أخيرا و بعد غياب بقا عندنا فيل وحمار في البلد ايوا فيل وحمار وعشان محدش يفهمني غلط أويقول اننى بشتم ولا حاجه الحمار هو رمز الحزب الديموقراطى والفيل الحزب الجمهوري في أمريكا يعنى كل قصدي الرمز ليس الا. اللي حاصل حدانا في البلد هو بداية لحزبين كبار واحد محافظ بقيادة من العداله والحريه والتانى ليبرالى بس مالوش قائد يا عينى و دول انا هبدأ بيهم . فريق الحمار ودا تشكيله أغلبو من الناشئين العدل والمصرىىن الاحرار و كدهوت وبعض العواجيز اللي دورهم عليه كذا علامة استفهام و كتير اوي تعجب. الفريق دا حاسس اننو مش زي الباقيين وأنه حاجه كده هاي كلاس علشان كده دايما تلاقيهم أغلب نقاشتهم في الساقيه والجامعة الأمريكيه. وكده وللأسف الشديد لسه بعاد أو عن الناس قولت هيتعلموا من الاستفتاء ويبدأو ينزلو للناس لكن هيهات بعد ما 77 % قالوا نعم كل اللي توصلوله ان الناس جاهله واضحك عليها!!. طيب ياعم انت و هو الناس اللي بتقولو عليها جاهله دي هيا اللي هتدي أصواتها لمجلس الشعب وانتو كده بتبعدو عنهم أكتر عايزيين تأجلو الانتخابات حتى لو أجلتوها ميت سنه طول مانتو كده عمركو ما هتقربو من الناس طول مانتو بصين للناس من فوق والناس قالت نعم علشان عايزة تعيش حياتها عادى وبسرعه. وعلي فكره الفريق التانى اللي الفيل خايف منه ليس بالقوة التى يتدعيها. وانتوا عندكو ناشئين موهوبين جدا بس لازم يلعبو و الملعب الحقيقي وسط الناس مش فيسبوك ولا تويتر. عيب الفريق القاتل ان كل لاعب فيه بيلعب علي زمايلو كمان عواجيز الفريق في منهم لسه بيلعب للفلول. فريق الفيل قائد الفريق نجم نجومه هو العداله والحريه والفريق يضم حزب الوسط و باقي الفريق ناشئين ليسو موهبين سياسيا خالص الفريق ده قوته قربه من الناس علشان موجود في وسطهم من زمن بس مشاكل الفريق كتير قوي اولها الغرور المبرر احيانا والغير مبرر في كثير من الأحيان يعني لما كسبو 88 عضو في مجلس الشعب رغم التزوير الشديد اعتقدوا ان الناس انتخبتهم علشان بتحبهم رغم ان اصوات كتير راحتلهم كراهيه للحزب الواطي و في غزوة الصناديق اعتقدوا ان ال77 % دول قالو نعم علشانهم وواقع الأمر مش كده خالص. العيب القاتل اللي لو مخدوش بالهم منه هيقضى عليهم هو الجمود الشديد في افكار القيادات الحاليه الا قليلا منهم . طيب دي حاجه حلوه ولا وحشه ان عندنا فريقين كبار طبعا علشان اللي حاصل دلوقتى ممكن تقول وحشه بس أنا شايف انها حاجه حلوه جدا رغم السلبيات الحاليه اللي هيه كتير الحقيقه . الحلو ان ايه ان الفريقين لما ينزلو الملعب بجد هتكون منافسه شديدة وطبعا المستفيد هوالمنتخب مصر يعني كمان احنا كمان هنشوف العاب حلوه يعني اللي هيجيب جون ويصلح التعليم واللي هيجيب جون يزود الأجور.. الصحه.. البطاله ولاحظ ان انا وأنت مش جمهور وبس لأحكام كمان يعنى اللي هيلعب لعبه وحشه نمشيه ونجيب الفريق التاني في أول صندوق انتخاب. اللي حاصل دلوقتي ايه الفريقين سايبين الملعب و اعدين في المدرجات يشتمو بعض ولا سيد عبد الحفيظ و ابراهيم حسن نسيو ان الملعب هو الأساس وان اللي هيلعب كويس هو اللي هيكسب مش اللي هيشتم اكتر اكيد. يا اخواننا يا نجوم مصر انزلو الملعب كل واحد يسيب المدرجات و ينزل الملعب تاني لما اتفقتوا 18 يوم عملتوا منتخب أبهر العالم. مش لما كل واحد يرجع فريقوا تفرجو عليكو العالم كل واحد يلعب أحسن ما عنده والكسبان كلنا لازم نوقف جنبه لو فضلتو في المدرجات فريق تالت هينزل يلعب و يكسب وانتوا لسه في المدرجات بتشتموا بعض و مفيش فريق تالت غير الفلول!.