شهد الرئيس عبدالفتاح السيسى أمس، افتتاح عدد من المشروعات القومية الجديدة فى محافظة أسوان، ضمن أسبوع الصعيد، بحضور الدكتور مصطفى مدبولى رئيس الوزراء وعدد من الوزراء والمسئولين. وافتتح الرئيس عبدالفتاح السيسى مصنع كيما 2، مصنع اليوريا ونترات الأمونيا بمنطقة كيما بمحافظة أسوان، وقام الرئيس بجولة تفقدية بالمصنع، كما تفقد محطة سكك حديد أسوان، حيث شهد تدشين الوحدات المتحركة الجديدة بمختلف أنواعها من قاطرات وعربات السكك الحديدية، وكذلك افتتح مدينة أسوان الجديدة وتفقد كورنيش المدينة ومنطقة الإسكان والفيلات. وشاهد الرئيس السيسى، فيلمًا تسجيليًا بعنوان: «قلاع صناعية»، عن المصانع الجديدة التى تنفذها الدولة المصرية فى إطار خطة التنمية الشاملة، كما شاهد الرئيس، بثًا مباشرًا لاصطفاف القطارات الجديدة فى محطة رمسيس بالقاهرة.
الشركات الجديدة
وفى كلمته هنأ الرئيس عبدالفتاح السيسى، الحكومة وقطاع الأعمال على افتتاح مصنع كيما ومحلج الفيوم المتطور، وقال: « أهنيكم، قطاع الأعمال والحكومة على المشروع ده والافتتاحات سواء مصنع كيما أومحلج الفيوم، ويمكن فى المناسبات الجميلة دى نقول كلام جميل». وأضاف الرئيس السيسى: «مش هنسى شاب قال لى مصنع كيما بيرمى مخلفات فى النيل وعملوا حاجة علشان الريحة متطلعش.. وخدناه وروحنا وقولناله إحنا شغالين فى ده وهنعمله». وقال الرئيس: «الوزير بيقول بعنا الأرض علشان ناخد قروض.. بعنا الأراضى علشان ده ونجيب جزء من الفلوس.. مش عاوزين نرجع تانى للخراب، والمصنع ده بعد شوية يرجع يتدهور تانى، فى 3 حاجات التسعير والإدارة والحوكمة بنعمل إجراء علشان نحقق التسعير علشان يبقى سعر مناسب للزراعة فى مصر». وأضاف الرئيس السيسي: «الطن كان بتمن ودلوقتى بتمن تانى، نتيجة السنتين اللى فاتوا.. وبالتالى عاوز تصدر وعاوز احتياجات السوق والأسعار فى السوق مدعومة والسعر وصل إلى تلت السعر اللى فى العالم». وأوضح الرئيس: «التسعير محتاج دايما إزاى نحل فيه وهقول للمزارعين ووزارة الزراعة يا جماعة نظم الرى والزراعة الحديثة الزراعة تخلى كمية الأسمدة المستخدمة أقل بنسبة 50 أو 40 % بدل ما تشترى شيكارتين تشترى واحدة».
أحداث 2011
وتحدث الرئيس عبدالفتاح السيسى، عن أوضاع الدولة المصرية فى الماضى، قائلًا: «لن أنسى عام 2011، والمفروض يا مصريين مش تنسوا العام ده.. اللى أنقذكم ربنا وحده..وربنا اللى أنقذ البلد دى من مصاير الخراب والدمار.. ولأجل خاطر ال 100 مليون مصرى». وأضاف الرئيس السيسي: «ربنا أنقذ البلد دى علشان البسطاء والغلابة.. لحكمة إلهية وربنا أنقذها.. وهل هنكرر نفس المسار تانى.. لا طبعًا.. الكلام ده لو هيزعلكم أنا هاجى عليكم.. علشان خايف على البلد..مش تزعل إلا على نفسك وإنك ممكن تكون سبب فى دمار بلدك وخرابها».
