مش لاحظين حاجة يا جماعة ف المناسبات و الأعياد اللى بتعدى علينا وازاى بنحتفل بيها (طبعا بنحتفل بطريقة الأكل) الأكل أهم حاجة ف المناسبات يعنى مثلا. عيد الفطر بالكعك و البسكويت وعيد الأضحى باللحمة الفتة و رأس السنة الميلادية بالديك الرومى و مولد النبى بحلاوة المولد ونص رجب بالبط و الرقاق و شم النسيم بالبيض الملون و الفسيخ و الرنجة و الملوحة و (الذى منة)وشهر رمضان ولائم وأشى محمرو أشى مقلى وأشى مسبك دة غيرالمناسبات الخاصة تقدرى تعملي عيد ميلاد من غير تورتة مثلا ولا ينفع نعمل فرح من غير بوفية. باللة عليكم عمركم عزمتوا حد أو أتعزمتواعلى حفلة شاى مثلا زى الدول اياها . طبعا أحنا الحاجات دى متكولش معانا أحنا بنعزم أونتعزم على غدا أو عشا وكمان لاحظت أن ف كل حالتنا النفسية بناكل نزعل ناكل نفرح ناكل نكتئب ناكل. ح سألك سؤال والأجابة معروفة عمرك اتعزمتى عن مامتك ولا حماتك و روحتى البيت من غيرلفة محترمة مليانة من خيرات اللة حتى ولادك الصغيرين بتقولى لهم لوعملت كذا حاجيبلك حاجة حلوة (وطبعا الحاجة دى بلا شك أكل ). وأحنا كمان ينفع نخرج ولا الخروجة تحلى من غير ما ندخل أى مطعم ونضرب لنا أكلة محترمة.
دة أحنا ساعات بنبقى لسة واكلين ف البيت وأول ما العيال يشوفوا الشارع يقولوا أحنا جعانين .
ولا واحنا رايحين نعمل شوبنج ولسة ح ندخل أول محل يبتدى الزن (مامى أحنا جعانين) وأول ما ندخل من باب النادى نبتدى نشغل اسطوانة أحنا جعانين. دة حتى السفر والمصايف مرتبط معانا بالمطاعم والحلويات هو المصيف يبقى مصيف من غير وليمة السمك و الجمبرى من المحل اللى انتوا عارفينة ولا ينفع نروح اسكندرية من غير ما ناكل أيس كريم من المحل اياة . دة غير بقى الحاجات الجديدة اللى مكانتش موجودة ايام امهاتنا اللى بتتحط ع الأكل زى صوص الديمجلاس مثلا ولا الباربكيو ولا الاكل السويت اند ساور مش عارفة بجيلى احساس كدة وأنا باشترى الحاجات دى انىرايحة أشترى طلبات علشان أعمل عمل مش أسماء أكل . ولا السوشى مع أحترامى لأكيلة السوشى تلاقى صحبتك بتقولك النهاردة بالنسبة لى يوم السوشى أصل أنا متعودة أكلة يوم ف الأسبوع وكأن الأخ سوشى دة قبل ما يظهر كانت بتصوم ف اليوم دة ولا كانت بتجوع لحد اليوم اللى بعدة. م الأخر أحب أقول لازم نرحم نفسنا شوية بطننا بتستغيث من المكنة اللى مبتبطلش غير وأحنا نايمين (يا لاهوى لا داهية ليخترعوا حاجة تخلينا ناكل وأحنا نايمين كمان ) وبعدين نرجع نقول عاوزين نخس طيب لية أصلا تخنا من الأول (فضى بقى نقول اية ).