(طرقات قوية على باب غرفتي أيقظتني من نومي فزعا ، انتفضت واقفا ، جريت أفتح الباب ، و إذا بصديقي فؤاد يصرخ ) أنت لسه نايم و الدنيا مقلوبة برة ؟
خير ؟ فيه إيه ؟
القيامة ها تقوم ، و أنت نايم لي في العسل ؟
( عندها لم أتمالك نفسي من الضحك ) ههههه ، القيامة ها تقوم ؟
أيوة ، شوف اللي مكتوب هنا في الجرنال ... ( ناولني الجريدة التي في يده ، أخذتها و ألقيت بها على الكرسي بجواري ، عدت متمددا على سريري ، سحبت غطائي فوقي )
على فكرة ، أنا لسه مغير أنبوبة البوتوجاز ، ممكن تعمل لك كوباية شاي تفوقك شوية لغاية لما أقوم لك ، و فكرني أبقى أرد عليك...
( عندها سحب الغطاء من فوقي و أخذ يهزني و يصرخ ) شاي إيه و بتاع إيه ؟ بأقول لك القيامة ها تقوم ، و أنت تقول لي اعمل لك شاي ؟؟؟؟؟
( عندها جلست متأففا )
لا حول و لا قوة إلا بالله ، قيامة إيه يا أبني اللي ها تقوم ؟ أنت بتستهبل و إلا شارب شاي بلبن ع المسا ؟
أهوه ، الجرنال هو اللي بيقول أهوه .... ( سحب الجريدة من على الكرسي و ناولنيها ، عندها أخذتها منه و طويتها و ألقيت بها بعيدا ) و حياتك لو ميت جرنال ، أنا ما حدش يلعب بدماغي أبدا ، و بعدين ده الرسول عليه الصلاة و السلام بذات نفسه واحد سأله عن يوم القيامة و قال له متى الساعة ؟ فقال له (ما المسؤول عنها بأعلم من السائل) ، و الأهم من ميعاد يوم القيامة (ماذا أعددت لها) أو كما قال صلى الله عليه و سلم .
يعني الأهم من ميعاد يوم القيامة ، إنت عملت إيه ليوم القيامة ، و بعدين مين قال لك إنك ها تعيش أصلا لليوم ده ؟ مش ممكن تيجي شوطة تاخدك دلوقتي و أنت قاعد قدامي ؟ يا أبني ده كله كلام فارغ و بعدين ها أثبت لك علميا كمان ...
تثبت لي إيه ؟ بأقول لك دي وكالة ناسا بنفسها هي اللي قالت الخبر ده ، و الناس دي طبعا ما بتهرجش ، و بعدين يا أخي ده المثل بيقول لك لو اتنين قالوا لك فين راسك لازم تقف و تحسس عليها ....
ده أنت و المغفلين اللي زيك اللي تحسسوا ، لكن أنا بقى ، لو العالم كله وقف و قال لي فين راسك ؟ ها أطلع لهم لساني ، ه ........ يا سلاااااااااام ؟
يا ابني الناس دي بتاكل عيش من ورا الإشاعات دي ، و عيب عليك لما تبقى راجل متعلم و تردد أي حاجة الأجانب يقولوها زي الأهبل كده لا مؤاخذة .
و هو أنت خليت فيها لا مؤاخذة ؟ طب بس خد اقرا الموضوع ده لغاية لما أعمل لنا اتنين شاي .. ( ناولني الجريدة مرة أخرى و ذهب لعمل الشاي ، بينما أخذت أقرأ ما جاء في الجريدة
( نهاية العالم 2012) ، بعد قليل جاء بالشاي و جلس إلى جواري )
هيه ، عرفت بقى ؟
عرفت إيه بس ؟ الخبر كله متفبرك و فيه كلام لا يدخل دماغ عيل صغير في ابتدائي ، إلا صحيح ، هو انته كنت بتغيب في حصة العلوم و أنت صغير ؟
أيوة ، بس أنت عرفت منين إن شاء الله ؟
لأن الكلام اللي هنا ده مش ممكن يدخل دماغ واحد متعلم .
ليه بقى إن شاء الله ؟
بص يا سيدي ، لما حد يقول لك إن نهاية العالم ستكون يوم 21 / 12 / 2012 الساعة 12 و 21 دقيقة و 12 ثانية ، ده كله يبقى كلام فارغ لأن الحسابات دي مش موجودة غير عندنا على الأرض .
