علي المقهي ابتسم الرجل ونظر للجالس علي المنضدة المجاورة وسأله: منين الجرايد دي؟ - دي مش جرايد، دي صور للجرايد القديمة. بتتباع؟ - لا لكن أنا رحت صورتها من دار الكتب صورت النهاردة ثلاث صحف. الأهرام الأخبار والمصري. المصري اليوم؟ - لا المصري زمان بتاعة الوفد. بس دي قديمة قوي؟ - آه جرايد سنة 1950. كان فيه حاجة مهمة يعني وألا أنت غاوي؟ - فيه أحداث كثيرة بس أنا سمعت من جدي وكان بيحب الصحف أوي أن زمان ما كانش فيه حد في الجرايد بيكتب ويقول فيه في مصر مسلم وقبطي. ياه جدك لسه عايش؟ - لا طبعا بس سمعته سنة 90 وكان عندي عشرين سنة. حببت تتأكد يعني؟ - أنا متأكد جدي ما بكذبش. بس حبيت أشوف وأقرأ الكتاب بتوع الزمان ده. - العقاد يعني وطه حسين. - وإبراهيم المصري ولطفي السيد ومحمد حسين هيكل وأحمد أمين وكتير من الأسماء المشهورة. طيب أنت مصدق جدك ليه بأه تاعب نفسك كده؟ تروح دار الكتب وتصور جرايد وتدفع فلوس؟ - أصل بصراحة رهقت من الزمن ده. وحاخدها من سنة خمسين لورا. زي رواية آلة الزمن عارفها حضرتك؟ - عارفها طبعا بس دي كمان البطل بتاعها بيطلع قدام. لا أنا مش حاطلع قدام عارف ليه؟ - ليه؟ لأنني مش عايز أشوف مصر خربانة. خربانة؟ معقول؟ - طول ما فيه ناس متصورة أنها بتدافع عن الإسلام بالاعتداء علي الأقباط تنتظر إيه غير الخراب. - معاك حق. - وكمان الموضوع كبر أوي ودخلت فيه القاعدة. طبعا عرفت بالمدبحة اللي عملوها في العراق للمسيحيين. - حاجة مخزنة جدا. - يعني حتي ما خجلوش ما اسم الكنيسة اللي هو علي اسم ستنا مريم اللي ربنا اصطفاها وطهرها علي نساء العالمين. عارف ليه ربنا عمل كده؟ ليه؟ -علشان تولد سيدنا عيسي ويهدي الناس للمسيحية. صعبة دي؟ - لا لكن حتقول لمين. بس دا مش حل برضه لأن أنت لما تعمل كده مش حتحل المشكلة. - حاحلها لنفسي علي الأقل. حاعود روحي علي الحياة زمان ويمكن كما ألبس لبس زمان. طيب وحتعمل إيه في الأسعار؟ - ولا حاجة طبعا لأنها حتكون أرخص. - بس حتعمل مشاكل لنفسك. يعني حتشتري العشر بيضات بقرش صاغ وكل ما ترجع ورا تلاقيها أرخص والبياعين حتعتبرك مجنون لما تشتري وتدفع بأسعار زمان. - زي بعضه ما أنا أصلا حاتجنن. - متهيألي بعد كام يوم كده حترجع في كلامك بص. أحنا لازم نشوف حل تاني. عندك حل؟ - نطلب مثلا من نقابة الصحفيين تمنع نشر أي مساجلات بين المسلمين والأقباط. وحيوافقوا؟ - لازم. ونطلب منهم عدم نشر أي خبر عن حد أسلم ولا استنصر. - أبقي قابلني. ياه للدرجة دي أنت متشائم؟ - يا عم دي ناس بيقولوا عليهم مشايخ ومفكرين وكل واحد عمال يصرخ ويسب في ملة القبط وكلهم صحتهم زي الفل. مجوزين اثنين وتلاتة وأربعة وفلوس بتنزل عليهم زي الرز من برة وفيهم كمان الكافر بينه وبين نفسه بس أهي سبوبة لما خربوا البلد. - البلد لسة بخير أرجوك ما تكبرهاش. - شوف أنا رحت أركن عربيتي في الشارع القريب ده لاقيت ممنوع الركن علشان فيه كنيسة. - طبيعي بعد البيان البشع بتاع القاعدة. - طيب وبعدين. لو حد بأه مسيحي فجر جامع برة مش هنا، زي اللي حصل في العراق، حيمنعوا الركن جنب الجوامع كمان. وبعدين يفصلوا في السكن بين المسلمين والأقباط وبعين في الأحياء وبعدين نبقي دولة طائفية. هو ده البرنامج. تفتكر الجرايد اللي شعللتها في مصر والكتاب اللي بتقول عليهم دول ممكن يدخلوا في مؤامرة زي دي؟ - بص أنا ريحت دماغي ورحت لجرايد زمان علي الأقل كان فيها كتاب بصحيح. وبعدين أنت خلتني رجعت لهنا. أرجوك حتشوفني هنا كل يوم وإذا سألتني تاني حا غير القهوة.. ممكن لو حبيت تقرأ معايا. - بصراحة أنا نفسي أنا كمان. يمكن دا يكون حل.
