عشقت القراءة منذ صغرى بفضل ميكى واللى كنت استنى يوم الخميس بفارغ الصبر علشان اشتريها وانا رايح للمدرسة وميكى جيب واللى كانت بتطلع اول خميس من كل شهر وسوبر ميكى اللى كانت بتطلع كل اسبوعين وبعد كده اطورت مع بداية دخولى للاعدادية وبقيت بقرا ألغاز المغامرون الخمسة وعشقتها وبقيت نفسى اعيش فى المعادى علشان اشوفهم واتعلمت ركوب العجل باحتراف علشان لما اقابلهم يرضو انى ادخل المجوعة بتاعتهم كنت من عشاق محب وأخته نوسة وعاطف وأخته لوزة و توفيق صاحبهم اللى تقريبا فى عمرى وهو المخ وطلعو عليه لقب تختخ علشان تخين شوية وكلبه زنجر والشاويش فرقع اللى بيكره تدخلهم فى شئون البوليس والمفتش سامي صاحبهماللى بيقف معاهم ويساعدهم فى الوقت المناسب وكنت اياميها بستغرب اووى ازاى للمجموعة الصغيرة دى اللى تقريبا فى نفس سنى بيشتركو فى مغامرات ضد عصابات وقتله ويحلو ما خفى على البوليس وازاى فى ظابط بقا يعتمد عليهم علشان يعرف يوصل يقبض على المجرمين والجواسيس والقتله وكنت بقعد احاول افكر وارتب المعلومات اللى بيكتشفوها علشان اسبقهم لحل اللغز ده …علشان لما اقابلهم يعرفو اد ايه انا شاطر ؟ وكنت وانا بقراها بقعد لواحدى فى الاوضة وكل تركيزى معاهم واقلب الصفحة وانا مرعوب ان يحصل لهم حاجة ومهداش غير مع القبض على المجرم او العصابة ونجاتهم ساعتها ممكن اخرج من اوضتى وانا فرحان جدا كأنى انا اللى كنت فى احداث اللغز وبدءت اتطور وبقيت بقرأ الشياطين 13 واللى كانت قمة بالنسبالى لانهم بيسافرو ويركبو العربيات ويستعملو المسدسات ويغطسو حاجة كده ولا الخيال كنت من عاشقى احمد اللى من مصر وحبيته الهام اللى من لبنان وعلى نهاية مرحلة الاعدادية اتطورت اكتر وبقيت بقرا تان تان وصديقه كابتن هادوك والبروفيسور برجل ومغامراتهم وكل شوية التطور اكتر وبقيت بقرا ل لاكى لوك ورحت اشتريت بندقية صيد وبدئت اتعلم النيشان على العصافير علشان ابقا سريع زيه بس الحمد لله كنت فاشل جدااا وتقريبا عمرى معرفت اصطاد عصفورة واحدة فقررت انمى الموهبة دى بضرب الازايز فوق سطح بيتنا وبرضه كنت فاشل فسبتنى من موضوع الرماية ده وبدئت اقرا قصص استريكس واوبليكس ورحت على القصر العينى واشتريت قوارير وانابيب اختبار وجرى على العطار اشتريت اى كلام فارغ وبقيت احطهم على بعض على اساسا انى هخترع مزيج القوة (كنت عيل اهبل اووى وتقريبا ما زلت لانى لحد دلوقتى لسه بتاثر جداا بالافلام والقصص وكانت خاتمتى مع قصص ارسين لوبين للكاتب الفرنسى موريس لابلان وعنها قررت ابقى حرامى بس شريف اخد من الاغنيا وادى الفقرا وكان اول عملية سطو ليا على درج اخويا واخذ اللى فيه النصيب ونزلت علشان ادى الفقرا بس وانا ماشى شوفت الراجل اللى بيبيع حبش ايطاليا والصواريخ البيضة والبمب وعنها نسيت موضوع الفقرا ده واشتريت اللى فيه النصيب وللاسف ان ارسين لوبين مكنش بيتقفش بس انا بمجرد دخولى للبيت اخويا جابنى من قفايا وبدء مرحلة الاستجواب وطبعا كان معايا دليل الادانة جبت منين الحاجات دى يا معلم وطبعا معرفتش اجيب دليل النفى فدانى علقة من اللى قلبكم يحبها فقررت عنها اسيبنى من موضوع الحرامى وكان اياميها رمضان وبيتعرض مسلسل رافت الهجان وتتاثرت جداا وتمنيت اشتغل جاسوس لبلدى ونزلت اشتريت قصة صالح مرسى الهجان وقريتها ورحت شارى كل المجموعة بتاعته منها الحفار والصعود الى الهاوية وسامية فهمى ومع الايام بدئت فى ق راءة قصص نجيب محفوظ واحسان عبد القدوس ويوسف ادريس وطه حسين وختمتها بالعبقريات اللى اياميها مكنتش فاهم حاجة منها من كلكعة اللغة عند العقاد : وعشقت القراءة ومازلت حاطط كتب الف ليلة وليلة جنبى على الكومود ومعاها قصص قديمة لارسين لوبين …ياريت بناتى يعرفو يعملو زى