كل سنة وانتم طيبين ورمضان كريم نبدأ القطايف -تعالى لما أقولك حاجة من قلب المقلب ... أجور النجوم ياسيدى في برنامج رامز جلال ( السقا 3 مليون - مي عمر مليون ونص - باسم سمرة مليون و200 الف - شيرين رضا مليون ونص - حمادة هلال 2 مليون)،،،، إيه ده ياجدعان!!! مابوراحة شوية آماااااال لو ماكانوش عارفين المقلب كانوا أخدوا كام!! -قالو من جوه المدينة.. رجل الأعمال الكبير قرر زيادة الموظفين في القناة بتاعته أول ما جاله التليفون إياه.. -قبل الفطار: حضرتك بكام الفانوس ده؟ ب 3000 جنية يا فندم،،، لية حضرتك أنا عايزة فانوس بتاع وحوي ياوحوي مش فانوس لعرببتي المرسيدس! -خاص وعاجل.. القبض على 3 مذيعات ماعملوش بودكاست لغاية دلوقتي !! افهموا الشغلانة في عرض النبي هو مش تقليد وخلاص!! -من قلب الرياض.. بعد مرور شهر من النجاح المبهر لمباراة نهائي الكاس في الرياض.. اقدر اقول ملخص عناوين سريعة: درس سعودي تنظيمي.. نقل اعلامي محترف.. حضور جماهيري مشرف.. بيانات عشوائية كوميدية.. -صباح الخير من العاصمة.. تحدثت في قناة أون تايم عن المدينة الأولمبية في العاصمة الإدارية الجديدة وتوقعت النجاح.. واليوم نشاهد إستاد عالمي وبطولة كبيرة بتنظيم مصري جيد،،، شابوه لكل من فكر وأبدع وقرر وشكرا للشركة المتحدة للرياضة على التنظيم المتميز. -بمناسبة حملة نزول الأسعار اللي منتشرة على السوشيال ميديا بس.. بقول للسوبر ماركت الأسعار رخصت ع النت قالى أبقى إعملى لها download يا فندم ! -النجمة الإسبانية "هبه عبوك" أخدت حقها من نجم باريس سان جيرمان "أشرف حكيمي" ما قولتلك المحاكم الفرنسية مش بتهزر، ومافيش "هبه" بتخسر أبدا -تحت شعار أجيال بتسلم بعض.. شابو هشام ماجد وأسماء جلال وسلمي أبو ضيف.. ومستوي مميز لطارق لطفي وكريم عبد العزيز وباسم سمره في دراما رمضان لغاية دلوقتي. -هو احنا لية بقالنا 15 سنة مافيش بربع جنية إبتكار في برامج المقالب؟! كلها لازم تكون ضرب وصراخ وعياط مكشوفة جدا، الله يرحم القدير إبراهيم نصر كان عنده بدل الفكرة 10 وبميزانية 1 ٪ من اللي موجودة دلوقتي. -تخاريف صيام.. الفنانة المغربية "بسمة بوسيل" قالت في تصريح رمضاني كده، ومش عارفة ده كان قبل الفطار ولا بعده الحقيقة !!! المهم قالت ياسيدى إن مسألة رجوعي لتامر حسني حلم وهيتحقق.. عايزة تعملي معاه كليب قصدك يعني !!! القطايف اللي جاية هانتكلم بصراحة عن ملخص لدراما رمضان وكل قطايف وأنتم طيبين.
