طرحت الكاتبة والمحامية أميرة بهي الدين كتابة نثرية عبر حسابها علي موقع التواصل الاجتماعي"فيسبوك"، بعنوان "ريسنا من الجمالية". وجاءت الكتابة لبهي الدين "ريسنا من الجمالية": يعني القاهرة الاصيلة يعني الجدعنة والدفا والونس والشهامة والقوة في الحق يعني العيلة والنسب والاصل والجدر يعني في رحاب الحسين و آل البيت يعني البخور والعطر والمسك والعود يعني الصنعة والدقة والنفس الطويل والصبر يعني ليالي رمضان وصلاة العيد ودعاء نص شعبان يعني ادان الفجر من ميت مدنة وليالي الذكر وادعيه الدراويش وليله المولد ونابت ولحمه للغلابه والفقرا والمحتاجين .. يعني السبح الكهرمان والفوانيس النحاس والمشربيات الارابيسك والبيوت الحجر القديمه اللي بتحكي التاريخ والحغرافيا ... يعني قرفه وسحلب وشاي بالنعناع وبن محوج وعناب يعني روح مصر واصالتها وشكلها وفهمها الحواري المنقوش حيطانها بالحواديت والسحر يعني الزمن اللي عدى وقعد يعني التاريخ اللي جه عندنا واتشرف يعني شمع السبوع وقله المواليد وحنة العرايس يعني الخان والزقاق والحارة والقهوة والورشه ريسنا من الجمالية راضع وشارب روح مصر واصالتها وشخصيتها جدعنتها وحقها اللي ماتسيبوش وتارها اللي ماتنساهوش يعني بوسه علي ايد الام ست الكل وانكسار للاب وحنان علي الاخت وسند للاخ ومروة للجيران وكرم للغرباء واهل الطريق يعني سبيل ميه للعطشان يعني دعوة للمحتاج ... ريسنا من الجمالية من حضن مصر فاهمها وعاجنها وخابزها وحافظها صم .. ريسنا من الجمالية يعني جدعنه ولاد البلد وصون الحريم واحترام الكبير واحتضان الصغير وخفه الدم والفهلوة ورد الجميل والكيد للي يدوس علي ضله ونار علي العدو وابن الحرام .... خمسه وخميسة ياسيسي خمسه وخميسة ... تحيا مصر ياسيسي تحيا مصر ..".