احمد حسن راؤول كتبت ندى متولي أخت الشهيد مصطفى متولي على صفحتها الشخصية على الفيسبوك حكايتها مع أخوها بشارع محمد محمود أثناء إعتداء الداخلية على الثوار وقالت :
المكان: شارع محمد محمود أمام هارديز الزمان: 19 نوفمبر 2011 .. 20:30 الحالة: زحمة أوى و شباب كتييييير ماسكين فى بعض و بيطنطتوا بغِل .. و حبة بنات على جمب و كل واحدة شايلة شانطة على ضهرها فيها خل و بخاخة خميرة و ماية و المحلول و كمامات و واقفين فى وضع الإستعداد .. و شماريخ .. و هتافات .. و كسر طوب و رخام .. و الماسكات الجديدة منتشرة .. و أثار غاز مسيل كتييير
و فجأة ...
مصطفى: إنتى إيه اللى جابك هنا !! أنتى بتستهبلى ! و رايحة على فين كده كمان عايزة تدخلى جوه @: ندى: أنا اللى بستهبل برده ! أنت مش قولت عندك درس .. إيه اللى جابك من غير ما تقول!!
مصطفى: ملكيش فيه يالا إتفضلى خدى صحابك و روحى .. مش مالى عينيك الرجالة دى كلها ! أنتوا تعودوا فى البيت و تنزلوا بعد ما إحنا نسيطر و نظبُط الأداء مش تنزلولى فى القلق دا @: ندى: طيب طيب .. أشوفك فى البيت متتأخرش
بعد شوية ..
المكان: شارع الفلكى
مصطفى: أنتى تانى !! لسة مروحتيش برده @: ندى: ما أصل أنا مش همشى .. متجبرنيش أضحك عليك .. خليك جدع و خدنى معاك جوه
مصطفى: إخفى يا ندى مش وقتك والله خالص .. يالا يا حسام .. سلام أنتى بقى .. متتأخريش و لما تروحى كلمينى .. و أنتى مشفتنيش هنا .. أنا فى الدرس D:
حكاية مصطفى و هو بلطجى فى محمد محمود :)
ويذكر ان هذا الشهر هو ذكرى مجزرة محمد محمود التي حدثت من جانب قوات الداخلية ضد الثوار في أعقاب ثورة 25 يناير المجيدة.