حكاوى مواطن غلبان2

(2) الدرس ب 100 جنيه والمجموعة ب75 فى مدارس المعصرة الابتدائية
نحن ياحضرات مجموعة من اولياء الامورلتلاميذ فى مراحل التعليم المختلفة فمنا العامل البسيط او الموظف المحدود والذين لايتعدى دخلنا بضع مئات من الجنيهات وكلكم تعرفون ذلك ونحمد الله انه كان فى الماضى يكفينا بالكاد ونسكن فى منطقة المعصرة بحلوان عفانا الله وإياكم من العشوائيات وما بها من اوبئة وأمراض مع إفتقار لأبسط انواع الخدمات ولاسيما النظافة والصحة والتعليم وما ادراك ما التعليم الذى اصبح اكبر الاسباب لإصابتنا بالأمراض آى والله الأمراض . اصبر علية هقولك ايه اللى دخل التعليم فى الامراض!!! لما يكون عندك تلميذ فى المرحلة الابتدائية ومن اول يوم فى الدراسة وانت عارف ازاى جبت المصاريف والملابس والشنط وهى بتدبر إما إنك كنت عامل جمعية او ربنا رزقك باللى يسلفك المهم العيل دخل بالسلامة المدرسة تفاجئ بالأستاذ طالب يقابلك ....ماشى ... تحاول تاخد اجازة من جميع الشغلانات اللى انتى بتشتغلها علشان تقدرتصرف على البيت والاولاد والدروس والعلاجات لأنه مافيش علاجى مجانى وانت مش مشترك فى التأمين الصحى ولولا المستشفيات الخيرية يمكن كنت تموت من قلة الحيلة وعدم امكانيات. تروحلوا مخضوض ليكون الواد عمل عملة او مصيبة تستلزم من المدرس انه يبعتلك ويبدأ الوسواس يشتغلك وانت فى الطريق للمقابلة المنتظرة بس ايه المصيبة اللى يعملها تلميذ فى ابتدائى ودماغك تودى وتجيب وتصاب بأول مرض وهو الصداع من كتر التفكير .وصلت بالسلامة الى المدرسة وبعد ما تتحايل على المدرس مشرف النظام علشان يدخلك تتشرف بلقاء مدرس الولد تلاقيه واقف فى الفصل يدى التلاميذ محاضرة فى الالتزام واحضار ولى الامر للإتفاق على الدروس والدفع مقدما وهو ماسك فى ايده عصا او جلدة وممكن خرطوم لزوم التخويف والوعيد طبعا هتتخض مرة تانى وتترعب وتكون مستعد لقبول ما يمليه عليك من شروط ودة تانى مرض للأعصاب وبعد ان يتجاهل ما وقع على مسامعك من السم الزعاف يبتسم لك ابتسامته الصفراء حتى ينال منك مرادة ....خير يا استاذ حضرتك بعتلى ؟ ايوة بص ياسيد السنادى عندنا درس فى المدرسة ب100جنيه او مجموعة ب75جنية هتختار ايه؟ ينهار ينهار الرحمة يا استاذ .... أنت حر لو مش عايز ماتسألنيش عن النتيجة أوملف الإنجاز ؟ ايه الملف دا كمان ؟ دا ملف يوضع فيه نشاط التلميذ ودرجاتة وبصراحة ابنك مستواه ضعيف جدا وممكن آخر السنة يسقط ... ياخبر ابيض مستقبل الواد هيضيع أمال انا شقيان ليه ومن شغلانة لشغلانة مش علشان العيال .طيب ياأستاذ النهائى ايه ؟ يكشر لك عن انيابه احنا هنفاصل ولا ايه ياسيد دة آخر كلام واختار الآن ؟ علشان اللى هتختارة هتدفع قيمتة .. دلوقتى ؟ آه الدفع مقدما ياسيد ...طيب سيبنى ابعتلك بعد يومين ربنا يدبرها من عنده ؟ ياريت ما تتأخرش علشان انت عارف الظروف وغلاء الاسعار وكأنك لست منكوى مما يقول بجانب اكتواءك منه شخصيا وآدى كمان مرض الضغط على شوية سكروربنا يستر علينا وعليك ....عرفت بقى ايه علاقة التعليم بالأمراض ولا نقول كمان
حكاية واقعية من مدرسة عمار بن ياسرالإبتدائية بمنطقة الهجانة – المعصرة
وغدا حكاية جديدة