلادنا عايز يشيل سلاح بيبقي أهم من إبنه إنما بيستخدمه كام مره بيستخدم السلاح للبلطجه مش كل مصر بلطجيه فأنا مسألة السلاح طبعا مسألة السلاح لابد أن تنتهي لابد أن تكون هناك إجراءات حاسمه ولابد أن إدارة البحث الجنائي لابد أن تكثف ما إحنا بنكثف بالفعل جهودنا في ظبط السلاح وافسدت إداراتنا كميه لا بأس بها لإن للأسف الشديد تريب السلاح مستمره سواء من الغرب ومن الجنوب بالإضافه للبحر الأحمر طبعاً
محمد موافى: معالي الوزير كلمه أخيره قبل نهاية البرنامج إبتداء من الجمعة القادمه خلينا ندي مسافه من الوقت يعني هل سنجد تعاملاً مختلفاً مع أي فرد يحاول الإعتداء أو إقتحام أو الإقتراب من مقر شُرطي
اللواء/ منصور العيسوي : إن شاء الله
محمد موافى: الظباط معاهم كل
اللواء/ منصور العيسوي : معاهم كل صلاحيات القانون مش محتاج قرار منِّي ولا أنا محتاج قرار من حد لإن القانون بيقول لي إحنا قاعدين بنقول بعد ثورة 25 يناير عايزين دوله يسودها القانون القانون بيتيح مثل ظابط الشرطه وغير ضابط الشرطه بيتيح للمواطن العادي حقه في الدفاع الشرعي حتي لو أقتدي الأمر إستخدام السلاح مش دا قانون العقوبات بتاعنا ولا
محمد موافى: ما هو دا القانون اللي إحنا عارفينه بس نفسنا نشوفه بقه
اللواء/ منصور العيسوي : إذا كان دا حق المواطن العادي فهو بالأولي حق ظابط الشرطه الذي يؤدي عمله في خدمة المواطن
محمد موافى: من لم يفعل ذلك من ضباط الشرطه
اللواء/ منصور العيسوي : حا أحاسبه إنت عندك حق والكلام ده بدأنا فيه من فتره إحنا قلنا فتره من الفترات كان كل شويه السجون بتقتحم وأنا قلت اللي حيقتحم قسم أو حيقتحم سجن لابد أن يحاسب المأمور قبل أن يحاسب الضابط المسؤول
محمد موافى: تمام .. وزير الداخلية السيد اللواء/ منصور العيسوي شكراً جزيلاً كان الله في العون
اللواء/ منصور العيسوي : الله يخليك
محمد موافى: أتمني فعلاً إن إحنا نلاقي كل الكلام ده مطبق علي أرض الواقع بالصوره الحاسمه التي تحتاجها مصر
اللواء/ منصور العيسوي : ونرجوا أن شباب مصر يضع مصر في حبات عنيه
محمد موافى: يارب شباب مصر وبعض شيوخها كمان
اللواء/ منصور العيسوي : لإن البلد ديه كويسه وماتستهلش اللي حصل فيها في خلال نتيجة الإنفلات اللي حصل في الفترات اللي فاتت لابد أن يعود المواطن لوعيه ويعرف إنه البلد ديه تستاهل أكثر من كده تستاهل تبقي في قمة الدول المتقدمه عملية الإنفلات اللي موجود في الشارع وعملية التصرفات اللي مش محسوبه ديه الواحد بيعمل حاجه مش عارف حتوصله لفين يبقي لازم نفكر الأول هل دا في مصلحة بلده ويعمله لو حس إن ده مش في مصلحة بلده لابد أن يتوقف من غير ما حد يقول له
محمد موافى: شكرا جزيلا .. شكراً مشاهدينا أتمني إن نخرج بشيئ من الطمأنين بعد هذا اللقاء إن شاء الله فيه شغل حيحصل في حسم فيه مواجهة فيه شرطه كالتي إعتدنا علي حسمها دون بعض الممارسات اللي في الحقيقه ما كنتش من الكل كانت البعض الأيام اللي جايه إن شاء الله قد تشهد معامله أخري شكل تعامل آخر مع الخارجين عن القانون مع البلطجيه مع محاولي إثارة الشغب مع اللي بين قوسين نحط جوه بين القوسين علامة إستفهام هم مين – من الذي يريد أن لا تستقر هذه البلد التي قال عنها رب العزه عز وجل إدخلوا مصر إن شاء الله آمنين دمتم في رعاية الله وأمنه .