إذا كنت زملكاوياً فلا تقرأ ما سأكتبه فقد يغضبك، وإذا كنت أهلاوياً فافرح يا عم واتشفّى، ما الزمالك فريق تعبان ومش عارف يجيب بطولة من سنين، بس دلوقتى مفيش مشكلة، فالزمالك حط رجله على أعتاب البطولات بعد فوزه على وادى دجلة فى الجونة -خلى بالك وادى دجلة- ولو سألت أى زملكاوى هوه الزمالك فاز فى كام ماتش عشان يكسب الكاس ممكن ما يعرفش، بس برضه الزمالك كسب بطولة وشيكا بالا شال الكاس، وما دام الزمالك فريق محلى بيشجع ثورة يونيو وبيكره الغرب كراهية جماهير «تلاتين/ ستة» للإخوان وأمريكا وغيرها، فقد توجته الجونة ملكاً متوجاً على مصر ب«كأس فاروق» مش كاس الببلاوى المر اللى شاربين منه بغباء جلسات المكاتب وغياب الحلول، وإذا كان أبوتريكة بيغيظنا سواء كنا زملكاوية أو مصريين، بس إحنا الزملكاوية مابنحبوش خالص مش عشان رابعة وإرهاب وغيره، ولكن عشان هوه كان جايلنا والأغبيا مارضوش يشتروه، وعشان مش لاقيين ممثلين بارعين فى الزمالك زيه، يجيبولنا ضربات جزاء ويسجدوا شاكرين مهللين، لزوم الضحك على دقون الجماهير!! كبّر يا مؤمن فالزمالك فريق كبير بس جوه مش بره، بره مش عارف إيه اللى بيجراله، وبالذات فى كوماسى، فحتى عدوى عادل المأمور راحت لشريف إكرامى وشال الستة بس مش مع الأهلى مع منتخبنا الهمام اللى كابتنه «وائل جمعة» هوه لو إنت زملكاوى ممكن تفرح، عشان نسيت الفرحة من زمان بسبب مراهقة شيكابالا والإدارة العكاشية لنادى الزمالك، ماتزعلش وتتكسف عشان دى بطولة محلية زى الدورات الصيفية والتنشيطية بتاعة الاتحاد السكندرى زمان، لا يا زملكاوى افرح وشيل من ورا ضهرك وكفاياك فرحة فى هزايم الأهلى وشماتة فى وائل جمعة وشريف إكرامى بتاع الستة وغيرهم، خليك زملكاوى بس، افرح ولو شوية وهتتكتب بطولة وماحدش هيسأل هوه الزمالك كسب البطولة دى إزاى ولا هيقولوا الأهلى كان فين، هتتكتب كده وخلاص، ويزيد رقم فى سجل البطولات يفرحك عشان تناكف بيه الأهلاوية اللى بقوا كتير قوى السنين اللى فاتت، فالأجيال الجديدة بتحب اللى فايز ومابتحبش الصبر، صبر الزملكاوية على ناديهم، الصبر اللى ينفع يتكتب فيه كتاب، صبر موسوعى ينفع لموسوعة «جينيز» صبر زى الصبر على الإخوان سنة كاملة، صبر يا ريت تعلمه لأولادك عشان يساعدهم على الحياة فى مصر، صبر يأدبهم، صبر زى السجن «تأديب وتهذيب وإصلاح»، اصبروا يا زملكاوية فالنصر قريب، بس مش زى بتاع مرسى وجماعته المظلمة، نصر من بين أقدام أحمد جعفر اللى مش عارف بيجيب اجوان إزاى، نصر زى نصر إبراهيم أيام زمان، نصر يفكرنا بحلمى زامورا وحسن عامر، نصر يدفعنا للنضال عشان نخلى مادة فى الدستور تنص على فوز الزمالك ببطولة ولو مرة كل خمس سنوات، نصر يفكرنا بإننا زملكاوية، نصر بيفكرنا أن الجنس الزملكاوى لم ينقرض.. وخذ نَفَس وقول هوب «أنا زملكاوى وكسبت الكاس»!! إمضاء: زملكاى بيهيس عشان مش مصدق إن الزمالك كسب بطولة!!