حذر الدكتور هانى الناظر، أستاذ الأمراض الجلدية ورئيس المركز القومى للبحوث سابقا، من بعض الدهانات المستخدمة فى الرسم بالألوان على وجوه الأطفال فى الاحتفالات والمناسبات، والتى من الممكن أن تسبب حساسية فى الجلد وتظهر فى صورة التهاب موضعى حاد ومؤلم مصحوب بحكة، ناصحا بضرورة التأكد من مصدر صنع تلك المواد واختبارها على الذراع. وقال "الناظر"، فى تدوينة له عبر صفحته الشخصية بموقع التواصل الاجتماعى "فيس بوك": "انتشرت بشكل كبير السنوات الماضية موضة إن الناس بتعمل رسومات بالألوان على وشها في الاحتفالات والمناسبات زي ورد أو فراشات أو أعلام أو غيرها، والحقيقة أنا كطبيب أمراض جلدية عاوز أحذر حضراتكم إن في أنواع من الدهانات دي ممكن تعمل حساسية في الجلد وبتظهر في صورة التهاب موضعي حاد ومؤلم ومعاه حكة، خصوصا إذا كانت ماركات مجهولة، وكمان موش معنى إن العلبة مكتوب عليها من برة إنها لا تسبب أي تسمم أو إضرار بالجلد معناه أن الكلام ده صحيح". وأضاف: "وبصفة عامة أنا لا أنصح بهذه الدهانات والرسومات ولكن إذا كان ولابد إن حد هايستعملها فأنا أنصح بالآتي: قبل ما نعمل الرسومات على الجلد خصوصا الأطفال حرصا على سلامتهم: أولا أتأكد إن النوع اللي هاستعمله موش حاجة مجهولة الصنع والمصدر أو مغشوشة ولازم أتأكد إنه اسم شركة عالمية واخدة تصريح من جهة صحية مسئولة". وتابع: "ثانيا قبل المناسبة بيومين أحط نقطة صغيرة جدا من الدهان على الذراع وأراقبها، فإذا حدث احمرار وحكة مكانها يبقى ما استعملوش نهائي". واستطرد "الناظر" فى حديثه قائلا: "ثالثا لازم قبل دهان الجلد أتأكد تماما إن مفيش جروح أو التهابات وكمان الشباب والبنات اللي عندهم حبوب شباب مينفعش يعملوا الرسومات دي". واختتم "الناظر" تدوينته قائلا: "رابعا بلاش نسيب الرسومات دي على الجلد فترة طويلة وتتم إزالتها بعد الانتهاء من المناسبة".