إلى أصحاب عجلة الإنتاج الرحيمة.. نداء عاجل من شاب مصرى، من المسئول عن وقوف عجلة الانتاج عن الدوران؟ أرجو أن تجدوا إجابة عن هذا السؤال بعد قراءة قصتى مع عجلة الإنتاج.. من فترة قررت أشارك صديق ليّا وافتح مكتب ديكور، وبدأنا المشوار، عايزين بقى كل العجل يدور .. عجلة الثورة وعجلة الإنتاج وعجلة الحياة، البداية تشطيب المكتب ، طيب هنعوز إيه فى التشطيب ؟ كهربائى ونقاش وصنايعى جبس ، كلمت أول صنايعى قاللى هخلص شغلانة فى إيدى وأجيلك، طب والله تمام البلد فيها شغل والصنايعية مش فاضيين، وشرحه باقى الصنايعية، بعد كده بقى لازم ابقى راجل قانونى، ده أنا بتاع الثورة والتغيير لازم أرخص المكتب، كده ناقصنى ايه رأيك ناقصنى الطريق يا صديقى، هو فى عجلة بتمشى فى الهوا؟ لازم يكون فى طريق متسفلت عشان أطير عليه بعجلتى، وبعد ما ركبت على العجلة، وهبدأ ابدل وأطير وانتج وابنى البلد اللى مش هتتبنى بالاعتصامات ولا الاحتجاجات ولا المظاهرات، فجأة ومن غير سابق إنذار حدث الآتى.. مفيش ولا صنايعى جه أو سلمنى فى ميعاده، وبالتالى اتأخرت أكتر من شهر على موعد الافتتاح، مش كده وبس كمان مش عارف استلم السجل التجارى بتاعى .. قولوا ليه؟ عشان مستنى الموافقة الأمنية اللي هتقعدلها بتاع 3 شهور!! طاب وماله أنا هستنى الموافقة الأمنية ومش هقول حاجة، بس كمان يطلع فيه تشابه أسماء «رباعى» وبطاقة ضريبية عليها ضرايب من سنة 2009 بيني وبين واحد كان فاتح مكتب في نفس العمارة إللي انا هفتح فيها مكتبى؟؟ طب أنا عايز اشتغل، وأنتج وعايز البسكلته بتاعتى تلف، وعندى كل المقومات إنى أخوض سباق العجل ده، بس فين التراك (المضمار)؟ إلى أصحاب القلوب الرحيمة أنا معاية العجلة بس مين موقف السباق ؟؟؟.. محمد الزيات