مش فاهم .
الحسابات دي يا ابني مش موجودة غير عندنا هنا على الأرض و بس ، يعني السنة اللي بنقسمها لاتناشر شهر دي مش موجودة غير عندنا إحنا هنا على الأرض ، و الشهر اللي بيتقسم لتلاتين أو واحد و تلاتين يوم ده مش موجود غير هنا ، و اليوم اللي بنقسمه لأربعة و عشرين ساعة برضه مش موجودة غير في حساباتنا احنا و بس .
عروستي . أفهمها لك من ناحية تانية ، إنت تعرف مثلا إن اليوم على كوكب عطارد بيقسموه هناك لسنتين ؟
إزاي بقى إن شاء الله ؟
اليوم هناك بيساوي 176 يوم من أيامنا ...
معقولة ؟
طبعا و دي حاجة أي واحد ما كانش بيزوغ من حصة العلوم زي حضرتك لازم يكون عارفها ، يعني لو أنت عايش هناك كنت هتلاقي النهار 88 يوم و الليل 88 يوم ، و لو قعدت هناك يوم واحد يكون عدى عليك سنتين ، لأن السنة هناك بتساوي 88 يوم من أيامنا ...
أنت دوختني كده .
اللي أنا عاوزك تفهمه إن الحسابات دي بتاعتنا إحنا هنا بس على الأرض ، يعني ما تحسبش أي حاجة في الكون ده بحساباتنا إحنا ، و تشابه الأرقام اللي بيقولوه ده ما لوش أي منطق ، ثانيا تعالى هنا و شوف الخبر بيقول إن الموضوع ده اتسرب من وكالة ناسا ، و هو إنت فكرك إن وكالة ناسا دي زي وكالة البلح كده عندنا يتسرب منها أي خبر كده ببساطة ؟
بس اللي ألف الموضوع ده عاوز يحسس أنصاف المتعلمين اللي زيك كده إن الموضوع ده كان سر خطير و المفروض ما حدش من العالم التالت يعرفه ، و حلفت بقية الدول المتقدمة على المصحف إنها ما تجيبش سيرة لحد لغاية لما يتصرفوا ، بذمتك ده كلام يدخل دماغ ناس عاقلين برضه ؟
طب و حكاية الكوكب اللي ها يقرب من الأرض ده ؟
تعالى هنا و شوف الكدب اللي على أصوله ، بيقولوا هنا إنه ها يقرب من الأرض عام 2009 و ها يشوفه بتوع شرق أسيا ، طيب آدي ألفين و تسعة عدى و لا حد من بتوع شرق أسيا شافوا حاجة و لا يحزنون ، طبعا ها يقولوا إنه مر بالليل و أنت سيد العارفين إن الناس بتوع شرق آسيا دول بيناموا بدري عشان عندهم شغل الصبح ، ه .....
بس بيقول لك هنا إنه ها يعترض مسار الأرض سنة 2011 و الناس كلها ها تشوفه زي الشمس .
يعترض مسار الأرض إزاي و هما بيقولوا في آخر المقال هنا إنه بيدور حول الشمس في مدار يشبه مدار بقية كواكب المجموعة الشمسية ؟ مش كان أولى إن كوكب قريب مننا زي الزهرة أو المريخ إنه يعترض مسار الأرض ؟
و بعدين ما سألتش نفسك كده ، إشمعنى يعترض مدار الأرض دونا عن بقية كواكب المجموعة الشمسية ؟ هي غلاسة كده و خلاص ؟ يعني كان ممكن اللي ألف الموضوع ده يكون ناصح شوية لو قال إن فيه نيزك أو مذنب مثلا ها يضرب الأرض ، كانت ها تبقى مبلوعة شوية.
عشان النيزك مساره بيختلف عن مسار الكوكب ، زي نيزك توتاتيس مثلا أو مذنب زي هالي ، لكن كوكب له مسار حول الشمس زي بقية مسارات المجموعة الشمسية ، فده يبقى هبل في الجبل لا مؤاخذة ....
