مش عارفة ليه يا جماعة حاسة إن اليومين دول قل قوي مفهوم الرجولة،حتى عند الرجالة نفسهم،على فكرة أنا مش متعقدة خالص من الرجالة،بالعكس أنا بحس إن كلمة "راجل" دي كلمة كبييييييييرة قوي، و ليها هيبتها، و ليها أخلاقها اللى مفروض يتحلى بيها كل راجل، لكن للأسف الأخلاق راحت،و بقت الكلمة بتعبر بس عن النوع في شهادة الميلاد والبطاقة الشخصية !! مش هطول عليكم، و هحكي لكم القصة اللي خلتني أقول كده،وهسيب لكم انتم الحكم. مرة كنت راكبة "ميني باص" ومروحة، الجو هادي وجميل ومافيش أي دوشة لدرجة إني كنت هنام!، لكن فجأة سمعت صوت ست قاعدة قدامي، بتقول للراجل اللي جنبها "ما ينفعش كده يا أستاذ ..انت كل شوية تنام على كتفي؟!".. وتوقعت إن الراجل يا إما يكون قصده يعاكسها، و في الحالة دي هيحترم نفسه من غير كلام، يا إما مش قصده، و في الحالة دي هيعتذر لها، و يبقى كده الموضوع خلص، ونعرف ننام تاني !! لكن الراجل المحترم، فتح على الست رشاش شتايم و زعيق - مع إن شكل الست ومظهرها محترم جداً وسنها مش صغير- والست مش قادرة تعمل غيرإنها تقول له "احترم نفسك".. بصوت مبحوح ومخنوق بالعياط. شنبات يقف عليها الصقر المهم إن باقي ركاب "الميني باص" واللي أغلبهم رجالة،و منهم عدد كبير من "الصعايدة" أصحاب الشنبات اللي يقف عليها الصقر، كانوا ساكتين خالص, وكأن المشهد ده بيحصل في بلد تانية مش على بعد سنتيمترات منهم! ماتش ملاكمة في الأتوبيس وتطور الموضوع بين الراجل و الست،لدرجة إن الراجل ضرب الست "بوكس" على أنفها، اللي فضلت تنزف وتشتمه، وهى مذهولة ومش مستوعبة اللي بيحصل لها!! وأخيرا اتحرك الرجالة الشجعان، وأخدوا موقف إيجابي موحد ، فقالوا للست بمنتهى الحمشنة والخشونة : " عيب يا ست كده .. ما يصحش!!!" طبعا أنا اتضايقت جداً، و خرجت عن شعوري، لدرجة إني قمت وفضلت أزعق لكل الرجالة اللي في "الميني باص" و قلت للست : " معلش أصل الرجالة ماتوا!!" وطبعا مش هوصف لكم منظر الست كان عامل إزاي، لدرجة إني والله كنت هعيط من شكلها المصدوم, وفضلت طبعا تزعق و تقول له "والله ما هسيبك إلا عند القسم" وفضلت يا عيني تستنجد بالناس، وتسألهم : "حد هيشهد معايا"، و طبعا الخرس صابهم جميعاً!، لكن أنا أخدتني الشهامة والحمشنة - مع إني بنت - و قلت لها : " أنا هاجي معاكي". الشهامة المصرية وشوفوا بقى اللى يفقع المرارة، اتنين من الرجاااااااالة قوي اتبرعوا ونزلوا مع أخينا عشان يشهدوا معاه!! وعمار يا مصر .. وعمار يا رجولة !!