كتب: عبد الفتاح العجمي قالت جهاد التابعي، مؤلفة كتاب "مزة إنبوكس"، أنها تعتبر الرجل الشرقي "مظلوم للغاية ومقهور حتى على الفيس بوك، يعني مثلًا لو راجل كتب على الفيس بوك أنه عنده برد، محدش هيعبره بلايك واحد، لكن لو بنت اللي كتبت هيجيلها 500 لايك و300 وصفة علاج". وأضافت خلال لقائها، اليوم السبت، مع الإعلامي معتز الدمرداش، ببرنامج "مصر الجديدة"، على قناة "الحياة 2": "أنا مش زعلانة على الراجل غير علشان فاكر نفسه سوبر مان، وبيحمل نفسه أكثر من طاقته، علشان ياخد من الست حقوق أكثر من اللي المفروض ياخدها، فهو اللي بيعمل في نفسه كده، وفي الآخر مش بيقدر يوفي، وبالتالي الست مش هتكون راضية عنه". ووجه لها الدمرداش سؤالًا: «طيب إيه اللي يعمله الراجل عشان يجيله 500 -600 لايك على "فيسبوك"، إيه اللي الست بتعمله وهو مبيعملوش؟»، فأجابت: "لأ مفيش، ده حظنا بقى". وتطرقت "التابعي" إلى كتابها "مزة إنبوكس"، وأنها تتحدث فيه عن "التحرش الإلكتروني"، مشيرة إلى أن السيدات ليست فقط من تتعرض للتحرش الإلكتروني ولكن يمكن لرجل شهير أو "أمور" أن يتعرض لذلك، ومن جانبه رد عليه "الدمرداش"، قائلًا: "عارف أنا الحاجات دي، أنا باينلي وقعت ولا إيه؟".
