نشر المخرج محمد دياب تعليق له عبر صفحته على موقع التواصل الاجتماعى فيسبوك بشأن مشاركة فيلم اشتباك فى قسم "نظرة ما" بمهرجان كان السينمائى الدولى والذى تنتهى فعالياته غدا. وقال دياب فى تعليقه : "جوائز مهرجان كان اعلنت و السبب الوحيد اللي مخليني زعلان ان فيلم اشتباك مخدش جائزه وكان نفسي الناس تلاقي حاجه تفرحها وسط الغم و ان كل شاب محبط يحس انه يقدر يوصل لأي حلم الايام اللي فاتت حسيت اني محمد صلاح لعيب الكوره اللي بقي مصدر السعادة الوحيد و هو بينجح و بيرفع راس مصر بين اهم انديه العالم و مع كل خبر عن الاستقبال الايجابي للفيلم او عن اختيار النقاد ليه من اهم 10 افلام في المهرجان، او اختياره من الخمس افلام المدعومة من رابطة السينمات المستقلة في فرنسا كنت بشوف الناس بتفرح كأنه جون لمصر في كاس العالم". وأضاف دياب قائلا :"الحاجه الحلوه ان اللخبطة اللي عايشنها في مصر بتتحول لمصدر الهام فني لجيل جديد.. معنديش شك ان كل مهرجانات العالم و اي تظاهرة فنية هنشوف فيها فنانين مصريين هيخترعوا طرق متخيلنهاش عشان يعبروا عن نفسهم ... كنت هتضايق لو كنت حاسس ان وجودنا هنا صدفة و مش هيتكرر، بس ده اجتهاد و تعب وعرق و تفكير و أكيد مكلل بتوفيق ربنا .. عشان كده متأكد ان لينا جولات تانيه كتير smile emoticon ويمكن تكون رحله مهرجان كان انتهت، بس رحله اشتباك لسه بادئه في كل مهرجانات العالم و لو الدعم اللي شايفه منكوا اتوجه لقاعات السينما في مصر، ساعتها هنشوف افلام زي اشتباك و احلي من فنانين كتير محتاجين دعمكوا". وأشار دياب الى انى نفسي اشكر كل انسان باركلنا او دعمنا او دافع عن الفيلم (خاصة الزملاء الفنانين) و بعتذر اني معرفتش ارد علي كل واحد و اشكره بنفسي وشكرا ليوسف شاهين و يسري نصرالله و صناع ال23 فيلما مصريا اللي شاركوا قبل كده عشان انتو اللي فتحتولنا الباب هنا، و شكرا لكل الفنانين المصريين اللي مستوي شغلهم تطور في السنين اللي فاتت واللي كانوا مصدر الهام شخصي وأهم شكر للي آمنوا بالفيلم وقت ما ناس قالت مستحيل يتعمل و كل شخص اشتغل في الفيلم و عمل اضعاف المجهود ... و اللي هيشوف الفيلم ده هيعرف قد ايه اللي اشتركوا فيه بيحبوا بلدهم. و اختتم قائلا : اما كل واحد حس ان الفيلم بيمثله و كان بيتمنالنا و لمصر الخير و بعتلنا دعوة او شويه طاقه ايجابيه ... الف الف شكر و زي ما قولت قبل كده احنا كسبنا اهم جايزة و هي احترام العالم و مبروك لينا و لمصر "اشتباك".