بنبرة تملؤها الحزن والمرارة فتح عماد متعب قلبه "لأخبار الرياضة" ليتحدث بكل صراحة عن أزمته الأخيرة، وحقيقة القبض عليه، الاتهامات التي وجهت له. بادرني متعب قائلا: أنت عارفني من ساعة ما طلعت من فريق الشباب، تعرف عني كدة؟ "أخبار الرياضة": وغيا من الماضي، وننسي الصداقة ونقول الحقيقة كاملة بدون أي تجميل، ولارتوش. متعب: أنا عايز كدة.. ومش عايز أكثر من كدة.. الحكاية وما فيها أنا كنت مع زوجتي رايحين مول "داون تاون" في التجمع الخامس، وركنت سيارتي في مكان مطمئن له، وبعد عودتي من جولتي بالمول مع زوجتي وجدت السيارة "متكلبشة"، فذهبت لمكان أمين الشرطة لاستفسر عن السبب، فقال لي انها واقفة في مكان ممنوع الانتظار فيه، وطالبني بخمسين جنيها غرامة والرخصتين، فبصراحة اندهشت واستغربت لان هناك سيارات أخري واقفة مثلي، وفي نفس المكان، ولم يتم كلبشتها، وأنا الوحيد اللي كلبشوا سيارتي، فرفضت دفع الغرامة أو تقديم الرخصتين، يعني هي الخمسين جنيه هتفقرني أو هتفضلني بين القصة بالعقل.. المهم تطور الموضوع مع أمين الشرطة وعلينا صوتنا علي بعض زي ما بيحصل في أي مكان، ومع أي حد، بس بدون تجاوز مني ولا من الأمين. أخبار الرياضة: وبعد كدة أية اللي حصل؟ متعب: أبدا.. روحت لزوجتي وقلت لها اتصلي بحد ييجي يخدك، عشان الموضوع شكله هيطول ورجعت عند الأمين، وحضر ضابطان، ولاحظت ان احدهما مشغل الموبايل فيديو، والتأني بدأ كلامه معي "المسدس اللي في جنبك ده مرخص" قلت له طبعا، قال لي :طب وريني رخصته" وفعلا لان السلاح مش لعبة وما ينفعش أمتنع عن تقديم رخصة السلاح في الجو المكهرب اللي مصر بتعيشه ده، قدمت الرخصة، فطلب مني السلاح عشان يطابق بالرخصة، فخلعت الخزنة من السلاح، وقدمته له، عشان الامور ما تتطورش، ولكن للاسف ما توقعته حدث فوجدت الضابط بيقول لي "وحياة.... أنا هوريك،، وهلبسك محضر أنك بتهددنا بالطبنجة، وهتشوف أيه اللي هيحصل لك، والعربية دي هتترفع بالونش".. أخبار الرياضة: ماذا كان رد فعلك؟ متعب: سكت لاني شوفت التصوير بالمحمول، وحسيت أن حد عايزيني انساق واغلط، فسكت، ولكني قلت وحياة أمي العربية محدش هيجي جنبها، ووقفت امامها.. بعد كدة حضر ضابط رتبة كبيرة - تقريبا عميد- وتكلم معي بمنتهي الذوق وقال لي: "ينفع نجم زيك يحصل مني كدة" فقلت له: "طب حضرتك بتكلمني بكل ذوق أنا حدث مني حاجة غلط، وعشان خاطر حضرتك هعتذر للامين عشان أحنا الاثنين علينا صوتنا علي بعض، وبعد كدة طلب العميد أن أحضر معه للقسم فطلبت منه الانتظار حتي تحضر حماتي لتأخذ زوجتي عشان مينفعش أسيبها كدة، وفعلاً حصل وبعدين ركب معي العميد وذهبنا للقسم، وبعد حوالي ساعة أو ساعتين ذهبت الأمور في اتجاه التصالح برغم تمسكي بأني أخذ حقي من تجاوز الضابط الصغير لانه غلط في بشكل صعب، ولكن انا لما حد كبير بيكلمني بكبر فوافقت علي التصالح، ودخلنا مكتب لواء بعد ذلك، ولكن الامناء اصدقاء الامين صاحب الواقعة طالبوا بتحويل الامر لمحضر معتقدين انني تجاوزت ضده، ويبدو أن أحدا قال لهم شائعة وأي شيء غير حقيقي، فقلت عادي نعمل محضر في النيابة، وتم فعلا، وخرجت بكفالة وأنتهي الموضوع. أخبار الرياضة وهل ذكر في المحضر تهمة قيامك بتهديد رجال الشرطة بمسدسك المرخص؟ متعب: لاطبعاً لم يذكر هذا الامر اطلاقاً وهو يؤكد صحة كلامي، يا عالم هو بالعقل كدة يعقل أن يقوم شخص عادي مش نجم بتهديد الشرطة بمسدس مرخص، يا عالم احترموا عقولنا شوية، هو أنا مجنون؟ بس بصراحة مش هكدب عليك، أنا حزين أوي للمستوي اللي وصل له الاعلام في مصر دول ناس "عايزة" جنازة وتشبع فيها لطم "عايزة" تكتب أي حاجة وخلاص، طب ما قبل كدة أنا كان في قضية عام 2005 "وأخبار الرياضة" هي الوحيدة التي تابعتها بحياد، وتم تبرئتي، ولكن ليه حاجة ليا تبكر بالشكل الغريب ده مش عارف ليه. متعب ومن ساعة واقعة 2005 وأنا كل يوم با تعامل مع رجال شرطة، والامور عادية خالص، يعني انا مش شخصية متكبرة، أنا بتعامل عادي خالص زي كل الناس، وما حدث مع أمين الشرطة مشادة عادية تحصل كل يوم، ولكن ما حدث من الضابط الصغير الذي سبني بالام صعب، ولو حدث أي تجاوز مني كان زمانه مالي "اليوتيوب". متعب: أنا الشرطة علي عيني ورأسي، وتضحياتهم وزي كل مصري حر الواحد كثير بيبكي علي الارهاب اللي بيحصل لهم ورجال القوات المسلحة، ولكن في كل مكان فيه الحلو والوحش، ولكن الاعلام فيه الضمير، وقول الحق، أيوة في ناس شريفة، لكن أصحاب الابواق المسمومة كتير بشكل غير طبيعي. أخبار الرياضة بعيداً عن المشكلة دي أية آخر أخبارك؟ متعب: أنا حددت أكتر من موعد للسفر للاماراتي، لاقوم ببعض البرامج العلاجية حتي أستطيع العودة من جديد للملاعب التي غبت عنها كثيرا بسبب التشخيص الخاطيء في الاصابة. ونفسي مصر ترجع حلوة زي زمان، ونبطل نقطع في بعض، ونحب بعض، ونقف أيد واحدة ضد الارهاب، ونشتغل عشان بلدنا ترجع تقف علي رجليها من غير مساعدات ولايحزنون، مصر حلوة أوي.
