"إنما للصبر حدود"، أغنية الست المشهورة وأكيد كلنا نعرفها، بس في مواقف كتيرة أوي بتمر علينا وبنقابلها في حياتنا بتحتاج مننا إننا نشيل حدود الصبر؛ وأحيانا ده بيكون بمزاجنا أو غصب عنا. فلو دور كل واحد فينا جوا حياته هيلاقي الشخص أو الحاجة اللي صابر عليها صبر السنين وبيوجد لنفسه ألف عذر يصبره عليها.
تقول تسنيم محمود، طالبة بكلية الآثار جامعة القاهرة، "أخويا يمكن بصبر على أفعاله برغم إنه مطلع عيني، علشان ده أخويا ومن لحمى ودمى ولازم أستحمله مهما حصل". ويؤكد محمد فوزي، طالب بكلية التجارة جامعة بنها، "أكتر إنسان صبرت عليه هو نفسي، بعمل حاجات كتير غلط وضميري دايما بيأنبني وبصبر على نفسي كتير، علشان لو مصبرتش عليها، هكره نفسي". وتؤكد تغريد ممدوح، طالبة بكلية الإعلام جامعة القاهرة،" صاحبتي من أيام ثانوي، وليه دي بقى لأن العشرة مش بتهون إلا على ولاد الحرام وهي غالية عندي أوي برضو".
ويوضح عبد الرحمن سامي، طالب بكلية التجارة جامعة بنها، "هو مش إنسان، بس فعلا أكتر حاجة صبرت عليها هي الأيام اللي بعيشها، عشان عندي أمل في ربنا كبير". ويشير عمرو أحمد، طالب بكلية الإعلام جامعة القاهرة،" حبيبتي علشان هي الانسانة اللي بحبها ومليش غيرها، ونفسي أقضى بقية عمري معاها، فلازم أصبر عليها ومخسرهاش". ويرى سامح محمد، طالب بكلية الهندسة جامعة المنوفية، "أكتر إنسان صبرت عليه واحد صاحبي عزيز عليا أوي زى أخويا كدا، وده لأني بحبه أولاً وثانيا واجبي عليه كصديق إنى أستحمله".
وتؤكد نجوى خالد طالبة، بكلية الإعلام جامعة 6 أكتوبر، "صبرت على أصحابي علشان مش عايزة أخسرهم وأنا بحبهم ولو عملوا حاجة تزعلني مش بزعل وبعديها بتفهم الموضوع كويس جدا وبتأني، علشان هما كل حياتي وما أقدرش أستغني عنهم". ويقول محمد عيسى، طالب بكلية الصيدلة جامعة الزقازيق، "واحد صاحبي هو أكتر واحد صبرت عليه ، علشان صاحبي وعشرة عمر وأنا بعزه أوي". بينما تؤكد هبة رأفت، طالبة بكلية الآداب جامعة عين شمس، "أكتر إنسان صبرت عليه كان أنا، وصبرت لأن في حاجات كتير فيا ماكنتش عجباني وكان لازم أغيرها، ففضلت ورا نفسي لحد ما غيرتها".
ويشير بلال محمود، طالب بكلية الحقوق جامعة المنوفية، إلى أن والده هو أكثر إنسان صبر عليه، قائلا:" أكتر حد صبرت عليه بابا وصبرت عليه لأنه أبويا وكان لازم أستحمله لأنه كان مريض بالسرطان، وصبرت على مرضه كتير والحمد لله ربنا شفاه". ويشير حسام سعد، طالب بكلية التجارة جامعة عين شمس، "أكتر إنسان صبرت عليه هو جاري لأنه أصلا شخص مزعج جدا ودايما بيعمل دوشة، ومش بيراعي إن في جيران ساكنين جنبه أبدا، ودي حاجة بتضايقني جدا وبابا وجيران كتير كلموه كذا مرة يوطي الصوت عنده، لكن هو ودن من طين وودن من عجين ولا بيعمل لحد حساب أبدا، فهعمل إيه مضطر أصبر عليه للأسف".