المصانع الجديدة
وأكد الرئيس ضرورة توافر عناصر النجاح للمصانع الجديدة بشكل كامل، قائلًا: «أنا عاوز فرص نجاح للمصانع والشركات الجديدة منعًا لتكرار اللى فات، متابعًا: «أى مستثمر أو قطاع خاص لما بيعمل مصنع جديد مش بيكون عنده مشكلة فى تحديث العمل داخل المصنع ده.. لأنه قاعد بيدير صح.. الإدارة الجديدة مفيش فيها خواطر.. مش هعين حد فى المصنع ملوش لازمة.. علشان قريبى أو معرفتى أو كلام من هذا القبيل». وأضاف: «القطاع الخاص شريك معانا.. هيدفع ويبقى معانا.. بتوع قطاع الأعمال هيزعلوا منى.. أنا بتكلم فى مصلحة أكبر.. بتكلم فى مصلحة البلد.. إنها تعيش وتكبر.. البلد تعيش وتكبر وتبقى المصانع عبارة عن أداة فى الاقتصاد ورفاهية المجتمع.. وده مش هيحصل إلا لما تبقى منضبط فى التعيين والتشغيل».
القطاع الخاص
وأكد الرئيس السيسى، إن الدولة المصرية ترحب بالقطاع الخاص، قائلًا: «القطاع الخاص عاوز يتفضل معانا فى المصانع والمشروعات الجديدة يتفضل.. وده كلام بقوله لرابع مرة.. أهلًا وسهلًا بالقطاع الخاص.. إحنا محتاجين القطاع الخاص معانا.. إحنا أثبتنا إننا غير أكفاء فى الإدارة على مدار 40 سنة اللى فاتوا.. ده عيب، عيب الاستمرار على نفس المسار والاقتراض علشان التطوير.. وبعد شوية أنا مش هكون موجود، والوزير كمان مش هيكون موجود والمصانع دى تتدهور تانى لأن منظومة الأداء نتائجها الحقيقية حاجة غير مطمئنة». وأضاف: «الحوكمة.. كل قرش بيتصرف فى المصانع دى وكل لمبة شغالة.. بقول كل قرش.. ولو حطينا فى دماغنا.. الحملة اللى بتنقل العمالة جزء من الحوكمة.. هنقول منين.. القطاع الخاص بيعمل كده.. والوزير هشام أكثر واحد شوفته فى قطاع الأعمال حريص على الإصلاح.. مش أنت جيت قولتلى الناس بنت على أراضى قطاع الأعمال فلل وشاليهات وبيوت يا دكتور مصطفى.. كل مصنع كان موجود له حتة أرض زيادة.. ونعمل جمعية وبنبى مساكن للعمال وماله.. ولكن كل حاجة لازم تكون بحساب.. ده مش تكون الكهرباء والمياه والغاز على الشركة.. مش مندهشين ومستغربين.. عرفتوا ليه بلدكم كانت هتروح فى 2011.. وكانت هتتخرب وتضيع وأنا بتكلم ليه علشان البلد».
دعم العمالة
أكد الرئيس عبدالفتاح السيسى، أن الدولة المصرية تسعى للحفاظ على العمالة خلال عملية الإصلاح فى قطاع الأعمال، قائلًا: «كل النقاش فى عملية الإصلاح فى قطاع الأعمال شايفين العمالة والحفاظ على حقوقها.. وبنحاول نعمل إصلاح.. كل إجراء للتصويب والإصلاح لا يمكن يكون على حساب العمال». وأضاف: «العامل ملوش ذنب فى عملية الإصلاح، وبالتالى مفيش إجراء بيتم إلا وبنأكد الحفاظ على حقوق العمال، والدولة فقط تتحمل التكلفة ومش العامل، فالإصلاح لن يكون على حساب حقوق العمال». وتحدث الرئيس عن إدارة القطاع العام والحكومى، قائلًا: «بقولكم وكل زمايلنا اللى فى شركات قطاع الأعمال ممكن يختلفوا معانا، يقولك لأ إحنا بندير كويس أرد عليك وأقولك بأمارة إيه؟، بأمارة مجالس الإدارة اللى فلوسها بالكوم، على الهواء بتتكلم كده؟، آه طبعًا.. لا بخاف ولا بيهمنى، إلا البلد بس، لكن مبخفش من حد خالص، العمر بتاع ربنا والمكان بتاع ربنا وقت ما يقولى يلاه عظم وأمشى». وأضاف الرئيس السيسي: إدارة القطاع العام ليست ذات كفاءة ولا تحقق النجاح المطلوب، ممكن تحقق نجاح لكن النجاح ده فى مصر وظروفك الاقتصادية مش عاوز نجاح عاوز تفوق وقفز.. مينفعش تقولى حققت 5 أو 10 % ولا يمكن يحصل إلا بالحكومة فى كل نقطة ميه وكهربا».
