حوار: سارة سعيد - نسمة زعزوع .. تصوير: أحمد نشأت عندما حدثت الثورة..شاهدنا أحداثها وتابعنا تفاصيلها، فتبادر لأذهاننا أننا رأينا كل هذه التفاصيل من قبل، وكأني شاهدت الثورة قبل حدوثها.. فقد رأينا كل هذا في رواية "ثورة 2053"، التي كتبها المهندس محمود عثمان سنة 2007، ثم كتب الجزء الثانى (ثورة 2053..البداية مرة أخرى)، وقد روى فيها ما شاهدناه في ثورة 25 يناير، فقد تنبأ بالثورة بكل تفاصيلها..تنبأ بمصر الآن، حتى إن قراء الرواية تبادر إلى أذهانهم فورا أن محمود عثمان هو المحرض على هذه الثورة. وقد التقينا الروائي والكاتب المصري محمود عثمان، الذي بهر كل من قرأ كتابيه قبل وبعد الثورة، بعد صعوبة شديدة في الوصول إليه، لنقدم لكم صورة مشرقة لرجال مصر، ويدور بيننا هذا الحوار. دي أجزاء من الحوار معاه.. واللي عايز يكمل الحوار يجيب عدد كلمتنا لشهر مارس 2011. إزاي الرقابة مامنعتش الكتاب رغم إنه كان بيشجع على ثورة ضد النظام؟ مفيش رقابة تجيز نشر كتاب، أنا أخدت رقم صادر من الهيئة العامة للكتاب، وسلمت عشر نسخ وبطاقتي في خلال 3 شهور من صدور الكتاب، إنما مفيش كتب اتمنع نشرها، ممكن بعد ما نشرت تم منعها لأن أمن الدولة مش غبي، وبيمنع الكتاب اللي بينتشر بصورة غير رسمية، والكتب اللي مش عايزين أصحابها يشتهروا، بيسيبوه ياخد دوره الطبيعي. وهم عارفين إن مليش علاقة بدور نشر، ولا بالأوساط الثقافية، ولا فيه ناقد هيكتب عنى، فكانوا فاهمين إن كام واحد هيقرا الكتاب وخلاص، حتى الموزعين كانوا مرة يحطوه في الصدارة، ومرة تانية يخفوه. ليه ما شاركتش قبل كده في تظاهرات على الرغم من تنبؤ روايتك بالثورة؟ أنا ماكنتش بمضي على بيان، لأن ليا رأى مختلف، وكنت واضح معاهم انى ما أقدرش أكون جزء من مطالب محددة، زى تعديل الدستور، لأن جوهر الدستور مش موجود في الأساس، وهو إعلان حقوق، فما أقدرش أطالب النظام اللي حط الدستور عشان يكرس السلطة في إيده و يمنع أي تغيير، كمان كلمة "مطالبة" غلط، لأن لازم قوة مجتمعية تفرض حقوقها بقوة على أرض الواقع، زى حق الحرية، وقلت لهم لو بقى فيه دعوة لعصيان مدني عام، أو مظاهرة مليونية بغرض إسقاط النظام، هكون معاكم. عرفت إزاي عن ثورة 25 يناير؟ مجموعة من القراء كانوا ناشطين رئيسيين في حركة "كلنا خالد سعيد" و"الجبهة الوطنية للتغيير"، وماكانش ليهم علاقة بأي نشاط قبل قراءة الرواية، ولما قرأوها بعتوا يقولوا لي إنهم أصبحوا نشطاء في الحركات دي، وبالتالي كل الدعوات للثورة كان عندي علم بيها منهم. دعيت حد للمشاركة في الثورة؟ كل القراء اللي بعتوا لي كانوا موجودين فى ميدان التحرير، بس كتير من أصدقائى ماراحوش، وتعمّدت لمّا رحت ميدان التحرير، ما أصطحبش معايا حد، حتى القراء اللي اتصلوا بيا وكانوا في الميدان، تعمدت ما أقابلهومش. قلت في روايتك إن اجتماع مجموعة أشخاص حول فكرة واحدة ممكن يمثل خطر على الدولة.. هل وصلنا للمرحلة دي فعلا؟ فعلا وصلنا للمرحلة دي، وهديكي مثال، عمرو خالد كان بيجمع متطوعين لمحو أمية القرى، والجهة اللي وقفت قصادة كانت أمن الدولة..النظام كان فى غاية الضعف والخوف بسبب الرغبة المحمومة فى الحفاظ على الكرسى، بحيث يلغى البلد كلها وراه ..فالأولوية عنده إنك تخاف، وبالتالى أول ما نتكتل حوالين فكرة.. الخوف بينحسر، والشجاعة بتطرد الخوف. طيب إيه مواصفات الرئيس القادم؟ كده هرجع تانى لفكرة جوهر الدستور، والناس اللي كانت في ميدان التحرير كانوا بيقولوا هو لازم يحكمنا ريس..مش لازم بني آدم نختلف عليه..مش عايزين أسامي..نخلي كل شوية يمثلهم حد. إيه قراءتك للأحداث الحالية؟ أنا ماعنديش قراءة معينة، لكن لما نزلت ميدان التحرير وأقمت المدة دي، اكتشفت إن كل الأفكار اللي كتبت عنها، أو تبنتها فى حياتي، كانت أفكار نظرية، وقيمة الحرية الحقيقية بتتعلمها من ناس كسرت كل الحواجز وقررت يا تعيش يا تموت بيها. الناس دى ماكانش عندها مرجعيات ثقافية، فتعمدت أبعد عن الدايرة اللي كنت بنتمي لها، وأقرّب منهم، وكنت كل ساعة بصراحة بتعلم حاجة، ما كنتش بنام أكتر من ساعة أو آكل في مكان واحد مرتين، ومش بتكلم، بسمع بس، لأن الناس دي أكثر قربا لحقيقة الحرية واحترام الآخر ورفض الرموز والتفويضات، وأكثر قدرة على التعبير عن إرادة التغيير. أنا أقدر أغيّر حاجة صغيرة، لكن لو هتخيّرنى بين إني أموت أو أغيّرها، فهغيّرها، فالناس دي علّمتني من أول وجديد، وأعتقد إن أي حد راح التحرير كزائر، وما قعدش مع الناس اللي باتت 15 يوم في الشارع، خسر حضور أكبر وعي جمعي حدث فى تاريخ البشرية منذ نشوئها، كمان هيفقد كثيرا من القدرة على رؤية المستقبل، واتجاهات التغيير والقدرة على التفعيل والتغلب على الخوف تماما، حتى بالمقارنة مع أهلي أو أولادي هختار القيم اللي هتضمن مستقبلهم كلهم. لو فيه جزء تالت للكتاب هيكون عن إيه؟ و هل هيتناول فكرة الوعي الجمعي اللي قلت عليها؟ أنا فعلا قربت أنتهي من كتاب جديد، بس مش جزء تالت، دي حكايات من ميدان التحرير، لسه الاسم ما استقرتش عليه، وهبقى مجرد راوي، بحكي عن اللي اتعلمته، والقيم اللي شفتها، لأن ما أقدرش في اللحظة دى، أتخيل أو أدعي، وطبعا ماكنتش قادر أكتب فيه ولا كلمة خلال الأحداث، لأني كنت عايش الحدث نفسه، بحدف طوب وبنقل المصابين وبشوف مين مات، فماكانش فيه مجال لأي نوع من الكتابة. إيه سر عداء شخصية (غريب) للتكنولوجيا؟ هو مش عداء للتكنولوجيا، لكنه عداء للتواصل اللاإنساني..الموبايل فى رأيي دمّر كتير من القيم اللي كانت موجودة فى المجتمع..فغريب استخدامه للتكنولوجيا كان مُقنّن. ليه ما اتعاملتش مع أي دار نشر وأنتجت الكتاب على حسابك؟ كان فيه دور نشر مستعدة تنشر لي الجزء الأول، لكن الجزء التانى ماحدش عرض ينشره خالص، وكمان أنا كنت عايز أتحكّم في التوزيع، وأعرف عدد القرّاء اللي اشتروا الكتاب، وفه مشكلة دائمة بين دار النشر والكاتب في الجزئية دي، أنا ما كسبتش حاجة من الرواية، لكن كانت تهمني أرقام التوزيع، عشان اعرف حجم جمهوري. إمتى بدأت كتابة الرواية؟ فى لحظة من حياتى، كان المفروض آخد خطوة في الاتجاه التنموي اللي بمارسه على المستوى الشخصى والوطني، بس نتيجة لفساد شديد، شغل خمس سنين توقف فجأة، واضطريت أبتدي طريق تانى، وفى أثناء الطريق ده، كنت منتظر ردود من شركات بره، وعندي شهور فاضية، فطلعت ورق قديم لرواية كنت بكتبها سنة 1995، اللي هي تقريبا معظم الجزء الأول من "ثورة 2053 البداية". والسبب اللي خلاني أتوقف عن الكتابة إن الرواية كانت بتدور في عام 2010، لكن أحداث كتير من اللي مش عايزها تحصل، وبنبه لحدوثها، لقيتها حصلت سنة 1997 و 1998، فحسيت إن الأحداث أسرع مني، فتوقفت..وخلال فترة انتظاري للردود كتبت الجزء الأول، وكتبت الجزء التاني بعد ما عرفت ردود أفعال القراء، ولقيت حماسهم للقراءة، ومتابعة الأحداث.