يا غية الأحلام ليه حمامك طار؟ مفضلش ورا القضبان غيرك وغيري مسجون وحيد في دايرة النسيان وضلوعك دي قضباني راضي انا بحالي مانا برضه خدامك يا مبعزقة ايامك علي اصحاب الكروش مكروش انا من حضنك الدافي يا ام العيون خضرة قولي للعيال يطيروا البلالين معادش فاضل عيد هنفرح به ولمي الكتب علي بعض لميها وقت المذاكرة انتهي وانا الوحيد خايب ومن طبع القصائد انها بتنعاد وازاي نجدد حرفنا الباهت يا شمس يا شمس يا ام الشعور والنور يا بيضة يا عروسة كان في بذور للامل في كل السطور مغروسه اكلتها ليه السوسه كان حلمي يطلع شجر يفرح غيطان التوت يزين الدنيا ليه الحلم لما انتحر نوره انطفي ف ثانية؟ انا مش حزين ولا شئ انا كنت بطلق ضحكتي اجراس بترعب الحراس صبحت ليه بلا تمن ؟ مين اللي هيؤتمن علي دقة الاجراس ؟ يا مخنصره عمري وموزعاه لأغراب وانا اللي طبعي اغيب في ترتيلك بتشبهيني غراب!!!! دانا ملاحك التايه يا مريمي الطاهرة لو تهزي النخيل هتساقط رطب ولد طايب عاشقك اكتر ما بتعشقي روحك