تلوث مصنع كيما
وقدم الرئيس عبدالفتاح السيسى الشكر لأهالى أسوان على تحملهم التلوث الناتج عن تطوير مصنع كيما قائلًا: «مش هنسى أقول للناس فى أسوان تحملتم شكلًا من أشكال التلوث، وأوعدكم إن المعايير البيئية حققت حماية حقيقية لكم، نحافظ إحنا كمان كمسئولين على المشروع باستثمار هذه المعايير، مش هذا المشروع فقط، بل مشاريع القطاع الخاص أيضًا، لأن البيئة مصلحة الناس كلها، ومحدش يؤذى غيره علشان المنشأة مشتغلتش كلها، فيه أجهزة فى الدولة بتراجع المصانع بتاع القطاع الخاص والعام، محدش فى هذا الموضوع يستثنى، كلنا زى بعض». وقال الرئيس: «توجهنا أن القطاع الخاص يبقى شريك معانا والشركات تنزل البورصة وده توجه دولة علشان القوائم المالية والمراقبة الحقيقية التى تساعدنا فى تحقيق المعايير.
منظومة دعم الفلاح
وتحدث الرئيس السيسى عن منظومة دعم الفلاح، قائلًا: «إن التسعير نقدر نحله إزاى مع وزارة الزراعة وكنا قلنا يا جماعة حاولوا تقدموا الدعم المقدم للمزارعين فى شكل نقدى، عاوز أدى للفلاح دعم فى شيكارة ولا اثنين طبقًا للمعايير المعمول بيها للفدان طيب ما أدهاله دعم نقدى علشان أحرر وأمنع الفساد المحتمل فى إدارة المنظومة اللى مشيين فيها، مش ده التجربة بتاعتنا على مدى 50 سنة، طيب التجربة دى مش قابلة للتصويب وده معناه إن اللى قابلنا مش كانوا وحشين..لكن التجربة قالت إنها لازم تتصلح..نصلحها ولا نقعد نتفرج عليها..كلموا الناس زى ما أنا بتكلم هتجدوا الناس معاكم أكتر مما تتخيلوا.لأن الناس عاوزة المصلحة والمواطن عاوز المصلحة ومصلحة بلده واستحمل معانا السبع سنين اللى فاتوا فى إجراءات صعبة جدًا، لأنه حس بفطرته وذكائه إن فعلًا فيه محاولة للإصلاح من جانب الدولة».
نظم الزراعة الجديدة
وأكد الرئيس عبدالفتاح السيسى، على ضرورة اتباع النظم الحديثة فى الزراعة، قائلًا: «النظام الجديد يزود الإنتاج فى الفدان وبالتالى يزود الدخل.. وأنت مش دافع حاجة من جيبك.. فيه فرق بين كلام المكاتب واللى بنعمله على الأرض للناس». وأضاف تعليقًا على كلمة وزير الزراعة: «أقصد أقول مهم الرى بالتنقيط يعمل معاك زيادة ويطلع زراعة كويسة ويقلل سماد وتلوث ويوفر فى الأعمال.. وأنا محتاج مياه.. لو مليون فدان بالتنقيط هوفر منها مياه وأزرع فدانين تانى إحنا عاوزين نتكلم مع بعضنا». وقال الرئيس السيسى: «أنا مستعد أدفع 100 ألف شتلة.. طالما دفعت بقوا بتوعى أنا وأديهم للناس.. لما يكون عندنا 300 ألف فدان ونحولهم من الزرع التقليدى للشتلة وبالتنقيط.. بندفع فلوس ودعم نزود الزراعة ونقلل المياه والسماد.. مش علشان الإنفاق والدعم يكون فى محله بس.. علشان نعظم الموارد.. أكبر قدر من الإنتاج بأقل من السماد والمياه».
