في.. " حوار ماحصلش" لأننا في كلمتنا عودناكم على التميز، قررنا نقدم لكم حوار من العيار التقيل.. مع نجمين من نجوم الفن في مصر والعالم العربي. نجمين مصريين رفعوا إسم بلدهم في مجالهم؛ بتميزهم وإبداعهم.. ولأن فيه جدل كبير عن علاقتهم ببعض، وكمان فيه خلافات كتير بين جمهور كل واحد منهم.. قلنا أحسن حاجة إننا نقابلهم بعض، ونسيبهم يردوا بنفسهم على الكلام ده.. وبصراحة كنا خايفين حد منهم يرفض.. بس فوجئنا بإنهم وافقوا على طول، ورحبوا جدا بالفكرة. وعشان الحوار ميبقاش عادي -نسألهم همَّ يجاوبوا يعني- فكرنا إننا نسيبهم يدردشوا مع بعض، ونسجل كلامهم كله، لأنها طبعا دردشة غير عادية بين "عمرو دياب" و"تامر حسني"، ومش هتلاقوها غير على موقع "كلمتنا". طبعا كتِّمنا على خبر وجودهم في المجلة، عشان لو حد عرف؛ كانت المهندسين هتتقفل خالص.. وكنا هنلاقي نص مصر -على الأقل- جوه المجلة، والحمد لله إننا عملنا كده.. لأن النجمين وصلوا في ميعادهم، وفي نفس الوقت. لما وصلوا لقوا الكلماوية بيستقبلوهم على الباب، وخدوهم على أوضة اجتماعات الكلماوية اللي كنا مجهزينها لليوم ده.. وأكيد كنا قاصدين نحط قدام كل واحد منهم المياة الغازية اللي كان بيعلن عنها "عمرو" ومن بعده أعلن عنها "تامر"، وجنبها المياة المعدنية اللي "عمرو" بيعلن عنها دلوقتي "حركة كلماوية بقى" وبعد ما رحبنا بيهم ، بصوا لنا وهمَّ مستنيين نسألهم زي مابيحصل في أي حوار.. وطبعا كلنا ضحكنا جامد، وهمَّ استغربوا جدا و"تامر" سألنا وهو بيضحك.. تامر: إيه يا جماعة.. هوه محدش هيسأل ولا ايه؟ (ورد عليه الكلماوية "طارق سعد" و "رغدة صالح") رغدة: بص يا تامر.. فيه مفاجأة .. :] طارق: بس مفاجأة من العيار التقيل تامر: مفاجأة إيه بقى.. أنا عارفكم.. اوعوا تكونوا عاملين مقلب عمرو: استنى عليهم شوية لما نشوف محضرين إيه.. بس بلاش الأسئلة التقليدية، عشان زهقت منها رغدة: متخافش.. مش هنسأل أصلا تامر: إزاي يعني؟.. هنسأل إحنا ولا إيه "ينظر لعمرو ضاحكا" طارق: حاجة زي كده عمرو: طب وضحوا يا جماعة.. هنسأل مين وإزاي؟ "يضحك" رغدة: كل الحكاية إننا هنسيبكم تسألوا بعض أو بمعنى أصح.. هنسيبكم تدردشوا مع بعض تامر: جديدة الفكرة دي "ينظر لعمرو" إيه رأيك يا استاذ؟ عمرو: والله ماعنديش مانع.. أنا موافق تامر: بس هنتكلم في إيه؟ مفيش حد يساعدنا من برة حتى؟ "يضحك" عمرو: طيب ابدأو انتم.. وهنكمل وراكم على طول.. طارق: إيه رأيكم تتكلموا مع بعض عن الكلام اللي بيتقال فى الاعلام؟.. أكيد جمهور كل واحد فيكم نفسه يسمع ردكم على الكلام ده تامر: والله العظيم انا تعبت من الكلام والإشاعات اللي عمالة تطلع كل شوية!!.. الواحد كل ما يتكلم كلمتين يتحوروا.. ناس بتحب تولع الدنيا وخلاص .. مع إنى بأقدر فنك ومجهودك جدا يا هضبة، ومستحيل أنافسك لأنك مدرسة و قيمة كبيرة جدا وانا اتعلمت منك، وكل البوماتك عندى. عمرو: يا تامر .. المنافسة "الشريفة" في الشغل مش عيب.. بس هو الموضوع خد أكبر من حجمه.. إنت ليك جمهور.. وده محدش يقدر ينكره لأنك موهوب و تعبت كتير و إجتهدت، وأنا كمان ليا جمهوري اللي بيحبني، والاتنين لازم يفهموا إن مش معنى إني بحب نجم، يبقى أكره نجم تاني، ده مش هيفرحني أبدا لأن فى الآخر إحنا من بلد واحدة و بنمثل مصر. تامر: خمس سنين عدوا على اول اشاعة قالت ان فى خلاف بينى وبينك ومن ساعتها والاشاعات لسة مكملة لحد دلوقتى عمرو: قصدك انهى اشاعة بالظبط ؟؟؟؟ تامر: الاستفتاء اللى عملته قناة النيل للمنوعات فى نهاية 2005 واختارتك مطرب العام واختارت اغنيتى قرب حبيبى كأفضل اغنية مصورة، ساعتها انا رحت لوحدى وطلعت اشاعة انى اتضايقت من صورك اللى فى الاستوديو وطلبت ان صورى انا كمان تتحط يا إما مش هصور "بس والله ما فى حاجة من دى حصلت" والجمهور اتضايق وقال انى بقارن نفسى بيك عمرو: وانا مصدقك يا تامر وكنت عارف انك استحالة تقول كدة فمردتش تامر: يا هضبة دول كمان قالوا إني اتهمتك بالتقليد في بوستر الليلا دي مع بوستر عمرو وسلمى عمرو: ههههههه تامر: شوفت انت ضحكت ازاى؟ عشان تعرف ان اى كلام بيتقال وخلاص حتى لو كان مش منطقى المهم الناس يطلعونا على خلاف عمرو: انا شايف ان كل واحد فينا ليه سكة مختلفة فى الغنا و الناس تقدر تسمع أكتر من فنان واحد ..بص طول ما فى اغانى حلوة الناس هتفضل تسمع تامر: وانا أكيد متفق معاك عمرو: بس سيبك من الكلام ده في إشاعة كانت كوميدية بصراحة دول قالوا انك عشان تنهى الصراع الوهمى اللى بينا هتتجوز نور بنتى ساعتها لما قريت الخبر قولت هو تامر هيتجوز بنتى وانا معرفش ولا ايه؟! تامر: اه انا فاكر الاشاعة دى ساعتها انا نفيت الخبر بس تعرف يا عمرو ؟ انا باحلم باليوم اللى اكون فيه اسرة ويبقى عندى زوجة واولاد عمرو: ربنا يوفقك الموضوع ده قسمة ونصيب وساعة ماربنا يريد هتدخل قفص الزوجية بكامل ارادتك لكن مش متأكد هتكون فى كامل وعيك ولا لا! هههههههه تامر: هههه ماشي يا هضبة دول لسة مستمرين في الإشاعات والحرب اللي هما عملوها وهي مش موجودة حتى في فيلم نور عيني قالوا انى سميت الفيلم على اسم أغنية نور العين اللى انت كنت غنيتها زمان ومؤلف الفيلم قعد ينفى فى الصحافة ويقول انى مليش دخل فى الموضوع ده وان اسم نور عينى هو اختاره عشان مناسب جدا للفيلم عمرو: وحتى لو سميت الفيلم على اسم الاغنية ايه المشكلة يعنى؟ تامر : مش عارف "هى فين المشكلة صحيح؟" ده انا حتى لما جيت اعبر لحبيبتى فى الفيلم عن حبى ليها سمعتها اغنية من اغانيك "تملى معاك" عمرو: تسلم يا تامر وبعدين ده حتى ماسلمناش من الإشاعات في فرح الملحن محمد يحيى يومها انا كنت مشغول فرحت الفرح وقعدت 10 دقايق بس عشان محمد ميزعلش ومشيت فقالوا انى مشيت قبلك عشان مشوفكش بس ده مش حقيقى انا فعلا كنت مشغول، وكمان فى عزاء والدة محمد فؤاد اتقابلنا وسلمنا على بعض عادى جداً وبرضو الناس مش رحمانا أنا زهقت من الكلام اللي بيتقال ده عارف يا تامر دول كمان كانوا مولعينها لما حصلتلك مشكلة الجيش ويقولوا تامر بيقول عمرو دياب السبب وهو اللي سجنه وورا المشكلة.. ينفع الكلام ده وانا اعمل كده ليه يعني؟ ما كلنا مصريين ولازم نساعد بعض اقوم انا ائذي حد مجتهد.. والله الكلام ده مضايقنى جدا.. ومش عارف ليه مصرين يتعاملوا بالشكل ده، ماهو بالعقل كده.. نجاحك ده هيضرني في إيه يعني؟!! بالعكس.. أنا مبسوط بيك وبنجاحك قوي.. إنت والمطربين الشباب على الساحة الفنية بتضيفوا للأغنية المصرية. . ما تسمعش للإشاعات وركز في شغلك وبس. تامر: فعلا عندك حق... الجمهور متعصب والإعلام بيشعلل يا هضبة أنا مستحيل أقول للناس اغلطوا في الكبير وبعدين أنا بعتبرك مثل ليا، وبحبك جدا، وبعدين انت كنت ومازلت "السوبر ستار" بالنسبة لي، ومفيش حاجة مهما كانت ممكن تأثر على مكانتك، لأن اللي انت عملته يعتبر درس لكل حد بيدور على التميز وإثبات الذات، أنا والله أنا كنت باروح حفلاتك وانا صغير وبارمي نفسي على الجمهور عشان أسلم عليك.. بس الوضع بقى وحش قوي.. شوفت الفيس بوك والجروبات، والمنتديات واليوتيوب ؟ !! دى بقت حرب رسمى !!!! عمرو: يا تامر يا حبيبى ... المنافسة دايما فى الشغل، زى لعيبة الكورة بيقطعوا بعض فى الملعب ويخلص الماتش يسهروا مع بعض،الموضوع خد أكبر من حجمه ... إنت ليك جمهورك محدش ينكر،بس مش معنى ليا جمهور يبقى يحبنى ويكره غيرى . تامر: ألا صحيح يا هضبة ليه رميت الكانز في اعلانك الاخير عشان الكلام كتر ولازم اسألك؟ عمرو: الفكرة إننا بنقول إن المية بتغني عن اي حاجة.. عادي تسويق تامر: طب ما إنت قعدت سنين تعمل إعلانه !!! "عمرو" : رأيي الشخصى من عدمه لايؤثر على الحقيقة فى شئ ... ولكل مقام مقال .... بس مش يقولوا أجرى 40 مليون فى مسلسل أصبح الصبح ألاقيك بتقول واخد 80 مليون !!! "تامر" : إشااااعة ... ونفيتها فورا وقعدت أضحك عليها كمان !! عمرو: بس انا مبسوط بيك عشان ابتديت تتغير وكلام اغانيك كمان تامر: لو تقصد الإفيهات أنا خدت بالى منها بعد تعليقات الكبار زيك وزى الأستاذ هانى شاكر وماتنساش إنها للأفلام والدعاية وبرده شباب دلوقتى غير زمان يا هضبة ... بس وعدت ووفيت ودلوقتى أنا مركز فى شغلى وبعدت عن المهاترات . عمرو: كده أحسن، الفنان الصح يبعد عن المهاترات الفارغة ويركز فى شغله.. وبعدين ايه موضوع القسم ده اللي انت دخلته عشاني في لبنان؟ تامر: كلام سمعته معجبنيش عنك وعن شيرين كمان ومقدرش اسكت وحد بيتكلم عنكم غلط . عمرو: عارف يا تامر.. أنا بقالى 30 سنة بأغنى ... منهم حوالى 20 سنة من غير لا دش ولا موبايلات ورنات وبلوتوثات، ونت ويوتيوب والكلام ده، يعنى اللى إتبنى فيهم مش سهل.. في وقت كانت الإمكانيات فيه محدودة.. إنت وزمايلك حظكم حلو، دلوقتى سهل قوى تبقى نجم.. لكن الصعب تستمر في الزحمة دي. تامر: والله يا هضبة عندك حق.. وبعدين لولا نجوميتك مكانش جيلنا ظهر . عمرو: ولو عالنجومية.. أكيد يا تامر إنت بقالك جمهور، وشغلك فيه مجهود.. وكل ماتركز فى شغلك هتبقى أحسن وتستمر أطول.. وخلي بالك إن الناس ممكن تكون لئيمة... تبقى بتشتم فيك وهية حافظة كل شغلك.. أنا ياما كان بيتقال عليا زمان.. انت لسه ماشفتش حاجة يعني "يضحك هو وتامر".. ولو أنا كنت ركزت في كل كلمة اتقالت عني مكنتش وصلت للي أنا فيه دلوقتي. وعلى فكرة اللى له بديل يبقى ملوش ثمن.. خد بالك من الكلمة دى تامر: والله عندك حق... فيه ناس أكل عيشها في توليع النار، نفسى يبطلوا كلام وإشاعات بقى، وكفاية جروبات عالفيس بوك، وناس تهاجم ناس، وكل ما الواحد يعمل حاجة تتفسر بطريقة غلط.. وعمراوي وتمراوي، كأني واقف ابيع بلح. عمرو: حلو موضوع البلح ده على فكرة "يضحك وينظر للكلماوية قائلا" بصوا بقى يا شباب.. أنا عايزكم توصلوا كلامي ده لكل حد بيحب "عمرو دياب".. عايزكم تقولوا لهم إن اللي بيحبني بجد، لازم يحب كل زمايلي، ومينفعش يغلط في أي حد منهم، وكمان لازم يعرفوا إن مش جمهور "عمرو دياب" اللي يتصرف بالشكل ده.. لأن أنا عمري ما هكون مبسوط لما حد يشتم زميل ليا. تامر: هو ده الكلام يا هضبة.. إنت فعلا قدوة لينا كلنا وكل يوم بنتعلم منك حاجة جديدة بجد. عمرو: طب إيه رأيك بقى يا تامر لو عملنا حاجة نقضي بيها على كل الإشاعات دي تامر: إيه؟ قول يا كبير عمرو: إيه رأيك نتعاون مع بعض وتلحن لى أغنية تامر: يارييييييت.. أنا نفسي ده يحصل من زمان عمرو: يبقى اتفقنا تامر: طبعا اتفقنا.. بس سيبك...أنا مبسوط برأيك. عمرو: تصدق يا تامر ... إنت طلعت غير ما بأسمع عنك خالص تامر: ضريبة الشهرة بقى هههههههههههه عمرو: عندك حق طبعا ده حوار من خيالنا.. ونفسنا يتم بجد.. عشان النجمين يفهموا جمهورهم ان مفيش داعي لكل الكلام الغريب اللي بيحصل ده، وإن نجاح فنان مش معناه انه بيقلل من نجاح فنان تاني، لأننا كلنا عايشين في بلد واحد و المفروض نفرح لما مصر تطلع نجوم كبار بيرفعوا اسمها و يجيبوا جوائز باسمها رؤية ومونتاج الفيديو.. دينا عشري فريق عمل الحوار.. طارق سعد- رغدة صالح- سعيد محمود شكر خاص... حسين هاشم – شروق حسني- اسراء عادل- احمد علاء شوفوا رسالة عمرو دياب وتامر حسني لجمهورهم على KTV بس http://www.facebook.com/KTVegy
