هذا الفيلم رأيته من قبل.. ناس تتظاهر.. ناس تفض التظاهر.. ناس تموت.. ناس يتم القبض عليها. ناس تتسحل وتتجر من شعرها، وناس يتم الإلقاء بهم فى الصحراء. ناس تموت فى كمائن وناس تحارب الإرهاب. ناس تشمت.. ناس تشتم.. ناس تتضامن.. ناس تخون. ناس تتحدث عن هيبة الدولة.. ناس تتحدث عن كرامة المواطن. ناس يتم القبض عليها من بيوتها والاعتداء على زوجاتها.. ناس تدخل المشرحة للوقوف مع ناس لا تعرفها ماتت فى أحداث لم يشاركوا فيها.. ناس تؤكد أن الموت بخرطوش.. ناس تؤكد: ما عندناش خرطوش. ناس تحلف إنها فترة انتقالية.. ناس تقسم إنها فترة انتقامية.. هذا الفيلم رأيته من قبل.. ناس تقول إنه أحسن دستور.. ناس تقول صوتوا بنعم تدخلوا الجنة.. ناس تقول صوتوا بنعم تؤيدوا الثورة.. ناس تقول صوتوا بلا من أجل أولادكم. ناس تقول صوتوا بلا الله يحرقكم. ناس تقول عايزين حق الشهدا.. ناس تموت شهدا وهما مش شهدا.. وناس مش شهدا بس بيقولوا عليهم شهدا.. وناس بتشكك فى أى شهدا، وناس بتقول اللى منهم شهدا واللى من غيرهم مش شهدا. ناس تتعذب فى الأقسام.. خناقة بين شرطة ونيابة.. ناس تؤكد أن الشرطة تطبق القانون. ناس تعمل كمذيعين يطلعوا يصرخوا.. ومذيعات تتكلم عن أجندات.. وشبه رجل يتولى إدارة قناة ويستقى معلوماته من قعدات الفسحة. ناس تنادى بإصلاح الداخلية.. ناس تنادى بإصلاح القضاة.. ناس تشتم فى الاتنين وتؤكد أنهم ولاد كلب عملاء. ناس بتحب تاخد أى حاجة مع إنها مش محتاجة، وناس بترضى بأى حاجة فى عز ما هى محتاجة، على رأى الناشط الغنائى خالد عجاج.. أيام ما كان ناشط. ناس عيالها تموت وتنزل من أجلها، وناس تؤكد يا نجيب حقهم يا نموت زيهم، وناس ترمى بالجاز على الولعة، ولع ولع ولع ولع ولع. هذا الفيلم رأيته من قبل.. ناس تقول لازم ننزل.. ناس تقول خليكم فى بيوتكم. ناس تقول اليأس خيانة.. ناس تقول أمن الدولة كلاب الدولة.. ناس تقول أمن الدولة بيحمى الدولة. ناس تقول هنديهم بالجزمة.. ناس تقول موتوا بغيظكم.. ناس تقول انتو اللى بعتونا الأول. ناس تقول ممنوعين من السفر.. ناس تقول ملعون أبو قطر.. وناس دمها بيروح هدر.. ناس تشخبط ع الحيطان. ناس بتقفل كل البيبان.. ناس بتهتف فى الميدان.. ناس بتقفل الميدان.. ناس بتعمل بغبغان. ناس تقول هما السبب.. وناس تقول مالناش دعوة، وناس تقول القضاء نزيه وشامخ، وناس تقول القانون بالمزاج، وناس القانون يطبق عليها، وناس القانون يبربش فلا يراها. ناس تهدد فى أرزاقها لقولهم الحق، وناس تهدد بالقتل لأنها تراعى ضميرها. ناس تقف وتواجه، وناس تهرب وتهاجر، وناس تبيع، وناس تشترى، وناس تتكلم عن خيانة وعمالة وتمويل، وناس تفبرك صور، وناس «تشيَّر» هبل على فيس بوك، وناس نشطاء، وناس ثوريين، وناس كلاب، وناس إخوان، وناس مع الرايجة. ناس تؤكد أن الثورة قادمة لا محالة، واللى عملوها مرتين يعملوها التالتة. وناس تبتسم فى سخرية وهى تقول: ثورة تالتة عند أمك. ناس تقول يسقط حكم العسكر، وناس تقول الداخلية بلطجية، وناس تقول هتهدوا الدولة يا خونة يا ممولين.. أنا شفت الفيلم ده قبل كده والله.. ناس بتسيب كل ده وتقعد تتفرج وهى تأكل الفيشار وتبصق قشر اللب على قفا من يجلس أمامها، وناس عارفة نهاية الفيلم لكنها تصر على مشاهدته كل مرة. وناس تحلف إن النهاية ستتغير، لأن الأبطال تغيروا. وناس تضحك وهى تقول: ما الفائدة ما دام المخرج لم يتغير؟ وناس تدعى من قلبها: اللهم اضرب الظالمين.. بولاد الكلب.