زيادة إنتاج الفدان
وأكد الرئيس عبدالفتاح السيسى، أن الدولة المصرية تسعى لزيادة إنتاجية الفدان، متابعًا: «بدل ما يكون الإنتاج 80 ألف طن يكون 100 ألف طن.. ولما شوفت ترعة توشكى خلال أسبوع الصعيد سألت هل يمكن وضع سمك فيها وهل يعملوا مشكلة للري.. قالوا لا.. طب أنت فاكر توشكى تقدر ترمى فيها سمك لمدة سنة و2 ويبقى عائد كويس». تحدث الرئيس عبدالفتاح السيسى عن سعر القصب، قائلًا: «النواب قبل موسم القصب يطلبوا زيادة السعر.. والنبى زود السعر شوية.. نواب الشعب على دماغنا.. يا جماعة البرلمان بدل ما تقولى زود السعر.. طب هزود قد إيه 50 -100 جنيه.. أنا بقولك على حاجة تزود الإنتاج 20 طن.. يعنى 50 % زيادة، يعنى الزيادة أكبر والإنتاج أكبر.
الثروة الحيوانية
وتحدث الرئيس عبدالفتاح السيسى عن الثروة الحيوانية فى مصر، قائلًا: «قولت قبل كده اللى عنده رأس ماشية بتجيب 5-6 كيلو لبن.. وفيه رأس ماشية أخرى بتجيب 30 كيلو لبن.. ده بيظلم نفسه.. وأنا بتكلم مع أهلنا فى الصعيد.. لازم نطور فى موضوع الماشية ده». وأضاف: «إحنا مهمومين بالصعيد ومستعدين للتغيير.. وبناخد القرار علشانكم.. خلى الناس تاخد من رأس الماشية اللى إنتاجها أكبر..الثروة الحيوانية فى مصر إنتاجها فيه فرق فى التسمين.. رأس ماشية تطلع نص كيلو فى اليوم ورأس تطلع 1.3 كيلو فى اليوم.. كده كده بأكل.. فيه اللى بأكله يدينى نص كيلو ولا يدينى 1.5 كيلو.. لازم الدولة تتصدى وتشمر دراعاتها.. وعندنا برنامج لتحويل الوضع ده فى مصر لمدة 3-5 سنوات». وأكد الرئيس أن الدولة المصرية لديها الفرصة الكاملة من أجل زيادة الإنتاج فى كل شيء، متابعًا: «عندنا فرص حقيقية.. لما نجيب أقصى طاقة فى كل شيء.. فى القصب أقصى حاجة.. وبحيرة المنزلة وبحيرة ناصر أقصى حاجة هيجى خير». وأضاف الرئيس: «لازم مديرية الزراعة تعمل وتحط برامج مع المحافظة والمواطنين ومؤتمرات وكلام أنزل الأرض وأشيل القصب القديم بعد 5 سنين من دورة الزراعة.. ونحط الشتلة الجديدة لزيادة الإنتاج.. وحد يقول أشيل 50 ألف فدان وأحط الشتلة ومش مهم الفارق لأنه هيعوض». وأوضح الرئيس السيسى أن تطوير الثروة الحيوانية فى مصر يحتاج إلى الحلم، متابعًا: «ليه مش بنحلم.. أنا كوزير الزراعة أحلم وأدخل فى موضوع التطوير وأكسر فى التحديات.. طب برنامج تطوير الثروة الحيوانية لزيادة الإنتاج كام سنة.. طب المحافظ ومديرية الزراعة معايا فى التطوير ده.. أتابع تطوير الثروة الحيوانية وأنجح وأفرح بالتطوير ده.. بقى عندى أمل كلما العدد يزيد فى تطوير الثروة الحيوانية ورؤوس الماشية اللى إنتاجها أكبر بيزيد.. هو انتوا مش بتحلموا ليه». وأضاف الرئيس: «بقول الكلام ده لأن كل حاجة لها حلول.. لما كنا فى اجتماع جامعة كفر الشيخ.. أحد رؤساء الجامعات قالى ممكن نعمل مصنع للنباتات العطرية.. الفرص موجودة مش لاقية اللى يعلمها.. إحنا معانا لسه فرص للتطوير والتحديث».
