من أول ما ربنا سبحانه وتعالي خلق مصر وعمرها ما كانت سايبة.. ولا عمر حد نجح انه يوقعها.. عشان كده من ساعة "25 هباب" محدش قادر يلعب معاها لأن فيها رجالة بحق وحقيقي حاطينها في عينيهم اللي مش بتغمض عنها ثانية واحدة وشايلينها فوق رأسهم عزيزة مكرمة.. ولأن الرجالة دي مصحصحين فإن الخونة والعملاء والمأجورين يتساقطون زي الفراخ وآخرهم معصوم وعصابته اللي اترموا في حضن الإرهابيين وبيتآمروا معاهم ضد البلد.. وبالنسبة للندابين اللي بيولولوا أقول طالما نيابة أمن الدولة حبستهم يبقي تخرسوا خالص عشان إجراءات الضبط والإحالة متكاملة الأركان ومفيش شبهة تلفيق ولا حاجة لا سمح الله ويا ريت تبطلوا كلامكم الخايب انه اتمسك عشان بيطلب عمل مظاهرات لأنه مدان ومتورط من ساسه لراسه.. وفطست من الضحك علي المحامي بتاع الصباع إياه وتخريفه علي السوشيال زفت.. وهاتفضلي محروسة يا مصر من ربنا ثم رجالتك الجدعان.. وتحيا مصر. أجمل وأجرأ وأجدع قرار صدر من ولاد الكحكي من يوم ما عرفناهم هو تعيين عمرو الليثي رئيسًا لقنوات النهار.. فهو أول متخصص ومهني يتولي أمور القناة فقد عمل بالإخراج والتأليف والإنتاج والإدارة وتقديم البرامج ولديه كاريزما ولم يحاول في أي وقت التسخين والتوليع زي وائل البراشي وإبراهيم عيسي.. ولكن للأسف عنده واحد اسمه محمود سعد يمارس هوايته في شعللتها وبث السموم من تحت لتحت ولازم الليثي يخلص منه فورًا حتي لو جايب إعلانات بمليار جنيه لأن البلد أهم بكتير من الفلوس.. وننتظر عودة أمجاد المرحوم ممدوح الليثي اللي كان بيصرف علي ماسبيرو من قطاع الإنتاج لزمن طويل.. ولا أملك سوي الدعاء لليثي بالتوفيق وان ربنا يكفيه شر التعابين والعقارب.. قولوا آمين. تركي آل الشيخ: لن أتوقف عن نصحك.. وانت متصور في غرفة الإنعاش لعدة ساعات وقلت للجماهير خلوا عندكم روح رياضية وادعو لي بالشفاء شفت قالولك إيه.. لأنهم لا ينسون مبادئ الأهلي وصالح سليم والخطيب.. ويا عم تركي الأهلاوي الحقيقي مش التايواني عمره ما يعمل كده علي الفيس ولا يستفز ويعاير الناس.. وللمرة الخامسة باقولك.. من فضلك توقف عن الكتابة علي السوشيال ميديا.. عشان مصلحتك.. وربنا يشفيك ويعفو عنك. الأهلي طول عمره مدرسة المبادئ والأدب والأخلاق ولا يهزه ريح.. وأكبر من انه ينزل من برجه العاجي.. عشان كده بيوجع قوي لما بيسكت ولا كأنه بيشوف ولا بيسمع.. والله يرحم صالح سليم مايسترو مدرسة الباشوات والجنتلة والتناكة والكرامة.. وبرافو تلميذك محمود الخطيب. مرتضي منصور.. كل ما يسكت ويطنش بيبقي أقوي.. ده رأي الزملكاوية اللي بجد مش مضروبين.. وانتم عارفين إني أهلاوي..!! بدون مجاملة ولا انحياز.. خالد كامل أحسن معلق كرة قدم.. هو الوحيد اللي مش بيرغي في الهلس وبيركز في الماتش والكورة.. مش زي غيره اللي غاويين هرتلة ومجاملة فريق تعبان وبيحاكموا اللاعبين والحكام وعاملين فيها أبو العريف..!! أيووووه يا جدعان.. الحقوا يا رجالة.. الديزل بقي بابور بيمشي بالفحم من أول يوم في السينما وتامر حسني لبس "البدلة" إياها ودغدغه وكسر عضمه وكشفه عشان يفوق ويعرف انه محصلش حتي "نمبر زيرو".. وانكشف محمد رمضان علي حقيقته ويواصل الغرق واحدة واحدة ويطلع فقاقيع من مراخيره وبيسقط تاتا تاتا.. ولو كنت منه وبحترم نفسي خصوصًا لو مفيش تاريخ آخد فوايد الملايين اللي في البنك وأسافر القطب الشمالي أمثل هناك.. ارحمنا بقي واحرمنا من موهبتك الفذة.. ومش هانزعل عليك..!!
