ف الميكروباص سواق غشيم اعمى مسحوب الرخص ماشي يخبط في الطريق و شمال يمين ياكل مطب ومن لهفته يوصل قوام يرجع ورا تباعه اطرش بصمجي بيوقع الناس ف الحٌفر ولو حد حاول يفهمه بنص عين بيبص له ورا منه ناس ماسكين ابر تنزل تحدف ف الزلط تركب لبط وراجل عجوز لابس له عمة للسما قاعد بيشتم ف الزمن جمب البيان شباب كتافها مخلعة قاعدة بتندغ في اللبان وجمبهم شباب ايديها مشققه رابطين دماغهم م الصداع تتمد ايد وسط الزحام على وسط بنت محجبة لابسه احمر شفتشي ومحندقاة كدة على المقاس جمبها واحدة تخينة وشها احمر طماطم م الكسوف جواها خوف من كل شئ وبنت حلوة مؤدبة لابسه عباية محذقة قاعدة مدارية وشها ومبينه سحر العيون واتنين همج ماسكين سلاح وراجل كبير له دقن واصله للركب في اول مطب العوره بسرعة تبان والكل راكب من زمان ولا حد فاهم لفين بيروح الميكروباص فتنادى مين