دعم المزارعين
قال الرئيس عبدالفتاح السيسى، عاوزين نغنى الناس مش الناس تاخد دعم كل شوية وخلاص ومننهضش.. أوعوا تفتكروا رقم ال 62 مليار تكلفة فروق الفوائد لدعم المشروعات اتحط من غير تكلفة على الدولة. وأضاف الرئيس السيسى: «لما جينا نعمل الفكرة الناس قاومتنا رغم إن المصلحة فى الجنب التاني..أنا بدخلك فى نظام مش محلى بدخلك كمنتج، وبقدر أقول إن حجم الفاقد أقل وجدارة المنتج تزيد. وأكد الرئيس السيسى، أن المواطن لديه الخيارات الكافية لتعظيم دخله، فهناك 350 ألف فدان مزروعين بقصب السكر، يحققوا 40 ل45 ألف طن قصب للفدان، من خلال الرى بالتنقيط.، والرى بالتنقيط زراعة كويسة يقلل تلوث ويوفر العمالة».
بحيرة ناصر
وشدد الرئيس عبدالفتاح السيسى، على أهمية المتابعة الدقيقة لكل الأمور، قائلًا: «البلد مبتطلعش كده.. بتطلع بالمتابعة الدقيقة والإصرار والعناد.. محدش هيتعب من الجدية والهمة، لأن ربنا هيحميك.. اللى يهتم بالناس ربنا هيحميه ويحافظ عليه ويقويه طول ما أنت بتجرى على الناس». وأضاف: «لازم تعرف ليه البلد دى ضاعت.. بحيرة ناصر كانت بتطلع 80 ألف طن سمك ليه نزل.. وزارة الزراعة متمثلة فى هيئة الثروة السمكية الكلام ده مش بحيرة ناصر بس، كمان البردويل والمنزلة وكل البحيرات كانت بتطلع سمك قبل استزراع السمك طيب تقولى لو البحيرات بتطلع إنتاجها كنا مش هنحتاج استزراع لا.. كنا هنحتاج علشان الزيادة السكانية».
تطوير السكك الحديدية
وفيما يتعلق بتطوير السكة الحديد، قال الرئيس عبدالفتاح السيسى، إن الدولة المصرية لن تقترب من سعر تذكرة القطارات إلا بعد التطوير الكامل، قائلًا: «قولت يا كامل متقربشى من سعر التذكرة إلا لما تحدث العربيات.. مفيش قطار واحد قديم.. مفيش على أى خط فى مصر عربية قديمة». وتحدث الرئيس عبدالفتاح السيسى، عن سعر تذكرة القطارات، قائلًا: «التسعير.. طب ما الوزير يشيلها أو رئيس الوزراء يشيلها.. أنا عاوز يوم القيامة ربنا يشيلنى كل حاجة عملتها.. علشان كده بقول دلوقتى.. بنحط أسس لدولة جديدة كما نتمنى ونأمل». وأضاف الرئيس السيسى: «المسئولية مشتركة.. إحنا عاوزين نجرى مع بعض.. غير كده مش هينفع.. وقطاع النقل وصل إلى تريليون و700 مليار جنيه.. يعنى 1700 مليار جنيه». وقال الرئيس عبدالفتاح السيسى، بقول الكلام ده للمصريين علشان محدش يضللكوا وهو بيكلمكوا.. السكة الحديد تعبانة ليه؟ أصل الحكومة مكنتش كويسة.. لا». ووجه الرئيس حديثه لوزير النقل كامل الوزير: «كامل يقولى التذكرة بجنيه يقولى أزودها؟ أقوله متزودهاش، ليه يا كامل؟ مبيقولش ليه؟ خايف، حتى لو كانت البلد تخرب علشان الكرسى يقعد هو ويخرب فيها ويخليها «بلد كوهن»، سكة حديد تعبانة وطرق تعبانة وموانئ تعبانة كله تعبان.. مش فكرة إرادة.. الناس كانت عارفة كويس العلاج كان عاوز فلوس وتقدر ترجعها».
