كلام فى الحب عن احوال الحب فى بلدنا ,مصر كلها فاكره نفسها بتحب مع انى اعتقد ان من 83 مليون مفيش غير 83 انسان حبهم حقيقى وللاسف محدش عارف يفصل بين الحب العادى بتاع العشرة وان الناس كويسه ولطيفه واننا بنحب للحب او لاحتياج اى كان نوعه, واننا بنحب من غير سبب بالرغم من ان اللى بنحبه ممكن يكون ابعد انسان عنا الا انه بيقبى اقرب انسان لقلوبنا وكتير برغم واحشته وعيوبه وجرحه لينا بنفضل نحبه ومبنبقاش عايزين منه اكتر من انه يبقى موجود جنبنا ويا سلام لو متبادل بيكون حته من الجنه مفيهاش اى جرح ,الحب الحقيقى حاجة كبيره اوى عامل زى الخبطه بيجى فجأة من غير ترتيب ولا ليه ميعاد وعلشانه ممكن الناس تضحى بكل حاجة واى حاجة علشان تكمل مع بعض ولو مفيش نصيب وارد ميرتبطوش بحد تانى زى منى كده فى فيلم احمد ومنى و مش موجود فى مصر منه كتير احنا كفايه علينا الصالونات والانتريهات والمواصفات, حب الغالبيه بقى بالطلب عايزاه طويل وشكله مقبول وابن ناس وامكانياته معقوله يعنى مبقاش اقل من بنت طنط فتكات و هو عايزها حلوه عايزاه متدين عايزها بشعر او محجبه ولما يطلع شكل الناس حلو فى عيون بعض يتخطبوا ويحبوا بعض بالعافيه اصله طيب فهحبه والبس الفستان الابيض على فكرة البنات بتحب الفستان اكتر من اى حد دلوقتى ,اما هو فهى حلوه وبنت ناس فميضرش مع ان كلمة للبنات لو العريس كان لقى احسن منك وافقت بيه ولا كان سأل فيكى حتى لو حلف على الميه تبقى ايس كريم ان مفيش غيرك , طيب فكروا كده ما هو لو جابولوا اى عروسة بنفس المواصفات كان وافق انتى مش على راسك ريشة وهو بيدور مش ساكت على نفسه و مش ماشى كده عينيه وقعت عليكى فقلبه وقع منه وجه البيت مغمض العينين لا سأل على اسم العيله ولا مستواها ولا شكلك انتى ولبسك ,الرجالة ناصحة يا بنات الخيابه ديه تخصصنا احنا ولو انى بتكلم على جيلى لكن الجيل الصاعد من البنات شرحه لو كان حد احسن منك عبرها مكنتش بصتلك ولا شفت صالونهم غير مره يتيمه ,المهم بيتجوزوا ويعيشوا حياة مستقره شكلها حلو ومهم اوى يجيبوا كام عيل جميل علشان هى تبقى ام وهو اب و بالنسبه للمشاعر فا بالطلب وهى العيال بتزيد الروابط وبتلخم وتبقى عيشه زى ام الخير , لكن حب حقيقى مفيش لكن حب العيش والملح بيبقى هو الموجود والستات يتفرجوا على مهند ويندبوا حظهم والرجالة نايمه فى العسل ونرجسيتهم محسساهم انهم محصلوش واستحاله المودام تبص لجورج كلونى وتسيبهم واحتمال وارد لو ليه فى التيلفزيون يكون بيتفرج على كليب نانسى مفيش حاجة تيجى كده وهى قاعده على طشت الغسيل وبيقول اادى البنات والا فلا , وانتهت الحكايه بقى العيال تشغلهم الاتنين والشغل والحياة الصعبه تطحنهم وكل واحد فى سره كده يتمنى لو حياته كانت مختلفه ومع انسان يحبه ويعيش معاه قصة حب شبه بتاعه طنطكوا جوليت وانكلكوا روميو بس هيهات بعد ايه ما خلاص بيكون وضاع العمر يا ولاد وللعلم ديه الحقيقة بعد بحث وتنقيب واستعانه بخبرات اشخاص مختلفين البنات بتتجوز علشان اصحابها اتجوزت وخلصت الكليه وهتقعد فاضيه بقى وتلبس الفستان الابيض وتبقى صاحبة بيت وتحس ان فيه حد مهتم بيها والولد بيتجوز علشان عدى سن الرشد وماما نفسها تفرح بيه وهو نفسه برضه فى بيت وولاد ويستقر اكتر علشان ينجح فى شغله لكن لو جينا للاساس هنلاقيه صالون العروسة لطيف وشقة العريس مش بطاله بالنسبة للحب الحقيقى فالله يرحمه لكن حب تحقيق الاحلام فهو وهو فقط المتاح بالاسواق للجنسين وفى الاخر محدش مبسوط اوى البيحب بجد بس هو اللى سعيد بجد لانه راضى باى حاجة من اللى بيحبه مش بيقولوا بصلة المحب خروف والراجل لو حب بجد بيقى ارق من ارق كائن حى مع اللى بيحبها وقبل ما تطلب او حتى تفكر بيكون عمل اللى يسعدها ,كلنا بندور على الحب الحقيقى ومبنلاقيهوش علشان محدش بيضحى ,ولا عايز يضحى ولا حتى بفيمتو ثانيه من عمره علشانه.
