سيداتى انساتى سادتى نذيع لحضراتكم مباراة الزمن اللى احنا فيه من استاد الحياة اليومية لو قاعد فى الدنيا يبقى اكيد هتشوفها وهى بتاخد احبابنا من وسطنا ومبيهمهاش حد وحسيت معنى الفراق ولو كنت معانا ورحلت عننا يبقى الف رحمة عليك ولو كنت لسه متولدتش وبقيت وسطنا ياريتك ما كنت جيت - اصل الاستاد زحمة ع الاخر من الجماهير وتبدء المباراة عقارب الساعة تتحرك ويبدء الزمن - الثوانى بتفوت ثانية ورا التانية ورا التالتة وتعدى بسرعة جدا الله الله ده محدش حس بيها وتعدى الثوانى وتخش ع الدقايق اه خلاص دخلنا فى الدقيقة الاولى اللى بتفوت بعدها دقيقة تانية وتعدى دقايق وتفوت بلحظات فرح ولحظات موت - وشايف الدقايق بتخلص وبنخش فى الساعات وافتكر اغنية صباح ساعات ساعات - بس فى ساعة حلوة لما تمر وساعة وحشة بطعم المر- اه خلاص الساعة الاولى عدت ودخلنا فى التانية يعنى ممكن تلاقى ناس سابت الدنيا وتلاقى غيرهم لسه مشفوش الدنيا - والمباراة خدت الرتم السريع والساعات بتعدى بسرعة جدا وقربت تخلص على اليوم يعنى الليل هيخش عليها وفعلا دخل الليل وقطع اليوم وخلى ناس فى البيوت نايمين وناس تحت الكبارى مدارين - وعدى اليوم الاول الله ع السرعة ووراه التانى وتلاقى الايام بتجرى بتجرى يا سلام ع السرعة ونخش فى الاسبوع اللى خد الايام كلها وجمعها وبصاها للشهر - والشهر ياخد الدقايق والساعات والايام ويمررها للسنة اللى بتاخدهم وتجرى بيهم والسنة تعدى وتجرى سنة ورا سنة يا سلام على الاداء الراقى ده المباراة بتجرى بسرعة جدا - ايه ده انا شايف كل شوية كابتن يخرج ويسلم الشارة لحد تانى - وبعد ما كنا بنحسبها بالثانية بقت بالسنين وفى لحظة يخش القدر يهجم ويقطع المباراة ونلاقى الجماهيربتودع الزمن وبتبقى ذكريات