موازنة تريليون دولار
أكد الرئيس عبدالفتاح السيسى، أن الدولة المصرية تحتاج إلى موازنة «تريليون دولار»، من أجل توفير الإنفاق المطلوب، متابعًا: «إحنا دولة عددنا عاوز تريليون دولار موازنة.. الموجود منه 3 تريليونات جنيه.. 14 تريليون جنيه يتجابوا منين.. مش هيتجابوا.. يحصل انهيار وضغط على المرافق». وأضاف الرئيس السيسى: «لما نزهق نطلع نهدها.. ومحدش يطلع يقول الناس بقت مهجرين والبيوت خربت.. والناس تترمى فى البحار». شدد الرئيس عبدالفتاح السيسى، على نظافة محطات القطارات بعد التطوير الكبير الذى شهدته قائلًا: «مش هنقبل أن محطاتنا يبقى عليها نقطة زيت أو مياه على الأرض..مش عاوز لمبة محروقة ولا تراب فوق السقف.. عاوزين نشوف شغلنا.. العمل تعمل الشغل.. لو جيت كل يوم وعملت اصطفاف للعمال وتراجعهم وتشوف إيه المطلوب وتعمله». وأضاف الرئيس السيسى: «إحنا اللى نتكلم وأنتوا اللى تعملوا كل حاجة.. كل حاجة حلوة.. لا ستارة تتقطع.. ولا لوح زجاج فى المحطات أو القطارات مكسور.. وهروح أنا اشوف بنفسى أنا بصحى الساعة 5.. وعاوزين نشوفها على طول كده.. عاوزين نظام عمل.. مش عاوزين لأنه حد بيجى يشوف».
قال الرئيس عبدالفتاح السيسى، أن تطوير محطة أسوان والسكة الحديد لا يقتصر على السياح فقط ولكن المواطن المصرى، متابعا: «المواطن المصرى يستحق للإنسان المصرى أولا». وسأل الرئيس السيسى، الفريق كامل الوزير وزير النقل، عن دفع الأموال للهيئة الهندسية، ليرد عليه الفريق كامل قائلًا: «لما كنت فى الهيئة الهندسية كنت طالب من وزارة النقل عليها 44 مليون جنيه حصلت على 4 ملايين وضربوا على الباقى.. ولما جيت حاولت أدفع للواء إيهاب 40 مليون ولكنه طلب 44 مليون.. ولو سمحت لى تكون دى هدية لوزارة النقل وللشعب المصرى من القوات المسلحة»، ليرد عليه الرئيس السيسى مداعبًا: «الفريق محمد زكى وزير الدفاع بيقولى عليه 75 مليار»، ليرد عليه الفريق كامل الوزير: «ده جيشنا.. ولو مش يعملنا ويساعدنا مين اللى يعملنا ويساعدنا».
