البنيه الامورة المثقفة جدا والمحترمة جدا بنت البيت المصري الملتزم بتقاليده وحشمته كانت فقرتها الرئيسية ليلة الاحد الماضي عن الفقر.. وكان من ضمن ضيوفها وزير الفقراء قصدي وزير التضامن الاجتماعي د. مصيلحي اللي قال ان الانسان اللي وحده ولا يعول لو دخله في الشهر ميت جنيه يقدر يعيش بيهم.. طيب تعالوا نحسبها كده مع بعض.. لقيت المخرفاتي راح فاطط مني كده وبضيق وغضب وقاللي انت كمان حتحسبها وري الوزير.. قلتله ما احسبهاش وراه ليه.. قاللي عشان ده وزير ويعرف في الحساب اكثر منك قلتله وانا اعرف في حياة الفقرا اكتر منه.. وما علينا يا مخرفاتي تعالي نحاول نحسبها سوا الراجل الفقير ده اللي لوحده ولا يعول اول ما بيصحي من النوم بيعمل ايه المخرفاتي قاللي بيتاوب.. قلتله يا مخرفاتي سيبنا من التفصيلات دي.. هوه لما بيصحي مش محتاج يغسل وشه.. والمخرفاتي قاللي آه.. قلتله يعني بيستعمل ميه وصابونه قاللي آه قلتله طيب نسيبنا من تكلفة الميه اللي بيدفعها كل شهر حتت صابونة الوش دي بكام وحتفضل معاه قد ايه.. المخرفاتي قاللي ودي تتحسب الزاي يا اخينا.. قلتله نسيبنا من حسابها دلوقتي.. بعد كده بيلبس.. اللبس ده بأه بكام.. وكمان بلاها دلوقتي حسابات اللبس.. بعد كده بيجيبله سندويتش فول واحد عشان يفطر.. السندويش بكام اظن باه بخمسين قرش.. والا اقولك نسيبنا من ابو خمسين قرش حيجيب سندويتش من ابو خمسة وتلاتين قرش.. والا اقولك نسيبنا من السندويتشات ونقول انه حيشتري شوية فول مدمس بخمسة وعشرين قرش ورغيفين بلدي بعشر قروش.. بقي فطاره حيكلفه 35 قرشا.. يبقي في الشهر حيفطر بكام.. المخرفاتي قالي حيفطر بعشرة جنيه ونصف في الشهر قلتله حيخرج عشان يروح شغله فحيركب مواصلة بالقليل بخمسين قرش ويرجع من شغله بخمسين قرش تانين يبقي آدي جنيه مواصلات في اليوم يبقي في الشهر بكام يامخرفاتي.. قاللي 26 جنيه.. قلتله يا مخرفاتي ده الشهر تلانين يوم..قاللي هوه مش فيه اربع تيام اجازات يترزع فيهم في البيت ومايخرجش.. قلتله ماشي يبقي مجموع حسابنا دلوقتي بأه 36 جنيها ونص.. الراجل ده حيتغدي بكام المخرفاتي قاللي كفاية عليه سندويتشين فول او طعمية بسبعين قرش يتغدي بيهم.. قلتله ماشي يبقي بكام في الشهر.. قاللي يعني واحد وعشرين جنيه.. قلتله وستة وثلاثين ونص يبقوا سبعة وخمسين جنيه ونصف.. تعالي بأه للعشا مش حياخدله في العشا كمان سندويتش فول او طعمية.. قاللي يبقي بعشرة جنيه ونصف في الشهر ويبقي المجموع لغاية دلوقتي 68 جنيه.. قلتله مش حياخده تلت كوبايات شاي في اليوم وري كل وجبه كباية عشان يحبس الاكل في بطنه شوية قبل ما ينزله عشان يفضل شبعان.. المخرفاتي قاللي يبقي شاي بخمسة وسبعين قرش في اليوم بحساب الكوباية بخمسة وعشرين قرش يعني في الشهر يبقي باتنين وعشرين جنيه ونصف في الشهر وبكده يبقي المجموع الكلي تسعين جنيه ونص.. قلتله وياتري ايجار الاوضة اللي عايش فيها بكام في الشهر المخرفاتي قاللي علي اقل تقدير حيدفع عشرة جنيه في اوضة شرك.. قلتله يبقي بكده الحساب كله ميه ونص جنيه يعني الراجل ده حيطلع من الشهر مديون بنص جنيه.. الراجل ده يا مخرفاتي لا لبسناه ولا فسحناه ولا حتي حمناه.. ولا خليناه يحلق دقنه ولا شعره.. تفتكر يا مخرفاتي يا خويا الراجل ده حيبقي عنده انتماء لبلده.. طب تفتكر الراجل ده لما يسمع الوزير بيقول كده يرد عليه ويقول ايه.. المخرفاتي قاللي ما هو واحد قالها في تليفون البرنامج لو كان الفقر رجلا لاكلته.. قلته اهو عشان كده الناس دلوقتي بقت بتاكل في بعضها.. المخرفاتي قاللي والله يا ابو خليل الخوف اكتر ان الناس تزهق من اكل بعضها ويدوروا عشان ياكلوا اللي اكلينهم.