في أول بطولة تليفزيونية له، بدأ المطرب الشعبي شعبان عبدالرحيم تصوير دوره في المسلسل التليفزيوني الجديد ''اتنين على الهوا''؛ سيناريو وحوار انور محمد وإخراج حاتم صلاح والمقرر عرضه على شاشة رمضان القادم. المسلسل ينتمى لنوعية الأعمال الدرامية منخفضة الإنتاج؛ حيث تم رصد ميزانية قدرها 12 مليون جنيه فقط لإنتاجه وهو أقل رقم يمكن رصده لإنتاج مسلسل تقع أحداثه في 30 حلقة. حول موضوع المسلسل والفنانين الذين يشاركونه بطولته والشخصية التى يجسدها ضمن أحداثه والسبب الذي دفع الشركة المنتجة لترشيحه هو تحديدا لبطولته، تحدث شعبان عبدالرحيم ل''مصراوي'' قائلاً: '' أنا نفسى ما صدقتش لما لقيتهم بيكلموني ويقولولى إنهم رشحونى لبطولة التمثيلية ديه، وقولتلهم ياااه تمثيلية مرة واحدة؛ يعنى مش فيلم ولا كام مشهد في مسرحية على قدي كده، لقيتهم قالولي لا تمثيلية كاملة واحنا رشحناك ليها علشان الدور عايز واحد دمه خفيف وابن بلد الناس بتحيه وتستحمله فى بيوتها لمدة 30 يوم، ومفيش غيرك ينفع للموضوع ده، وبصراحة كده الكلام عجبني فوافقت على طول''، على حد قوله . ويواصل شعبان حديثه قائلاً:'' التمثيلية يدور موضوعها حول رجل أعمال أجسد أنا شخصيته وهذا الرجل لا يحصل على حظه من التعليم، فيبدأ حياته من الصفر ويكون نفسه لحد ما يبقى عنده فلوس كتير ويلاقى القنوات الفضائية والجرايد بتهاجمه عمال على بطال ويقولوا جاب فلوسه دي كلها منين، فيقرر إنشاء محطة فضائية على حسابه ليقوم بالرد على من يهاجموه، يعنى زى ما بيحصل كتير الأيام ديه''. وعما سيفعله هذا الرجل بداخل القناة يقول شعبولا: ''باختصار كده يحط مناخيره فى كل حاجة؛ يعنى يتدخل فى اختيار كل اللى هايشتغلوا فيها فيختار المذيعات الحلوين علشان يبقوا معاه، ويرفض عمل المذيعات الوحشين وكمان الشاب اللى جاى يشتغل لو لاقاه ''مايص'' ولا لبسه مش ولابد يقوله روح بيتكم، وأي حاجة ما تعجبهوش قى القناة يغيرها من غير ما ياخد رأى حد ويفضل يتدخل فى كل شئ مما يجعل العاملين فى القناة فى حالة غيظ شديد منه''. وعن التغيرات التي تطرأ عليه هو بعد امتلاكه للقناة يقول شعبولا: '' أقوم بتعيين سكرتيرة خاصة لى في القناة واقع فى غرامها وأهمل زوجتي وأم أولادي وحينما أقرر الزواج من السكرتيرة تعرف زوجتي فتحدث مشاكل كتيره بينى وبينها وبينى وبين الأولاد، لحد ما تحصل مفاجأة فى الأخر، المخرج قاللى متكلمش عنها علشان منحرقش التمثيلية''. وعن الفنانين الذين يشاركونه بطولته يقول الفنان شعبان عبد الرحيم:'' معانا ناس كتير قوى زي فتحي سعد ومحمود الحفناوي وشريهان أبو النجا؛ اللى بتعمل دور سكرتيرتي الحلوة، وناس غيرهم كتير وكمان مجموعة كبيرة من الفنانين والفنانات الشباب'' .
