زمان وأنا صغير ولما كنت بحاول اتعلم اللغة الانجليزية واللي طبعا بتكون محاولات فاشلة كنت بحاول اني القط اي كلمات بسيطة من اي مسلسل او فيلم اجنبي علشان استخدمها واتفزلك بيها قدام الناس.. ومن ضمن الكلمات اللي عملتلي مشاكل واللي اخدت بسببها علقة لطيفة هي الكلمة اللي بتكون ترجمتها بالعربي في الافلام (تبا لك) .. وفي رواية اخري (عليك اللعنة) !!! وبما اني كنت واخد قرار الفزلكه ربنا وقعني مع اكتر المدرسين شراً في عالم المدارس المصرية العجيب .. لما سمعني هذا الشرير (من وجهة نظري الطفولية) وانا بقول الكلمة دي في الحصة .. واخدت بسببها تقريبا 10 عصيان علي ايدي. والغريب بأه انه بعد لما ضربني ولان وقتها مكنتش عارف انا بنضرب ليه بعد لما استمتعت بالعشر عصيان كررت نفس الكلمة واللطيف انه برده سمعها .. بس وقتها طردني من الفصل وبعتني عند مدير المدرسة وقاله الواد دا قليل الادب .. وكان وقتها في سؤال قوي جدا بيدور في عقلي .. هو ايه المشكلة لما اقول (تبا لك) بالانجليزي زي ما شفتها مكتوبة في ترجمة الافلام .. عادي يعني . المهم قولت خلاص بلاها كلمة علشان مش اخسر مشواري التعليمي العبقري .. بس بعدها بكام سنة .. كبرت شوية .. وانتقلت من مرحلة اني انضرب من المدرس لمرحلة اني اضرب المدرس .. وهي الانتقال من مرحلة الابتدائي والاعدادي لمرحلة الثانوي .. فهمت الكلمة بمعناها الطبيعي الحقيقي .. ومن بعدها اي مدرس اشوفه في المدرسه اقوله (تبا لك) بالانجليزي .. وهو ولا كان يقدر يتكلم .. بس بصراحة لما افتكر ذكريات الطفولة .. وافتكر الموقف .. اقول لنفسي الكلمة دي فعلا عبقرية .. والمفروض انها تكون اول كلمة نتعلمها في مدارسنا .. لان هي دي الكلمة اللي هانستعملها طول حياتنا .. مين فينا مش قال لحد او قال علي موقف معين سواء بصوت عالي او في سره (تبا لك) بالانجليزي؟ اراهن ان الكلمة دي بتتقال في مصر بس 80 مليون مرة في اليوم علي الاقل .. يعني مثلا خلينا نختار اي يوم عدي علينا في بلدنا الحلوة ونشوف احنا قولنا كام مرة (تبا لك) بالانجليزي .. اول حاجة تعملها الصبح زي اي انسان طبيعي انك تقوم من النوم تاخد دش، تكتشف ان في الغالب المية مقطوعة والبواب نسي يملا الخزان .. تقول (تبا لك) بالانجليزي. ولو فلت من المية وكانت موجودة هتلائي النور يتقطع فبتلقائية شديدة تقول (تبا لك) بالانجليزي. تنزل من بيتكم الصبح تشوف البواب مشلفط العربية علي اعتبار انه نضفها .. تبصله بمنتهي الهدوء وتقوله بابتسامة عريضة (تبا لك) بالانجليزي. مش هاتكلم عن الزحمة وانت رايح شغلك لان الكلام فيها استهلك جدا .. بس هاتقول علي الاقل خمس او ست مرات في الطريق (تبا لك) بالانجليزي. وانت بتدور علي مكان تركن فيه وتدفع العشرة جنيه علي الصبح لأمين الشرطة .. تقوله (تبا لك) بالانجليزي. تطلع تشوف مديرك بيقولك اتأخرت ليه يا استاذ تقوله وطبعا في سرك (تبا لك) بالانجليزي. تفتح النت وتشوف الاخبار ومع كل خبر تقراه تقول (تبا لكم جميعا) بالانجليزي. اي حد يطلب منك فلوس في آخر خمسة وعشرين يوم في الشهر تقوله (تبا لك) بالانجليزي. نفس مشوار العودة من الشغل في الزحمة تقول (تبا لك) بالانجليزي. وبعد انتهاء اليوم الجميل وانت نايم بليل يطلعلك واحد في الحلم يقولك (تبا لك) بالانجليزي لانك لسه شايف ان فيه امل. شفتم بأه الكلمة دي اد ايه مهمة في حياتنا والمفروض تكون اول كلمة نتعلمها لما ندرس لغة؟؟ وفي النهاية سوري علي الرغي :))
