جملة رهيييييبة كل ما بسمعها وانا باتفرج علي فيلم من افلام التلاتينات والاربعينات والخمسينات بأعاااااااايط مش عارف ليه افتكرت الجملة دي تحديدا وانا رايح احضر حفل ختام مهرجان مسرح الشباب للمسرح الفقير واللي اقيم علي خشبة مسرح العرايس ووزع فيها اشرف زكي رئيس قطاع الانتاج الثقافي والبيت الفني للمسرح والمخرج هشام عطوة مدير مسرح الشباب إبان وقت المهرجان (حلوة ابان دي ؟) لانه بعد ما عمل مهرجان المسرح الفقير وكرم كل مديري مسرح الشباب السابقين ربنا كرمه وقاموا مكرمينه هو راخر ورقوه مديرا لمسرح الطليعة ويومها وزع مع الدكتور اشرف جوايز المهرجان اللي قررتها لجنة تحكيم رائعة برئاسة - سيد خطاب ادت جوايز لمجموعة من الشباب المتحمس... وقد ايه كانت سعادتي لما دخلت مسرح العرايس وشفت شباب المعهد مع شباب مركز الابداع مع شباب الجامعات مع شباب ساقية الصاوي مع شباب الهناجر في مكان واحد.. كان عيد بجد.. كل مجموعة جاية من مكانها تبارك وتشارك مع المجموعات الاخري في عروضها وكلهم في شوق للنتايج وما اروع صرخات النصر اللي تهز المشاعر وتسور الودان في ان واحد.. يعني تسمعها عينك تدمع م الفرحة وفي نفس الوقت تطلب فيزيتا لدكتور انف واذن وحنجرة علشان تتطمن عالطبلة... طبلة ودنك طبعا... بالاضافة لنوعية التصفيق والهتاف المبتكر للمنتج الثقافي الوقور (اللي هو المسرح) والذي يشبه التشجيع في الدرجة التالتة ف ماتشات جمهورية شبين مع السنبلاوين من عينة (هاملت هاملت اوعي يجيلك هاملت) او (حمدي حمدي اوه اوه) كان ناقص يزغرتوا ويرشوا ملح ...انما الديفوهين الصغيرين دول مش ف العضم ... الشاسيه الحمد لله سليم والمهرجان الشبابي الجميل عدي لبر الامان مع هشام عطوة واكيد الدورة الجاية مع شادي سرور مدير مسرح الشباب الجديد هتكون احسن واحسن ... ووسط الدوشة المحببة للنفس دي كانوا الكبار اشرف زكي ومحمد العدل ويسري حسان وطارق مهران ونادر صلاح الدين ونشوي مصطفي وعاطف عوض وصبحي السيد وجمال ياقوت وهشام عطوة واقفين ف وسط الشباب في منتهي السعادة بيهنوهم بجوايزهم وبيوجهوهم للصح وبيحذروهم من الاخطاء سمعت صوت فردوس محمد الله يرحمها ( اجمل ام ف السينما المصرية) ... بتهمس جنبي... (اللي جابلك يخليلك) وسمعت عم صلاح جاهين بيضحك من بعيد ويشاورلي ويقول ( صحيح اللي الف ماماتش ) الخليط الغريب من الشبا ب اللي خرجوا من ولاد د فوزي فهمي من التجريبي (وانا من ولاده دول) علي ولاد - هدي وصفي م الهناجر علي ولاد - سامح مهران من الاكاديمية علي ولادي من مركز الابداع حاجة بديعة تخليك تقول ... الله ؟ الناس دي كلها طلعت منين ؟ امتي؟ المهرجان ده طلع منين ؟ اقولكم ... يا سادة ... النشاط يولد نشاط والكسل الرهيب يولد كسل رهييييب... قووووم لما ينور التجريبي يحرك المسرحيين المصريين ويثير غيرتهم علي فنهم فيطلبوا مهرجان يتنافسوا فيه داخليا لاختيار الافضل فيطلع القومي يقوم القومي يحرك المياه الراكدة والكل يصبح بيستعدله ولجوايزه من السنة للسنة يقوم الشباب يتحركوا يقوووووم مسرح الشباب يعمل مهرجان يجمع فيه الشباب تقووووووم طاقة الشباب تثير غيرة المسارح الاخري فيعملوا المهرجان الكوميدي او لقاء الضحك الاول واراهنكم انه بعد مهرجان الضحك هايطلع مهرجان الطفل والعرايس والتراث وهكذا النشاط يولد نشاط وابوس ايد حضرات الاخوة بتوع الاحباط ...الاخوة ام كتاف طالعة فوق وحاجب شمال ارتفاع عشرة سنتي اللي غاويين يحبطوا اي فرحة ف العالم ويجوا ف لحظة حراك حقيقي .. ويحطوا رجل علي رجل وتسمع احلي (هاااااا ... هو ده مسرح ده ؟ بلد مهرجانااااات صحيح ) ومالها يا سيدي المهرجانات ... اللي بتلم الموهوبين وتقيمهم وتحكم شغلهم وتمنحهم التقدير المطلوب اللي يدفعهم للامام او لمراجعة النفس. نشوف الفايدة من وراها ... كام نجم جديد بيطلع من ورا اللقاءات والمهرجانات دي والله حتي لو واحد نبقي كسبانين ... انا شخصيا الحلم بتاعي ف مركز الابداع ابتديت اشوف ثماره منورة الافلام والمسلسلات والمسرحيات ... الهناجر شايف ولاده نجوم ف مصر ... الاكاديمية نفس الكلام ..التجريبي ..شرحه ...القومي ...اخوه .. يعني بسم الله ماشاء الله الناس دي طلعت من الهناجر والابداع والتجريبي والقومي والاكاديمية ؟ فرحت... عنيا دمعت... لمحت طيف فردوس محمد بيمر من جنبي تاني شافت دموع الفرح طبطبت علي كتفي ومصمصت شفايفها ولسه هاتقوللي (اللي جابلك يخليلك) شاورتلها علي راجل قاعد علي كرسي بعيد وبيرسم بهدوء وهو بيفكر وقلتلها... شايفة الراجل اللي هناك ده... هو ده اللي يستاهل تقوليهاله... دول كلهم ولاد ولاده... فاروق حسني.
