ماشية في حالي مش عارفة إيه اللي جرالي لقيت ناس بتشدني وتقولي تعالي أوعي تمشي من الناحية دي وطبعا لأن الفضول في دمي عالي نشفت دماغي وقولت وانا مالي أنا عايزة أمشي من الناحية دي قالولي انتي حرة بس متقوليش "محدش وعاني" دخلت الشارع لقيت زحمة وصوت عالى ناس بتحسبن وناس بتنادي ناس بتناجي وناس بتهاتي وانا برضو منشفة دماغي وقفت اسأل وابص حواليا ملقتش غير ناس بتصرخ يا عنيا وناس تانية على الأرض مرميا وناس تالتة تايهة في الدنيا وملهيا جريت وانا مش عارفة إيه اللي جرالي اصرخ واقول مالك يا دنيا معنداني وعّيني وقوليلي هو انا من الناحية دي ولا الناحية دي انا مع مين؟!!! انا مع اللي في الأرض مرميين؟!! ولا انا مع اللي في الدنيا ملهيين؟!! ولا أكونش انا من النصابييييين؟!!! اللي وكلنها والعة وشبعانييييييين؟!! اللي مولعنها نار ومش هامدين؟!!!! ردي عليا يا دنيا وقوليلي بس انا مع مين ما تريحيني وتقوليلي انا جاية منين ورايحة على فين ولا انتي خلاص مش فاكراني ولا عارفة انا حتي ابقي مين؟؟؟ تكونيش يا دنيا مكسوفة وعيزاني افكرك انا ابقي مين؟؟؟ هفكرك بس الأول قوليلي جبتي الكسوف ده أصلا منين!! انا اللي طلعتي عنيها وعين اللي خلفوها انا اللي وعدتيها وفي الاخر قولتيلهم سيبوها انا اللي وقعتي بينها وبين اخوها... ها يا دنيا افتكرتيني ولا عاملة فيها ست ابوها؟!! بس يا دنيا قوليلي بقي هو انتي بقيتي كده ليه؟! هو انتي مع الموساد ولا ايه؟! ولا تكونيش أخت بن لادن يا بنت الإيه!!! متزعليش مني يا دنيا انا بس عايزه أعرف عملتي كل ده ليه؟