كشف الفنان كريم عبد العزيز أسباب خروج مسلسل "الحشاشين" من السباق الدرامي الرمضاني 2023، وذلك أثناء استضافته في برنامج " MBCTrending". قال عبد العزيز: "السبب طبعا ضخامة الإنتاج فقط، أي عمل تاريخي بيتطلب مجهود جبار في تحضيره وتنفيذه، لإننا بنرسم عصر مش موجود، مفيش كهربا، مفيش مياه، مفيش عربيات، مفيش أي شيء من الموجود حوالينا، فتحضيره وتنفيذه سواء جزء عملي هنشوفه، أو جرافيكس، بياخد وقت كبير جدا". وتابع: "عندنا فوق ال 3 بلاد، فإن دكتور بيتر يلحق يصور في كل البلاد بالأحداث دي، بعمل بهذه الضخامة في الإنتاج والفكرة، بيتعمل مرة واحدة في العمر، فيستاهل إنه يتطبخ على نار هادية ويتطبخ صح". وأضاف: "إن شاء الله هنشوفه في رمضان 2024، وأنا مش مكتم على تفاصيله، ولكن أحب اللي يتكلم عن العمل ده بالذات مؤلف العمل، لأن في أعمال معينة، مجرد الكلام عنها أو مجرد التنويه، ممكن يدي انطباع، الانطباع ده مش عايزه يحصل، أنا عايزه يطلع من الشاشة، الشخصية اللي هتتعمل ضخمة وكبيرة والعقلية كبيرة وأثرت في ناس كتيرة جدا، ولم تطرح من قبل في عمل فني". يذكر أن كريم عبد العزيز أعلن في وقت سابق مشاركته في بطولة مسلسل "الحشاشين". ونشر عبد العزيز، صورة له عبر صفحته الرسمية بموقع "فيسبوك"وعلّق: "قريبا.. مسلسل (الحشاشين - أبطال وأباطيل من وحي التاريخ) تأليف أستاذ عبد الرحيم كمال.. إخراج أستاذ بيتر ميمي.. إنتاج سينرجي". وكان المخرج بيتر ميمي كشف عن مسلسل "الحشاشين"، ونشر صورة الفنان كريم عبد العزيز، عبر حسابه الرسمي بموقع "إنستجرام"، وعلّق: "مسلسل الحشاشين، أبطال وأباطيل من وحي التاريخ، حقيقة حسن الصباح وفرقة الحشاشين الذين أرعبوا العالم كله في القرن الحادي عشر، تأليف عبد الرحيم كمال، إنتاج سينرجي تامر مرسي". كريم عبدالعزيز يكشف سبب خروج "الحشاشين" من موسم رمضان#MBCTrending #MBC4 يعرض على #Shahid بلا اشتراكhttps://t.co/sokga3XE5c pic.twitter.com/FiGHIkg03z — MBC Trending (@MBCTrending) November 14, 2022
