-1- البحر غافلني أنا … وسأل ؟ عن إيدين حبيبتي وعن اللي قاله الموج عن مرايات صوابعها وعن النور الأسود اللي مستخبي بين ضفايرها وعن جبال الكحل اللي بتفنيها المراود عشان خاطر العيون تتجمل وعن البِردْة اللي لبساها لأجل حبيبها اللي راجع من السفر يكتب عليها اللي شافه في البلاد البعيدة يكتب عليها من الأخر…. للأول ..أنا قلت للبحر لما تعدي عليها بلغها سلامي ولفْ ليها عشرين قصيدة شوق في موجك وخد معاك دمي و همي قطرة حب ارميها …. في مزارع القصب وأرمي في ايديها الجميلة سبايك التعب وقول ليها أربطي حزام الصبر اللي حبيبك صانعه من قوس الغمام وحضري …. الشال والطرحة يربط فيهم نور المحبة والسلام -2- أنا لما فتحت شبابيك السفر ودخلتني الغربة .. في مطارح صوتها …. قمحي بتهاجر زقزقات سنابلها لميت شراع التواجد ورميت ….. في سكة الحلم الف عقدة في بحور النور اللي كاتبها ضي القمر …وسألت عني لقتني جنوبي رسم الشمال في عروقي نخل التعود علي المواجع فيا جذور النخل اساقطي وأديني …… من شهوة الحلم الصهيل أنا قلبي مريم اللي اتجوزها القمر وأنتي ….. وانتى نهاية الزمن البتول