مساء الخير .. يا أستاذة نيفين وحيات أغلى حاجة عندك تنشري رسالتي .. انا من المتضررين بشكل فظيع من الآتي : انا والحمد لله من أسرة ميسورة الحال جدا وجميلة على حد وصف المقربين .. سني 32 سنة وخريجة جامعة أمريكية ربنا من علية بنعم كتير .. مشكلتي بقى واللي لاحظته السنين الطويلة اللي فاتت ان البنات الكويسين أو الميسورين الحال مثل عائلتي والمتفوقات في شغلهم .. همة آخر بنات بيفكر فيهم حد .. انا رجعت السبب لخوف الشباب من الدخول على عيلة بنتهم بالمواصفات دي وفي نفس الوقت النواحي المادية بتقلق اي حد يمكن لتصور الشاب ان العيلة دي هتزود أو تبالغ في طلباتها عشان بنتهم جميلة أو مميزة أيا كان في ايه , مش عارفة بس انا ملاحظة حتى بين صاحباتي اللي همة في نفس ظروفي ليهم نفس المشكلة . والله العظيم انا وأهلي بنتمتع ببساطة كبيرة لإقتناعنا ان الدنيا أكيد مش شقة كبيرة ولا عربية غالية .. الدنيا عيشة هادية ومستقرة وراجل يوفر الأمان ويخاف ربنا ويتقي الله في نفسه وأهله وفي البنت اللي هيتجوزها يبقى ايه بقى ؟! صدقيني يا أستاذة نيفين اللي بقولهولك ده بعد تفكير طويل في أصل المشكلة وبعد تدقيق عميق في ردود أفعال الشباب المتقدم للزواج سواء لية أو لصاحباتي , ياريت لو السادة أصدقاء فضفضة من الرجالة والشباب يحكولي من وجهة نظرهم هوة الخوف من بنت بالمواصفات دي عيبها ايه أو الخوف الحقيقي من ايه ؟ ويتناقشوا معايا في الكلام ده انا فعلا محتاجة افهم يمكن كلامهم يوضح مشكلة مش خاطرة على بالي واعيد النظر تاني .. شكرا استاذة نيفين وأرجو نشر الرسالة أرجوكي يمكن الاقي في فضفضة لمبة خضرا . م.أ
