1 مطر شاعر أنا وعارف إمتى باكون خايف لو أرمى قلبى حَب يطرح عنقود شفايف يامين يجمع لى قلبى وينادى للمطر ؟ 2 سفر تغرّبيش القمر وما تجرحيش الوتر وحدى ف مطارك أنا وف إيدى شنطة سفر مسموح لى اسافر فى عنيكى ولاّ السفر ممنوع ؟ 3 شجر كان الطريق مفرود كان الزمان بيعود شجر الغنا قال ْ لِكْ وعدك أنا وموعود صدقتى ولاّ خفتى يطلع شجر كداب 4 وردة … وارسم على الفستان وردة بسبع ألوان من صغرى عاشق الورد من صغرى وانا فنان يا هتلرى طيفك … ولاّ سبقنى الوهم ؟ 5 أميرة يا أميرة مسحورة أنا وانتى فى الصورة عصافير بتتهجى والجملة مكسورة أهو دا اللى كان مكتوب ولاّ ابتديت احلم 6 كلام نطق الفؤاد تباريح وانا كان لسانى فصيح فى عنيكى يا ما قريت وفهمت بالتلميح لما حاولت انطقك شرد الكلام ف الفضا 7 ممنوع مين علّق اليافطة وغسلنى بالأثير مين قال الطعم لاذع ريحة الأسوار عبير مين قال ممنوع كلامى يدخل قلب الفقير 8 سندباد وحلمت اكون السندباد وأسافر بالسنين أغنى للناس الغلابة وامسح دموع المقهورين واكتب على جبين الزمان إنى شاعر … كان حزين 9 شاعر عديت على صدر الفضا وسبحت فى الآفاق لا انا كنت ساحر ولا أفّاق أنا كنت شاعر …. وقادر على الضلمة وع الأشواق وبسيفى أكتب على الجدران الحب شجرة بتطرح أمانى وتحدف برتقان لا يوم تخلص مواسمها ولا بتخاصم العشاق 10 كلمة أنا كنت أول بدائى وكنت أول فدائى يطلع من الدهاليز ويواجه الطوفان جبل المعاندة عصمنى ووقفت ع الشطآن أنده على الفراشات وأغنى للإنسان الكلمة تبقى حقيقة الكلمة تفضل بريئة طول ما اللسان قادر ما يكونشى مرة جبان 11 ضحكتين ركبت على ضهر الحصان ورقصت ع المزمار فتحت لى مدن المستحيل ووقفت ع الأسوار ورغم الحدود المخيفة أعلنت إنى الخليفة ورسمت على المدار صورة جيوش الشمس ومواكب النهار يا ضحكتين منوّرين أحضنوا كل الشفايف واسكنوا فى كل دار 12 الليالى الكهف بابه انفتح لما عرفت السر وانقادت المصابيح سألونى تانى البشر وجاوبت بالتلميح ما أصعب المشكلة ما أطول المسألة لكنى كنت فصيح وعرفت اقول السبب سهر الليالى لغة يفهمها كل جريح .
