جوايا ملخبط ع الاخر ودماغى تقول مخزن خردة أنا عايز حد يرتبنى شجرة احلامى اللى فروعها هربت ف اماكن ممنوعة انا نفسى بجد اقصقصها واعدل عقلى عشان يعجب ارجع لطفولتى المسروقة اتنطط والعب على كيفى وغيطان الفرح الممدودة تبقى لى برااااح واحد وبيلعب ولا همه لو خرب الكون قدام منه بينام مرتاح ما أناعقلى صغير على قده أبيض م الصينى فى ايد شاطرة متعقم عقلى ميتن مرة ولا فيه جراثيم ولا متلوث بقضايا الناس التعبانة ورغيف العيش المتبهدل والمية الزفت بنشربها ولاكان ياما كان جوا بلدنا العدل اتقطع خرطومه مش واصل ابدا للفقرا والناس هتموت علشان نقطة انا طافش زيك من همى وبفرمل مخى لو تحرك ايه يعمل عقلك ف الحاصل مجانين لونسكت ونطاطى مجانين لوقلنالكو كفاية طب ايه يرضيكم يا سيادنا مربوطة خشومنا ومن بدرى مفتوحة عيوننا على العتمة ولا صبحنا طالع جوانا ولا حقنا راجع بالساهل يا مسافر على بكرة لوحدك خد ايدى ف ايدك لو تقدر وانا وانت هنوصل للمطلوب عبدالصبور السايح Egypt عضو إتحاد كتاب مصر