صدقت الحكمة اللى بتقول أقرب طريق لقلب جوزك معدته وده اللى حصل معايه توتى كان عمال طول فترة الخطوبة يقول لى كلام معسول .. مش لازم تطبخى يا حبيبتى نطلب دليفرى والأكل هساعدك فى عمايله واول ما اتجوزنا الكلام اتبخر وابتدى سى السيد يظهر ومابقاش عاجبه اى حاجة خالص لا باميه ولا ملوخيه ولاحتى الحلويات وساعتها قررت اتفرج على برامج الطبخ بتاعة نجلاء الشرشابى والشيف شربينى وانا والطبيخ والزمن طويل .. بتعملى ايه يا كوكى .. بكتب خطوات البط بالبرتقال .. بط بالبرتقال ايه بس .. وعملتى غدا ولا لا .. فى عندك جبنة وبطيخ فى التلاجة .. بقى لك 6 شهور من ساعة ما اتجوزنا وانتى بتكتبى فى وصفات وفى الاخر تقول لى عندك جبنة وبطيخ قومى يا ست انتى اعملى اكل بدل ما اقوم لك .. ياربى اتصرف ازاى .. وقعدت نص ساعة ادور فى كشكول الوصفات اللى انا عملاه على حاجة سهلة كده لحد ما لاقيت طريقة عمل الكوردن بلو ولازانيا .. الاكل ده هيخلص امتى يا كوكى .. قربت يا حبيبى .. بقالك ساعتين بتقولى قربت .. وبعد 5 ساعات عمل متواصلة شفت خلالهم الويل من سلق المكرونة وتنضيف الفراخ ودخان بيطلع من المطبخ مش عارفة ليه .. الحمد لله خلصت الاكل .. ايه ده كوردن بلو .. يعنى ايه .. فراخ معمولة بطريقة معينة .. معينة ولا مربعة .. ودى لازنيا دوقها هتعجبك اوى تحفة .. وانتى عامله كده ليه وشعرك ماله عامل كده كنتى بتحضرى برنيطة الاخفا .. علشان تعرف تعبت اد ايه لحد ما عملت الاكل .. ربنا يخليكى يا حبيبتى .. امااا اععععع .. ايه ده .. ايه يا حبيبى .. ايه الاكورديون بتاعك ده معمول من ايه .. فراخ محشيه بسطرمة بس مالقتش عندى بسطرمة فحطيت بدالها بيض .. وايه علاقة البيض بالبسطرمة .. الله امال احنا بناكل البسطرمة بايه .. صبرنى يارب .. وغير كده مالاقتش بقسماط احطه على الفراخ قمت حطيت رده .. ومالاقتش زيت احمر فيه قمت سلقتها وبعد كده شوتها على الشوايه وطلعتها حطتها فى الفرن شوية .. اكله فظيعة انا متأكده انى هبقى اشهر شيف فى مصر .. يا شيخة اتقى الله دى القطط تخاف تاكل الأكل ده لتتعب.. خلاص يا حبيبى هارجع تانى اعملك الاكل التقليدى طالما مش عاجبك أكل الفنادق ده .. أكل تقليدى انهى بالظبط القلقاس اللى دهنتى عليه كريم علشان طالع له حبوب ولا الفاصوليا اللى فضلتى تقشرى فيها يومين بالملقاط علشان تطلعى الخيط اللى فى الجنب. ولا السمك اللى خايفة تحطيه فى الزيت ليتلسع ، يا شيخة نشفتى بطنى انا نازل اكل بره .. هتاكل ايه .. كبده ومخ وسمين .. طب هات لى معاك ولو انى مابحبش الحاجات دى على ما انا اعمل لك الحلو سابليه بالكنافة هيعجبك اوى .. لا كتر خيرك انا بايت عند أختى النهارده وانتى اشبعى بالاكوادور والسنبلاوين بتاعك!
