يارب أكون غلطان ومش حازعل لو حد قال عني غبي ولا أفهم في السياسة .. بل بالعكس أتمنى أطلع غبي وحمار كمان في السياسة وسعد الصغير أوعى مني بشؤونها . المهم م الأخر .. المجلس العسكري مش ناوي يمشي ومفيش انتخابات رئاسية والاضطرابات حتكتر اوي اليومين الجايين وفيه ناس كتير حتموت .. والفوضى حتعم أرجاء المحروسة اللي مبقتش محروسة من حد .. الكل قاعد يحسبها ومش عايز حسبته تخرب او تبوظ " من البوظان " .. محدش بيحب مصر إلا شوية شباب لسه قلوبهم نظيفة ومش طمعانين لا في سلطة ولا يحزنون .. إنما مثلا اللي مرشحين نفسهم للرئاسة باستثناء واحد أو اتنين على الأكثر مفيش حاجة تهمهم غير مصلحتهم .. ولسه بنفس اللهجة العفشة بتاعت نستنكر ونشجب وندين بشدة.. كسبنا صلاة النبي .. الناس قاعدة تموت زي الفراخ تحت عين وبصر المجلس العسكري والداخلية .. واللواء ممدوح شاهين في مؤتمر صحفي " لامم " شوية مقاطيع " سقيّفة " : احنا مش ممكن نقتل مصري أبدا .. مش في عقيدتنا. هو عنده حق - اقصد اللواء شاهين - لأنه يراهن على " آفة حارتنا النسيان " .. مفيش بقى صحفى " دكر" ولا صحفية " راجل " ترد وتقوله : امال اللي ماتوا في ماسبيرو مين قتلهم .. واللي ماتوا في مجلس الوزراء واللي ماتوا في بور سعيد واللي واللي .. لا كله حط جزمة في بقه وسكت .. لأ .. ومش بس سكت .. كمان " بيسقف " .. يا خي " ... " .. ولا بلاش .. عيب .. لا تقولوا عليا قليل الأدب ، مع ان قلة الأدب هنا فرض عين واروح انا فين جنب قلة الأدب الحقيقية اللي قاعدين نشوفها من ده وده وده ؟ عموما من ساعة ما صدر حكم قضائي بمنع تصدير الغاز لإسرائيل وانا الفار بيلعب في عبي .. صحيح انه حكم المفروض اني افرح بيه كمصري ، لكن الفار ابن الكلب مش عايز يبطل تنطيط ، حيث تداعيات العملية دي ونتائجها مش حتكون سهلة أبدا .. واهو إسرائيل بجلالة قدرها حشدت قواتها على الحدود المصرية واستدعت الاحتياطي بتاعها كمان .. وانا واثق 100% انها حركة " قرعة " .. يعني لا فيه حرب ولا هباب ازرق .. لكن إديني عقلك دلوقتي وخده تاني .. لو إسرائيل فعلا بتحشد قواتها وبتبيّن العين الحمرا ، واحنا قاعدين ناكل في بعض ، وكل واحد مش همه غير نفسه .. مين بقى اللي خايف ع البلد ؟ .. هه ؟ .. مين بقى اللي لو حب يمشي حنبوس رجليه ونقوله ونبي متمشيش .. حتسيبنا لمين دلوقتي .. لازم مؤسسسة عسكرية شديدة تخوف إسرائيل .. ولازم كمان رئيس عسكري " فلة " يزغر لها بعينه فتخاف وتكش .. وبناء عليه ونزولا على رغبة الشعب المصري الأجهل من دابة .. قررنا نحن أعضاء المجلس العسكري ومستشاريه من الإعلاميين المطبّلتية ، والصحفيين الأراجوزات ، الاستمرار في حكم البلاد وتأجيل الانتخابات الرئاسية إلى أن يقضي الله بأمر كان مفعولا .. يعني نسيب مصر ياجدعان تضيع ؟ .. لأ طبعا .. أصلكوا متعرفوش إسرائيل .. دي بنت جزمة .. احنا اللي عارفينها كويس .. تتمسكن لحد ما تتمكن وفين يوجعك.. ودي لا ينفع معاها حمدين صباحي ولا ابو الفتوح ولا حتى شفيق يا راجل ولا سي عمرو موسى .. أمال مين يا عم المجلس؟ .. يرد : بلاش نقاطع .. لكل حدث حديث .. حد عارف بكره حيحصل ايه؟ المهم عايز مليونية الجمعة الجاية تهتف للمجلس العسكري تحت شعار " متسبناش متسبناش .. غير العسكر مينفعناش " ويا مشير يا مشير احنا معاك في التحرير" وياعنان يا عنان حبك في قلبي زاد وبان " .. وتجاوبا مع هذه الإرادة الشعبية الطاغية ، وحرصا منا جميعا على مصلحة الأمة ومصر .. مش وقته خالص نتخانق على الكعكة ، احسن إسرائيل " بنت الجزمة " تستغل الموقف وتلهفها كلها لوحدها .. ومحدش يقدر يوقّفها عند حدها غيرنا احنا .. عشرة عمر بقى واللي ربى غير اللي اشترى ع الجاهز.. سيبونا احنا نتصرف وسك على موضوع الانتخابات دلوقتي .. مصلحة مصر أهم. ... عارفين يا عم المجلس مصلحة مصر أهم .. احشد انت قواتك واستعد لحماية البلاد وسيبك بقى من عك الانتخابات ومجلس الشعب والإخوان والسلفيين .. ارمي الجمل بما حمل على قفا واحد تاني وشوف شغلك صح .. دافع عن البلد عشان نشيلك فوق راسنا ونفتخر ان عندنا جيش قوي ومحترم .. ارمي أطماعك خلف ظهرك الآن .. البلد مهددة ولابد لها من رئيس قوي وشديد.. إلا إذا كانت المسألة كلها تمثيلية خايبة .. الغرض الوحيد منها الاستمرار في حكم البلاد وننشغل كلنا بالخطر الأهم .. إسرائيل ع الحدود .. و67 تلّوح بأيامها السودا من بعيد.. و73 ، كان حلم وراح ، انساه وارتاح .. واللي حيفتح بقه بغير كده حياخد بالقديمة .. دي مصلحة مصر يا جدعان .. ويا للا يا مغنواتية نبث الهمة تاني في نفوس الشعب المصري .. ويا اهلا بالمعارك يا بخت من يشارك بنارها نستبارك ونرجع منصورين .. ويا حبايب بالسلامة رحتم ورجعتوا لنا بألف سلامة .. وسلم لي ع الباتنجان .. وعلى قلبكم ل " طالون " واللي مش عاجبه ميبقاش مصري .. لا شرب من نيلها ولا يعرف يغني لها .. وأمر من المجلس العسكري لوزير الإعلام : من دلوقتي لحد مانشوف الدنيا واخدانا على فين .. مش عايزين غير أغنية واحدة على مدار ال 24 ساعة .. وعشان محدش من الجهلة يفتكر ان الإطاحة بمبارك هى نهاية الكون .. نعيد ونكرر .. هى أغنية واحدة مفيش غيرها وعلى مدار الساعة عشان الحمار يفهم : راجعين بقوة السلاح!!!