حصلت «الوطن» على نص تحقيقات النيابة العامة فى قضية مجزرة استاد الدفاع الجوى التى قتل فيها 22 مشجعاً من جماهير نادى الزمالك أثناء مباراة فريقهم مع نادى «إنبى» فى بطولة الدورى العام، والتى أحال فيها النائب العام 16 متهماً من جماهير «ألتراس وايت نايتس» ومنتمين لجماعة الإخوان إلى محكمة الجنايات بتهمة القتل والبلطجة والاعتداء على قوات الأمن. وأقر اسماعيل يوسف بالآتى: اسمى إسماعيل يوسف عوض الله محمد السيد مدير الكرة بنادى الزمالك ومقيم حى الأشجار فيلا رقم 5 مدخل 1 مدينة 6 أكتوبر وأحمل رقم قومى 26406282101712.. حلف اليمين س: ما معلوماتك عن الواقعة محل التحقيق؟ ج: اللى حصل أن فريق الزمالك والإدارة كنا مقيمين فى فندق ميرديان المطار واتحركنا من هناك نحو الساعة 5 بتاريخ 8/2/2015 متوجهين إلى استاد الدفاع الجوى ولما وصلنا كان هناك زحام على غير العادة وعلى بعد نحو 3 كيلو من الاستاد لقينا جماهير نادى الزمالك ومعاهم ناس تانية شكلهم غريبة مش معتاد أشوفهم وعددهم نحو ألف واحد وقفوا الأوتوبيس وقعدوا يخبطوا عليه ويقولوا لنا أن الأمن تعدى عليهم وانهم عايزين تذاكر علشان يحضروا المباراة ومجموعة منهم قعدوا أمام الأوتوبيس فقلنا لعم فايز السواق خليك زى ما انت وما تحاولش تتحرك منعاً لاستفزاز الجماهير وفى ناس منهم سألوا على عمر جابر وكان واحد رافع آى باد وراه لعمر وكان فى صورة واحد متغطى بعلم الزمالك وفضلنا على الوضع ده نحو ساعة وكان عمر جابر وحازم إمام هما اللى فى المقدمة وبيتكلموا مع الناس وبعد كده كلمت المستشار مرتضى منصور وبعتلنا مدرعات جيش وشرطة وساعتها الشرطة ضربت قنابل غاز علشان تفرق الجماهير فالكل جرى واحنا اتخنقنا من الغاز داخل الأوتوبيس فنزلنا وركبت اللعيبة المدرعات فى الأول وبعدين دخلنا من باب عكسى للاستاد وكنت أنا فى الأوتوبيس ومعايا خمسة ونزلنا فى الاستاد وتم تأجيل المباراة لمدة نصف ساعة واللعيبة كلهم نزلوا سخنوا وقبل المباراة ما تبدأ عمر جابر بلغنى أن صدره تعبه من الغاز وإيديه بتترعش وأعصابه بايظة ومش هيقدر يلعب المباراة فعلى طول طلعته ونزلت حازم إمام وفضل الماتش شغال بصورة طبيعية وفى الدقيقة 52 تقريباً بعض الجماهير بالدرجة الثالثة يمين نادوا على عمر جابر وراحلهم وفضلوا يشجعوا وينادوا بعد كده «انسحبوا» لكن ماكناش عارفين إيه السبب وبعدين عمر رجع قعد على الدكة تانى لحد نهاية المباراة وبعدين جاتلنا تليفونات بعد ما طعلنا من المباراة عرفنا منها أن فى ثلاثة توفوا منهم اثنين ضباط وفضلنا قاعدين لحد الساعة 11 تقريباً ووصل العدد اللى بلغونا بيه على التليفون ل22 متوفى وده كله عمر جابر مبلغناش أنه كان عرف حاجة وبعد كده خرجنا من الاستاد وتوجهنا للفندق بدون تأمين وفى بعض اللعيبة مشيوا بعربيات خاصة وبعد كده عرفنا الأحداث من التليفزيون. س: وما تعليلك لاعتذار اللاعب عمر جابر عن أداء المباراة؟ ج: هو قال لى أنه تعبان من الغاز وايده بتترعش ومش قادر يشيل جسمه ونفسياً متوتر. س: وما التصرف الذى بدر منك حيال ذلك؟ ج: أنا طلعته ونزلت حازم إمام. س: وهل أخبرك اللاعب عمر جابر بثمة معلومات بشأن وجود مصابين أو وفيات بين الجماهير؟ ج: لا. للاطلاع على نص تحقيقات "مجزرة الدفاع الجوي" أضغط هنا
