_ إن الشاب عبدالرحيم راضي الذي أعلن أنه الأول في مسابقة عالمية لحفظ القرآن على مستوى العالم أقيمت في ماليزيا طلع كلامه "غير صحيح".. الشاب عمل زفة وهيصة في بلدته في سوهاج.. واليوم وأمس ظهرت عدة مفاجآت.. وأقولك حصل إيه.
_ تواصلت منذ قليل مع الدكتور عبدالفتاح الطاروطي، وهو أزهري ومحكم في المسابقة التي أقيمت في ماليزيا: "الحقيقة إن الواد لم يشترك أصلًا في المسابقة، اللي كانت في شعبان الماضي.. يعني من 8 شهور".. وقال الطاروطي أيضًا: "تواصلت مع الشيخ عبدالمهين محمود مسؤول الشؤون الدينية بسفارة ماليزيا، وقال لي: (ولا طلعنا له تأشيرة ولا شفناه)"
_ والكارثة إن صح هذا الكلام مش إن عبدالفتاح مدخلش ماليزيا ولا شارك ولا كسب.. المشكلة إنه بيتاجر ب"القرآن" وبيكذب ب"القرآن".. وخلونا نستنى رد عبدالرحيم.. هل هو "كذاب" أم لا.. وإن كان صادق.. ليه الدكتور "الطاروطي" قال: "لم يشارك وكذاب".. طب وتامر أمين ماله بالقصة.. أهو جاب الواد و"مدققش" في صحة كلامه.. مدققش ومبلغش!!!
_ وبمناسبة "مبلغش".. لسه برضه ميدو مبلغش.. رغم ما قاله عنه رئيس الزمالك بخصوص الخرابات في إيطاليا وبلجكيا وفرنسا وإنه هيربيه وسكران ومش متربي وكده.. سيبك من ميدو.. رئيس الزمالك يواصل العك وعاير حازم إمام، وقال له: "عزا أبوك كلف النادي 300 الف جنيه".. وبعيدًا عن "اللانسانية" في الموضوع.. ظني كده وبالمنطق "إن مستحيل العزا يكلف 300 ألف".. وإن حازم أحسن في تصرفه بأنه هيدفع التكاليف.. واللي ميعرفوش رئيس الزمالك أن حمادة إمام واحد من أهم لاعبي الزمالك اللي تسببوا في شهرة "المختلط".
_ وعشان الزملكاوية.. رئيس النادي إن انتقدته الصحافة يلغي عضوية الصحفيين بالنادي.. ولو الفرقة اتغلبت من فريق يمنع المدير الفني من دخول النادي.. ولو لاعب جاب جون في الزمالك يمنعه من دخول النادي.. ولو الفضائيات انتقدته يقول: "مش هذيع الماتشات".. والنهارده هنشوف "مسخرة" قبل ساعة من مباراة دجلة والزمالك.
_ وعشان الزملكاوية برضه.. المحكمة أوقفت اليوم محاكمة المتهمين في مذبحة الدفاع الجوي اللي مات فيها 20 مشجعًا زملكاويًا.. وقاضي من المحكمة هيحقق في القصة من جديد وكأنها لم تحقق.. وده معناه إنه ممكن يستبعد متهمين من اللي بيتحاكموا.. ويضم متهمين جدد.. والجدد دول.. أي حد.. أيوه.. أي حد.. عشان الدم لو راح هدر "عيب"!
_ وعلى سيرة "العيب".. محمد سعد طالع يقول: "ردود الفعل إيجابية بعد أول حلقة في برنامجه وش السعد اللي شال فيها هيفا.. وحلف 3 طلاقات وقال طفوا النور".. والحقيقة إنه كان لازم "محمد سعد" يدخل على صفحة إم بي سي على "فيس بوك" عشان يعرف "الإيجابي".. ماشي يا لمبي.. هتلاقي "الإيجابي" اللي يبسطك .
_ وجبنا سيرة اللمبي.. شرطة إسكندرية مسكت الفنانة نيفين مندور اللي كانت طالعة زوجة اللمبي في فيلم "اللي بالي بالك".. ومسكتها ومعاها سيجارة حشيش وشابين و4 طلقات.. طب وإحنا عارفين سيجارة الحشيش ليه والشابين ليه.. ولكن ال4 طلقات خرطوش لييييييييه.. وعلى فكرة نيفين دي "اتقفشت" في التجمع الخامس من فترة ومعاها 40 جرام هيروين.. بس كده.
_ وعشان النهاردة عيد الحب.. سنة 76 كتب نزار وغنى حليم: "قالت يا ولدي لا تحزن فالحب عليك هو المكتوب يا ولدي.. يا ولدي قد مات شهيدًا من مات فداءً للمحبوب".. والنهاردة وبعد 40 سنة طلع علينا الشيخ علي جمعة، وقال: "من عشق فتاة وكتم حبه ثم مات فهو شهيد.. ومن مات دون حبيبته فهو شهيد".. والحقيقة شكرًا للشيخ نزار جمعة قباني على هذا الإبداع.. شكرًا يا "جمعة"
