الكلام ده كتبه شاب مصري وقررنا ننشره زي ماهو كده من غير أي تعديل أو صياغة، زي ما خرج من قبله لقلمه للورق على طول الإسم : بيشوي فؤاد الديانة : مسيحي الجنسية : مصري إللى قلته دلوقتي ده المكتوب بالنص في بطاقتي...هتقولولي ما كل الناس كده...هقول لكم ما هى دى المشكلة..؟! المشكلة إن إحنا من الأول مفرقين...بين مسيحيين و مسلمين...ليه أصلاً موجودة الخانة دي...هتفرق إيه الخانة دى في أي حاجة فى حياتي...ده حتى إسمها بطاقة رقم قومي...يعني حاجة قومية...ليه مايبقاش الدين لله و الوطن للجميع... هتقولولي المشكلة دلوقتي مش مسلم و مسيحي..!! أنا عارف صدقوني...بس أنا بتكلم عن إحساس موجود من زمان و مش بس أنا إللى حسه..في غيري كتير حاسِّين بيه....ليه إحنا دايماً واخدين الموضوع مسلم و مسيحي؟!...ليه دايماً بنفرق في كل حاجة بتحصل فى البلد؟!...ليه دايماً نشير للديانة فى الصحافة...فى الكلام..حتى في الجامعات و الكليات؟!...أنا مانكرش إن في كل كلية فيه جزء مخصص للمسيحيين للتجمع فيه...!! يا جماعة...هو مش ربنا خلقنا كلنا...ليه بس إحنا مِفرَّقِين؟!..يعنى ربنا فى سماه..قال أنا هخلق إنسان..ما قلش أنا هخلق إنسان مسلم...أو إنسان مسيحي...قال أنا هخلق إنسان...ليه شكل إنسان..ليه روح إنسان..ليه قلب إنسان..و قال أنا هحط الإنسان ده في مصر...يعني الإنسان ده...ربنا خلقه مصري...الديانة حاجة بتيجى بعد الخلقة مش قبلها... يعنى ربنا مافرقش فى الخلقة بيني و بينك...أنا خلقني و إهتم بكل تفصيلة في تكويني..و أنت كمان كده..خلقك و إهتم بكل حتة فيك...ربنا نفسه...الإله القدوس...الرحمن الرحيم...مافرقش بيني و بينك في حاجة...تقوم أنت على الأرض...تفرق بيني و بينك في كل حاجة... ربنا إداني الحق إنى أعيش زى ما إداك...يبقى ليه تفرق في حقوقي...ربنا إداني مكان أعيش فيه إللى هو بلدي...مصر...ليه أنت مصمم تقسمنا مسلم و مسيحي... يا جماعة دى خدعة و معروفة من زمان...فَرِّق تَسُد..إحنا مش هنقول كلام جديد...بس المرة دي الفُرقة بقت جامدة قوي...و النفوس بقت مليانة بزيادة...كله مخنوق و عايز ينفجر...لكن للأسف...الإنفجار ده مش هييجي فى الناس الصح...إحنا الأحسن نلحق الإنفجار ده...الأحسن إن إحنا نتوحد قبل ما نتفرق...الأحسن إن إحنا نقرب قبل ما يبعدونا عن بعض.... مين إللى يبعدونا...؟!...أنا ماليش في السياسة فمش هتكلم فيها...لكن إللى أعرفه و إللى بسمعه إن إللى عايزين يبعدونا كتير...و إن بلدنا التفريق فيها ده مطلب لناس كتير....بس إللى أنا أعرفه إنه شيطان و مدسوس...وسط ناس عقلهم ملحوس...يعني إيه واحد يفجر نفسه وسط ناس...ناس أبرياء...وسط أطفال...وسط رضع...إزاى مافكرش في الحاجات دى كلها...إزاى عدت على دماغه إن حياته هتروح مع حياة كام بني آدم...حياته مش مهمة عنده دى مشكلته...لكن أنا حياة إخواتي مهمة عندي..حياة كل مصري مهمة لكل مصري... و ده إللى أحنا عايزين نوصله...إن إللى يفرق معانا هو المصري و بس...إن إللى يأذيني هو إللى يأذيك...و إللى يبكيني..يبكيك..و إللى يعزيني يعزيك..و إللى يفرحك...يفرحني...