أبو الأبالسة وسط حشد من الأهل والأصدقاء مودعين الحفيد الصغير وهو علي وشك القيام بأول مهمه له علي كوكب الأرض: مع السلامه يا حبيبي... ماتنساش كل تعليماتي لازم تنفذها بالظبط.. وأول ما توصل ابعتلي ميسد لإن النت فمصر اكيد هتلاقيه زى الزفت! - حاضر يا جدي.. مع السلامة .... حاضر حاضر.. هركن في اي مكان فاضي من غير ما حد يحس.. حاضر مش ههلفت بالكلام هبقى رزين ومش هتكلم فى السياسه ماشى خلاص... حاضر بقي ياجدي خلاص والله مش هتصور سيلفي مع سيسي ولا صافيناز ولا محمد صلاح كمان يا اخي..... - امممم انا اسمي أبو بكر الأسيوطي عندي 25 سنه امممممم ايه تاني ايه تاني يا واد يا ابليس ايه تانى !!... ! هكذا كان يستذكر ابليس الصغير كل تعليمات المهمه خلال مدة الوصول لكوكب الارض من خلال تلك المركبة المبتكرة.. الرحلة لم تستغرق اكثر من ثلاث ثواني صار بعدها أبو بكر الاسيوطي مواطنا مصريا ساقه حظه العسر ان يهبط في ميدان السيدة وبالتحديد عند مسجد السيدة زينب ولجل ما تكمل كانت ليلة جمعه موافق أول ليالي شهر رمضان المعظم! - يا خبر أبيض ايه البشر دي كلها.. ده إحنا الفجر ياولاد الفقريه.. الناس دي بتنام امتي!!.. طيب اركن المركبه فين بس... انا لازم الف كام لفه لما الاقي مكان فاضي.... - وبعد مرور سبع ساعات وبعد أن فشل أبوبكر في أن يجد مكان فاضي وأدرك أنه لا محاله فلابد من الهبوط الآن وإلا سينفذ الوقود.. "ياخبر ابيض! .. بقي اوصل الارض وادخل مصر ف 3 ثواني وافضل سبع ساعات بدور علي ركنه دي باينلها رحله سودة من اولها.. منك لله يا جدي.. منك لله يا أخي !! _ هبوط اضطراري... هبوط اضطراري .. هكذا كانت تصيح الرسائل الالكترونية بالمركبة مصاحب لتلك الرسائل صافرات انذار مزعجة جدا توحي بكارثه اذا لم يهبط فورا مما اضطره للهبوط خلال لحظه علي اقرب مكان له ولكن هذه المره كانت شبرا هي اول ما حطت قدماه ارض المحروسه): - شبرا وما ادراك ما شبرا الساعه 12 ظهرا وفي اول ايام شهر رمضان.. طبعا المصريين في نهار رمضان متشوفش وحش!!.. - "ياختااااي... ايه الناس دي كلها.... اعوذ بالله من الشيطان الرجيم.. اعوذبالله .. ايه اللي انا بقولوا ده.. هيخلوني اكفر الناس دي ولا ايه.. مالهم ماحدش طايق التاني ليه كده! " هكذا كان يحدث ابليس الصغير نفسه قبل ان يتذكر انه ابو بكر وأنه صار منهم الآن وعليه التعامل بشكل اكثر جدية لإثبات أنه قادر علي النجاح في أول مهامه لإغواء بني البشر... _ " ايه الجو ده ياربي ... أنا حاسس اننا خلاص دخلنا جهنم .. ايوه كده بانت خلاص.. ايوااااا انا فهمت.. يبقي النهارده يوم القيامة وجدي بعتني علي جهنم وراح هوه الجنة ابن اللئيمة !.... لا لا لا جدي ما يعملش كده ده برضو مهما كان الضوفر مايطلعش ماللحم... وبعدين ياواد يا ابليس "يا ابو بكر انت مش شايف مكتوب اهو مرحبا بكم في حي شبرا !! امممم وبعدين ايه الحيره دي بقي.. طيب انا لازم اسأل الناس دي بس لازم أشوف حد باين علي وش أمه انه داخل الجنة عشان يرد عليا ويجاوبني.... - ايوه الراجل ده باين عليه راجل صالح والزبيبة ف راسه زي البطيخة .. ده اكيد من اهل الجنة وهوه اللي هيقول الحقيقه...." السلام عليكم ورحمة الله وبركاته ياحج". # وعليكم ياخويا !! - امممم بدايه مش مبشرة الحقيقة خالص... ايوه لسه ياحج..ها.. كمل انا سامعك.... # اكمل ايه ياد يابن الملووحة.. بقولك انا صايم وسيبني فحالي بقي بدل ما افطر علي امك! - صايم!! ما علينا ..عموما هعتبر انك رديت التحيه بأفضل منها... المهم انا بس يا حج عايز اسأل سؤال مهم جدا: ياتري يا هل تري النهارده بالفعل يوم القيامه ولا ايه لأن كل حاجه هنا توحي بكده .. يعني نار الله الموقده دي والوجوه العابسة دي وماحدش عارف امه ولا ابوه كل واحد ماشي يلوش في اللي جنبه ويلا نفسي .. صح النهاردة يوم القيامه صح؟ # اللهم مااني صايم.. غور من وشي ياد يابن الفصيله.. عاجبك كده آديك طيرتلي الحجرين بتوع السحور... هكمل اليوم ازاي كده.. احنا لسه الظهر منك لله ده النهارده اليوم الوحيد اللي بصومه في الشهر الفضيل ....خلاص بقي يارب انت عالم بنيتي والاعمال بالنيات طبعا.. مش كده ولا ايه يابن ال .... - كده يا حج صح طبعا زي ما انت بتقول بس ارجوك من غير ماتجيب سيرة الغاليه وحياتك ... # حجر شيشه ياواد يا سبرتو بسرعه بلاها صيام.. صيام ايه والاشكال العكره دي بنشوفها عالصبح ..... غور من وشي ياد بدل ما اجيب كرشك عالصبح! - منك لله يا جدي.. ايه البلد اللبش دي.. طيب فين الكلام اللي انت قولتهولي سبعتلاف سنه حضاره وشعب ابن نكته ومضيااااااف .. احيييييه علي مضيااف دي...! وبعدين صيام وشهر صيام.. ايه ده هوه احنا فرمضان ولا ايه.... احيييييه ! يعني اول مهمه اغواء ليا تطلع في شهر رمضان... ده ايه ام النحس ده.. ده معناه اني ما قداميش الا اختيارين.. يا اما اخد المركبة وارجع تاني ديل ورا وديل قدام وده هيعتبر فشل وهيعيروني لو رجعت كده يا اما... يا اما .... مش قادر اقولها ... يا إما افضل شهر كامل اتعامل مع الناس دي لحد ما يخلص رمضان ويتفك الحظر اللي عليا وابتدي اشتغل واغويهم .. وده العن واضل سبيلا..منك لله يا جدي مش كنت تبعتني سويسرا او باريس او حتي عند الناس القصيرين اللي عنيهم ضيقه دول.. اهم عالاقل بيضحكو فوشك ويوطولك يحييوك وحركات حلوه كده .... خدت ايه انا من ام السبعتلاف سنة حضارة غير قلة القيمة... اه ه يا انا ياما ! ونستكمل الحلقه القادمه باذن الله.
