البنت " ميناتى هاتو " بنت هندية إنما أيه ياحمار جميلة قوى ... تقولشي بنت مهراجا هندى ....عينان سوداء واسعة كعيون المها، صفاء مقلتها كصفاء السما . هيفاءُ فاتنةَ القوام. وثغرٌ فاتنٌ من غير "روجٍ" ومابتحطش على شعرها "الزٌنجٌفر" - هأ ها .. هأ ..هههههه - أيه بقى .. هههه .. دى ياحمار؟ - اصلك يافرشوطى افندى عليك كلام يموت من الضحك " طيب " ميناتى هاتو " هندية وجميلة . وثغرٌ فاتنٌ وعرفناها ... إنما ايه "الزٌنجٌفر" ده ؟ - صحيح أنت حمار ... اصبر ... ماهو "الزٌنجٌفر" ده هو الدليل على إن " ميناتى هاتو " لسه عذراء ... - "قال الحمارهامساً: واللهى ما انا فاهم حاجة " بعد لحظه: ايوه... ايوه .. يعنى اللى لسه عندها "الزٌنجٌفر" ده تبقى عذراء؟ - لق ياحمار "الزٌنجٌفر" ده صبغة حمراء اللى بتشوف نسوان الهند يحطوة على فرق الشعر واسمه الفيرميليون "ولما تشوف واحدة هندية صبغه مفرق شعرها تعرف ان المرأة دى متزوجة وزوجها حي . - ايوه ... ياحلاوة ياولاد.. فرشوطى باشا حايتجوز بنت مهراجا ما بتستعملشى "الزٌنجٌفر". وتلاقى بقى البنت " ميناتى هاتو " دى وقعت فى غرامك وظنت انك " شاروخان " الوطن العربي ولا "شاهيد كابور" . - ياريت يحمار .... - قال الحمار صارخا ... انت حتجننى امال ايه حكاية البنت " ميناتى هاتو " دى. - البنت " ميناتى هاتو " دى ياحمار صعبانه عليا قوى ... لإنها وقعت فى غرام شاب وسيم اسمه " سيتاكانت روتراي " - والنبي "ميناتو هاتى" دى بنت خايبه قوى... بقى تسيب المهيب الركن فرشوطى على سنه ورمح ... وتقع فى غرام ... "ستى كنت دى" ... يكونشي بيعفر سجاير كنت زيك علشان كده بقى ستى كنت ؟ - ياحمار ماتربسي مخك قوى كده .. ستك ايه وعمتك ايه.. إسمه " سيتاكانت روتراي " واد حليوه ومسبسب الشعرتين. وعذب اللسان و غاية فى الأدب والتهذيب والرقة".. اتقدم لخطبتها. أهلها وفقوا على طول .بعد ما نال إعجاب الجميع. - بسرعة كده؟ وبدون خاطبة تشوف كعوب رجليها وشعرها وتتقصي عليه ان كان له فى الزواج ولا لق ... وان كان عنده شقه وعربية ونيش ... ومروحه وغسالة بالكهرباء و...و...... - بس ... بس... اسكت ... انت مفكر إنهم شكلنا ؟ - طبعا .. ويمكن أصعب بكتير دول هنود يافرشوطى افندى. - لا ياحمار دول عكسنا خالص... لما " الواد "سيتاكانت" أثار إعجابها وإعجاب كل أقاربها وبحسب العادات المتبعة هناك عند البلد الذي تنتمي لها الفتاة الهندية كان يجب على عائلتها تقديم المهر للعريس. - يعنى يا استاذ فرشوطى أهل " ميناتى " هما اللى إدوا المهر للواد الحليوة "سيتاكانت" ياحلاوة ياولاد والمهر ده كان عبارة عن ايه؟ - حاجات بسيطة ياحمار سيارة .. وصيغة كلها دهب، وكمان حصل من عائلة عروسه على مبلغ نقدي قدره 600 دولار أمريكي. - ياناس ياهوه ... جاااااااى ...." شلت الحمار وفر مسرعا يعدو وهو يغنى بدنا نتجوزعلى العيد من الهند وبكره نلبس الجديد ... انا رايح الهند." - جريت وراه لحد ما نفسي انقطع وفى الأخر مسكته وانا اقول له اصبر شوف اللى جري. - نظر الحمار لى وقال هامسا ... يبقى الواد الحليوة "سيتاكانت" اكتشف ان البنت " ميناتى هاتو " صبغة شعرها بالبتاع اللى اسمه "الزٌنجٌفر" ده. - مش كدا ياحدق - قال : يبقى الواد الحليوة "سيتاكانت" هو اللى صبغ الفلقة بالزٌنجٌفر. - ياريت ... بعد سنة واكتر بدأت الشكوك تساور " ميناتي " - ازاى بقى ؟ - الواد الهندى الحلو قعد يضحك على البنت الحلوة " ميناتي " بحجة الدين . - وصدقته ازاى ؟ ياعينى يا ميناتى ... ماكنشي يومك يا اختى ياصبره على المر واللبان الدكر الهندى يا اختى. بس قوللى يافرشوطى باشا الواد اقنعها ازاى بالدين؟ - فى البداية قال لها انه لن يجامعها ومش حا يكون بينهما أي تواصل ذو طابع جنسي، واتحجج بأنه قطع على نفسه عهداً دينياً يحرم عليه بموجبه مضاجعة أي من النساء حتى لو كانت زوجته. - وفضلت ياعينى البنت " ميناتي " متجوزة المخدة وصابرة اكتر من سنه .... ومشكتش فيه ولا مرة ..؟ - لق شكت وقررت بعد ما داخت ان تحسم الأمر. فانتهزت الفرصة وخلت عمك "سيتاكانت" بيستحم ودخلت عليه. - اووبا ... واكتشفت المصيبة .ان معاه واحده تانية فى الحمام. - لا ياحمار اكتشفت ان الشاب الوسيم زوجها "سيتاكانت".. امرأة.! فرشوطى محمد صحفى مصري ساخر للتواصل معه على الفيسبوك http://www.facebook.com/farshoutye