ميكنة السكة الحديد
أكد الرئيس عبدالفتاح السيسى، أن كل وزراء النقل السابقين يعلمون ويرغبون فى التغيير داخل القطاع متابعًا: «الناس دى مش موجودة معانا.. هو إحنا خلصنا ميكنة السكة كلها.. لا لسه.. بقول كده للناس تسمع ده.. الميكنة يعنى إيه.. يكون عندنا آلية حديثة تنظم الحركة والعمل على السكة الحديد بشكل بدون تدخل بشرى أو أقل حجم من التدخل البشرى.. وبالتالى لا يوجد أخطاء». وأضاف الرئيس السيسى: «إجراءات الأمان مع البشر بتكون أكبر وتأخد وقت أطول.. إحنا نقدر نقول بالمطلق بقى عندنا سكة 100 % بعد الميكنة الكاملة.. لما بنتكلم عن حركة يعنى معدات.. وبنية أساسية ورفع الكفاءة.. والخطوط والمكينة.. الأرقام المالية دى كبيرة أوى.. كان ممكن نقول ميكنة كل منطقة والتكلفة كام.. والمنطقة دى من أجل الميكنة تم الحصول على قرض من اليابان بكذا.. وهكذا كل منطقة يتم الميكنة فيها.. علشان الناس تبقى عارفه إنه الكلام ده مش بموازنة الدولة.. ده عبء على الدولة والأجيال القادمة.. علشان محدش يقولى فين الرحمة». وقال الرئيس عبدالفتاح السيسى: «المسئولية مشتركة علشان البلد تتحرك.. لما نخلص ميكنة السكة الحديد هتكون زيها زى أى دولة متقدمة».
الحرف التراثية
أكد الرئيس عبدالفتاح السيسى، أن مصر جمايلها علينا كلنا، مشيرًا إلى أن مبادرة «حياة كريمة» ستغطى جميع القرى خلال 3 سنين، مضيفًا: «خدنا أول تلت اللى هو أصعب حاجة هاتقولى فيه حاجات صعبة هقولك اللى إحنا اخترناه كان أصعب». وقال الرئيس السيسى خلال تفقده كورنيش أسوان عقب افتتاحه مدينة أسوان الجديدة: «التلت ده يخلص فى سنة هنعمل فيه الصرف الصحى ومراجعة الميه والصرف والكهرباء والطرق وتبطين الترع وتوفير الغاز والاتصالات.. بنتكلم على دولة بتخش على كل ريف مصر صعيد دلتا والتوابع ده موضوع مش متنقى.. مش هنسيب حد البرنامج لكل قرية فى مصر لازم يخشلها صرف صحى وميه شرب وكل قرية ممكن يخشلها الغاز هيدخل والاتصالات والنت والحاجات دي.. ولو مفيش مدارس لو المستشفى هنعمل ثم المحليات بتاعتها.. أملنا عند ربنا إن فى 3 سنين نقدرنوفى بالوعد ده من الدولة المصرية.. كهرباء يعنى إيه؟ ممكن يكون جودتها بتقطع شوية إحنا بنتكلم عن جودة كهرباء حقيقية». وتابع: «بعد 6 شهور هنخش على التلت التانى وياخد سنة، وبعد سنة نخش على التلت الأخير، يبقى كده خلصنا الريف بتاع كل قرى مصر وتوابعها.. إحنا باصين لكل ريف مصر من الجيزة والصف لغاية أسوان. وقال الرئيس، لعارضى المنتجات التراثية بكورنيش أسوان: «إحنا عاملين فى العاصمة الجديدة مكان كبير للتراث، محتاجين لما يطلع يبقى قوى جدًا علشان الصورة اللى إحنا بنديها للناس إحنا فين؟ فلازم المجموعة اللى تخش معانا تكون قوية قوى ومحترفة جدًا لأن الفرصة اللى هتبقى موجودة.. مش فرصة مكسب، ولكن مكسب لتاريخ مصر والدول كلها بتعمل تاريخ، إحنا عندنا تاريخ وتراث جميل». ووجه الرئيس، بتخصيص عائد 200 مليون جنيه من صندوق تحيا مصر لصالح دعم الصناعات الحرفية، وقال إن الدولة معنية بالحفاظ على التراث وإحيائه. 3012