و إللى يمسك يمسني...ليه مانبقاش شعب واحد و نخلى الدين على جنب....صدقوني يا جماعة الدين مالهوش ذنب...ليه بس أقول ده كذا...ده كافر...حتى لو هو زى ما أنت بتقول كافر..مادام مالمسكش يبقى كفره ده بينه و بين ربنا...أنت مالك..و مين حطك حاكم على كل واحد فينا..و مين حطك قاضي...تقول ده يموت..و ده يعيش...تقول ده كافر..و ده مؤمن...مين إللى إداك المنصب ده...إزاي تاخد المنصب ده من ربك...أنت يمكن مش خايف من ربك...أو مش عارف إن الحكم ده لربك...بس أنا بقول لك تكفيرك لواحد...هو تكفيرك لنفسك...لأنك بتحط نفسك مكان إللى خلقك... ده إحنا فى صلاتنا...في دعاءنا بنبص لسما واحدة..بنكلم رب واحد...لا أنا ببص لصنم و لا أنت بتكلم حديدة..لا أنا بعبد الشمس و لا أنت عامل مع نفسك ديانة جديدة...كلنا بنبص للسما...و هى دى الحقيقة...كلنا بنبص لربنا...و نبكي و نصرخ..و ندعي و نطلب...لا أنت كافر و لا حتى أنا...و لو جالك الفكر ده إفتكر إن أنا و أنت بنبص لنفس السما.... الإرهاب مالوش دين..و إللى حصل ده إرهاب...واحد لأسباب مختلفة قرر إنه يقتل...يفجَّر...قرر إنه يغُم على الأمة...قرر إنه في ليلة مهمة زي راس السنة يمسح الضحكة...يمسح البسمة...و الأهم يمسح الوحدة إللى بتتلكك عشان تتفك...هو فاكر إن أول مايحصل تفجير ضد المسيحيين..كلنا هنقول ده مسلم إللى عملها...لكن للأسف...إتضحك عليه...هو فاكر إنه كده فرقنا أكتر...لكن هو كده فوقنا أكتر...فوقنا لجرح قديم موجود..لإحتقان مسدود في قلب كل واحد فينا..فوقنا إن إحنا مغيبين...و إن إحنا عايشين فى وهم الديانة..و وهم ده مسيحي و لا مسلم...فوقنا إن كلنا بشر...إللى ماتوا بشر..و إللى إتصابوا بشر...مش مسيحيين و مسلمين...إللى ماتوا كانوا مصريين...و هيفضلوا كده... التفجيرات فَوَقِت فينا إللى كان مستخبي من زمان...أو إللى إبتدى يظهر بعد فوات الأوان...هو غبي و فَجَّر...لكن إحنا أذكياء و لازم نفكر...نفكر إن إحنا نرجع زي زمان...و إن ميبقاش فُرقة..ولا تفريق..و لا تجريح..و لا تدبيح...لكن المحبة تبقى بين كل الناس...الولاد الجديدة تطلع و تبطل تسأل أنت مسيحي ولا مسلم..؟!...لكن لأ تسأل أنت بتحب مصر ولا لأ..؟!...دى إتقالت في الكتاب المقدس " مبارك شعبي مصر "..الشعب كله مبارك تحت إسم مصر...لازم نربي الأجيال دى على المحبة...على أن كلنا واحد...ده حتى إنت لو عملت بصباعك رقم واحد هتلاقيه متقسم بالعُقلة...لكن في الأخر هو صباع واحد... مش هقول إللى فَجَّر ده مسيحي و لا مسلم..إللى فَجَّر ده إرهابي...إللى فَجَّر ده هو الشيطان إللى مخطط و راسم خطة حلوة قوي في عقل كل إرهابي...الخطة دى حبة حبة بتظهر ملامحها....لكن مهما كانت دى خطة شيطان و ماتستنوش منه خير...لكن على الأقل لازم نثبتله بحبنا لبعض...بوحدتنا...بإن إحنا نتكاتف مع بعض...أنا سمعت إن فيه دعوة من إحدى القنوات إن كلنا نصلى العيد مع بعض...و انا بشجع الفكرة جداً...لو ماكبرش فينا إحساس الوحدة وقت الأزمة..هيكبر إمتى؟!!...و مهما كانت تهديدات الغير...إحنا لازم نورى لكل إرهابي...او متعصب..أو متطرف إن مصر...لسه...بخير
