** "يارب اجبر بخاطري" دعاء مفيش بينه وبين ربنا حجاب.. مابالك بقي والملايين بتدعي "ربنا يجبر بخاطرك ياسيسي" لماعرف خبر حادث العريش وأكمل فرحته مع أبناء الشهداء بالعيد.. ياعيني علي مشاهد الإنسانية اللي تبكي الحجر الريس بيوزع الآيس كريم والسندوتشات بإيديه علي الولاد والبنات اللي يمكن منهم كتير سنهم صغير وميعرفوش مين ده ولايعني إيه رئيس جمهورية لكنهم بيتعاملوا مع إنسان حنين ورقيق القلب ومبتسم وبشوش وبيحبوه بالفطرة وشفتم الطفلة ابنة الشهيد مرضيتش تنزل من علي صدر الريس وترجع لأمها.. وكانت أمي الله يرحمها تقولي "الحنية عمرها ماكانت تمثيل ولابتتباع ولابتتشري" عشان كده أكيد بنت الشهيد حست بحنان الأب اللي افتقدته بغياب والدها..وقسم يحاسبني عليه ربنا والله العظيم تلاته ياريس ربنا هايكرمنا معاك آخر كرم لأنك فعلاً هدية من ربنا للشعب الطيب الجدع ده وكل حاجة فيك بجد وبحق وحقيقي وأصلية..وعشان بينك وبين ربنا عمار يبقي لما تقسم بالله ثلاثاً فأنت صادق لما قلت الأسبوع اللي فات "والله والله والله إحنا زي الفل" ..وإن شاءالله هاتبقي قد الدنيا وتحيا مصر. ** هاجيب من الآخر ورزقي ورزقكم علي الله.. وللمرة الخمسين أقول لن ينصلح حال الإعلام والدراما إلا بوضعهما تحت مسئولية كيان وطني قوي مابيهزرش في شغله طالما إن المسئولين عن "المرحوم ماسبيرو" في الطراوة وجابوا جوان وش سليندر..وبصراحة وبدون مبالغة ولامصلحة شخصية مفيش غير اشتراك إعلام المصريين مع مجموعة المتحدة للخدمات الإعلامية مع منصة "watch it" ويتم من خلالهم تشغيل ماسبيرو.. وأعتقد أن القائمين علي هذه الجهات هايعجبهم كلامي وكمان أهل ماسبيرو هاينبسطوا عشان هايرجعوا خلية نحل زي زمان وهاياخدوا فلوس محترمة. ** من يوم 25يناير2011 باقول إن دي مؤامرة علي مصر.. والحمدلله كل يوم بيطلع دليل علي صحة كلامي وآخر حاجة فيديو أمريكي يكشف اتفاق أوباما والاستبن علي بيع 40% من سيناء لحماس وضمها لغزة بمبلغ 8 مليارات دولار.. باقول كده عشان نبص حوالينا كويس هانلاقي سيناريو مؤامرة 2011 بيتكرر بالنقطة والحرف والكلمة لكن جيشنا عرف يلم البلد في إيديه وحطها في عينيه والشعب فهم الفولة وقف ورا جيشه لحد ماخلصنا من الإرهابيين والخونة والحنجوريين والاشتراكيين والثوريين والبدنجانيين والمدعين والأجندات..وإذا الشعوب حوالينا مافهمتش الفولة بدري بدري نقول علي بلادهم بالسلامة والقلب داعيلكم..!! ** يارب احفظ سوريا وليبيا والسودان واليمن والعراق من كل مؤامرة واحفظ شعوبها من كل شر..آمين. ** اللواء محمد الشريف مدير أمن الأسكندرية..كلما سألت حد عنك يقول ده راجل أمن صحيح .. شغل في هدوء وصمت ..مش غاوي شو إعلامي خالص..حاسم وحازم.. إنسانية عالية.. والخلاصة نموذج محترم لرجل أمن زي الكتاب مابيقول. ** محافظ المنيا.. مايهمكش من أي حد اسمه أحمد حسن ..سيادة المحافظ نفذ القانون علي الكل..!! ** الأهلي تقدم للفيفا بشكوي ضد الجبلاية ..والزمالك بيهدد الجبلاية بعدم استكمال الدوري بدون لاعبيه الدوليين..بذمتكم حد زار جنينة الحيوانات وقدر يدخل جبلاية القرود..سؤال بريء ..!! ** أحمد السقا اللي شفته من يومين في برنامج غير أحمد السقا وهو صبي كنت بشوفه مع والده الراحل الكبير عمنا صلاح السقا..نضوج.. ثقافة.. هدوء.. احترام شديد لزملائه.. وهزم عمرو أديب بالقاضية الذي أنصحه باعتزال تقديم البرامج..!! ** محمد سامي.. من كذا سنة ماكدبتش لما قلت عليك مخرج بيشتغل بره الصندوق.. ومسلسل عن التاني بتثبت كلامي..برافو. ** تسلم دماغ اللي فكر في إنشاء قناة تايم سبورت..قفا علي سهوا لبتوع قطر.. هانشوف ماتشات بطولة أفريقيا غصب عن بوزهم..!! ** كامل أبو علي راجل وطني محترم نظم احتفالية محترمة في شرم الشيخ بمناسبة أعياد تحرير سيناء ومن يومين نظم رحلة سياحية لحارس ريال مدريد "نافاس" في الغردقة.. لو كل رجال الأعمال والمنتجين قلدوه ..السياحة هاترجع أحسن من الأول..بس مين يسمع..!! ** محدش هايحاسب خالد يوسف..واللا إيه..!!