** بذمتكم شفتم كده.. يطلع من افتتاح محطة صرف عملاقة ويركب العجلة في الفجر ويحضر طابور الصباح في الكلية الحربية وبعد ساعتين يسافر النمسا ويرجع يروح جبل الجلالة في الفجر وبعدها يفتتح أكبر مشروع للصوب الزراعية في العالم بشهادة أسبانياوالصين ودول بقي مالهمش في الشاي بالياسمين.. وبدون مصلحة أقول: الرئيس السيسي عارف طريقه كويس وانطلق بقطار تنمية مصر ومحدش هايعطله حتي لو كان مين.. ده راجل بيشتغل النهاردة عشان الشعب يرتاح بكرة.. وكل ده كوم وهو بيناقش المسئولين عن المشاريع ويسألهم في حاجات تؤكد أنه فعلاً حافظ مصر حتة حتة كوم تاني.. متهيألي إللي مايشوفش كل ده يبقي معداش علي مصر.. وينقطنا بسكاته أحسن عشان الناس بتضحك عليه..!! ** الله الله علي جيشك يامصر.. دفاع عن الأرض والشعب.. حماية الحدود.. إنشاء مساكن وطرق وكباري.. وكمان استصلاح أراضي وزراعة.. كل التقدير للهيئة الهندسية وجهاز مشروعات الخدمة الوطنية.. شيء مشرف ويفرح صحيح. ** عندي إحساس إن ربنا هاينفخ في صورتنا فجأة ونعمل زي الصين.. ننتج ونشتغل ومحدش يشتكي من الفقر.. لو كل واحد قرأ صفحة واحدة من تاريخ الصين هايتجنن.. مابالكم لو زارها لمدة أسبوع.. هايرجع من هناك مشي..!! ** قنوات "On- الحياة - cbc - العاصمة" وشركة بريزنتيشن.. كيانات إعلامية عملاقة تتبع مجموعة المصريين التي أصبحت تشكل وجدان المصريين.. يارب نشوف مجموعة مماثلة تتولي أمر الخواجة ماسبيرو يمكن ربنا ينفخ في صورته.. قولوا آمين.. ومع ذلك وحياة أغلي حاجة عندكم تفتكروا وائل الأبراشي وخالد أبوبكر وريهام سعيد وإبراهيم عيسي وحاتم بطيشة وإبراهيم عبد الجواد وكريم خطاب ممكن يرفعوا نسبة المشاهدة.. صدقوني.. لأه.. لأنهم بدون أنياب إعلامية وانكشفوا خلاص.. وعلي فكرة.. مشاهدو توفيق عكاشة لوحده قد دول كلهم عشرين مرة.. وانتم عارفين ده كويس.. يبقي ليه بقي..!! ** أثناء مشاهدة مباراة لمحمد صلاح في القهوة تقابلت مع بعض الصنايعية "كهربائية - نقاشين - مبيضين محارة.. وغيرهم" قالوا: "لما بنروح مشروعات كبيرة بنلاقي مقاولين واخدين الشغل لحسابهم وعاوزينا نصرف علي الشغل لحد ماناخد أذون الصرف.. وده مستحيل لأن معندناش فلوس تكفي".. وياريت ناخدالشغل مباشرة من الحكومة لأنها مش هاتاكل حقنا وكمان بنثق فيها.. ممكن د.مصطفي مدبولي -وزير الإسكان- يشوفلنا أي حل..!! ** بالنسبة لحالة الاستخفاف علي الفيس "زفت".. كل حد فاهم دمه خفيف بيتريق وخلاص.. زي ممثلة أكل منها الزمان وشرب وأخدت بمبة أمريكاني عايشة في دور المناضلة.. دي قلة أدب وحيا وأخلاق.. إللي زيكم خسارة يعيش هنا.. يابتوع حرية الرأي وحموم البتنجان ..!! ** فجأة هاصت الدنيا عشان تركي آل الشيخ أجل زيارته لنادي الزمالك.. الجماعة إياهم هاتك ياتسخين وشعللة.. وتركي واللا هو هنا.. واضح إنه فهم الفوله كويس.. ياهلا بيك. ** بجد وبدون نفاق ولامجاملة.. اللي يتابع الدوري السعودي يصعب عليه حال الدوري بتاعنا.. بصراحة حاجة تجيب حالة نفسية..!! ** هانت وأمريكا هاتشرب من نفس الكاس قريب قوي.. وإللي أكلته "وز.. وز" من العرب وفرنسا هايطلع "بط.. بط" علي عينيهم..!! ** يانهار مش فايت..إعلام إيه التافه ده إللي ينشغل قوي بفستان رانيا يوسف لمدة شهر.. ده فيه واحد عمل حلقتين عن البطانة إياها.. يخرب بيت عقلك يارانيا.. كنتي فين من كام سنة عشان نشوف هيافتهم..!! ** ربنا سبحانه وتعالي ترك الإيمان والكفر للإنسان يختار علي مزاجه "فمن شاء فليؤمن ومن شاء فليكفر".. يبقي ليه بيهاجموا "دينا أنور" عشان بترفض الحجاب.. ماتسمعوا كلام ربنا وسيبوها بحريتها..!!!! ** مش يمكن لما ترامب يسحب جيشه من سوريا يكون ده حكمة من ربنا عشان يفك كرب سوريا علي إيد جيشها وشعبها ويطحنوا داعش واللي جابوهم "أمريكا"..!! ** تخيلوا ماسبيرو عمال يستلم سيناريوهات مسلسلات بالهبل ويبعت للقراءة.. ياتري الخواجة مش عارف إنه هايلبس البيجامة قريب.. عجايب..!!