هبل إيه ؟ شكلك أنت اللي مش فاهم ، ده بيقولوا إنه بياخد 4100 سنة على ما يلف حوالين الشمس لفة واحدة ، و ده كان السبب في انقراض الديناصورات من 4100 سنة ، و هو برضه اللي سبب انفصال القارات عن بعضها و اللي بيقولوا عليه الانفجار العظيم ....
( أخذت أضحك حتى استلقيت على قفاي ، عندها صرخ صديقي )
بتضحك على إيه ؟ تلاتة بالله العظيم اللي يناقش معاك حاجة بعد كده يبقى غلطان و ابن ستين في سبعين ...
( هم صديقي بالانصراف غاضبا ، ذهب في اتجاه الباب ، إلا أنني جريت وراءه و أمسكت بالباب أمنعه من فتحه ، حاولت السيطرة على ضحكاتي حتى نجحت )
بس تعالى بس أقول لك ... مش ها أتناقش معاك تاني .... خلاص بقى ، فيه ناس متابعينا دلوقتي و بيقروا اللي بنقوله ده ، خليني أكمل عشانهم طيب ....
و أنا مالي و مال الناس ؟
خلاص بقى عيب ، و آدي راسك ها أبوسها ، أنا آسف ....
بس لو ضحكت تاني .....
خلاص بقى ، أقعد الله يهديك ....
أديني قعدت .
بص بقى يا سيدي ، أولا الديناصورات دي انقرضت من 100 مليون سنة و بيتهيأ لي إنك ما كنتش بتزوغ كمان من حصة الحساب ، و لازم تكون عارف إن فيه فرق كبير قوي بين 4100 سنة و بين مائة مليون سنة ، 100 مليون سنة دي معناها واحد و قدامه تمان اصفار يعني 100,000,000.
أما انفصال القارات ده بقى فكان من قبل الديناصورات كمان بحوالي 500 مليون سنة ، و أما الانفجار العظيم لو افترضنا جدلا إنه حصل و لو أنني أشك فده بقى من 13 مليار سنة يعني 13 و قدامها تسع أصفار ، فمعنى إن واحد يدخل كل الحاجات دي مع بعض زي السلطة يبقى ده طباخ ممكن يشتغل في مطعم .
و بعدين وكالة ناسا أصلا كدبت الخبر و قالت إن ما فيش كوكب زي ده موجود من أساسه ...
ما هو عشان يداروا خيبتهم قالوا كده ، و ده سبب ارتباك الحكومة الأمريكية و عشان كده قالوا إن اللي حصل ده خطأ علمي ؟ و بيحاولوا دلوقتي إنهم يكتشفوا كوكب تاني يشبه الأرض عشان ينقلوا الناس هناك ؟
( أحاول بصعوبة مسك ضحكاتي ، و أجبت )
أيوة و عشان كده برضه أوباما زار الوطن العربي و بيحاول يصالحنا مع اسرائيل من باب إن الدنيا فانية و مش مستاهلة كل الخناقات دي ، و آدينا ها نروح كوكب تاني كبير و نبرطع فيه و كل واحد يعمل له هناك دولة براحته ، و من باب إننا ها نموت كلنا خلاص ، فلو كان هناك أحد بجانبك فلا تضيع الفرصة و عبر له عن حبك ؟
-أنت بتتفرج على إعلانات كتير ؟
يا بني دول هنا جايبين أراء ناس علماء زي واحد اسمه (نوستراداموس) سنة 1890و ......
أولا (نوستراداموس) كان سنة 1503 مش 1890 ، ثانيا ده كان صيدلي و منجم ، و ده تنبأ إن العالم سينتهي عام 3797 يعني مش 2012 زي ما بيقولوا ، هو أي بدنجان و خلاص ؟ عارف مشكلتنا إيه ؟
إيه ؟
إننا بنجري ورا أي حاجة بيقولوها من غير ما نفكر بالعقل ، لأ و مش بس كده ، لأ ، هههه ( تأججت ضحكاتي التي كنت أحاول الإمساك بها ، فأطلقت لها العنان ) ده إحنا كمان بنحط عليها شوية ملح و فلفل عشان نقدر نبلعها و نستطعمها كمان ....
( عندها قام غاضبا و جرى إلى الباب يصرخ )
بقى عاوزني أصدقك أنت و أكدب العلماء دول كلهم ؟ روح يا شيخ ، تلاتة بالله العظيم اللي عاد يتناقش معاك يبقى مجنون زيك .