الشارع ماله هادي كده؟ هو أنا نزلت بدري ولا إيه؟ غريبة جدا هي شمس دي ودافية كمان! ده إحنا كنا متلجين إمبارح، نتوكل علي رزق كريم وعلي أشغالنا، "مهندسين يا أسطي".. معلش يا أستاذ الأتوبيس أكتمل إستني اللي بعدينا جاي بعد خمس دقايق، نعم؟ ده الكمسري بتاع كل يوم باينه إتجن؟ الأتوبيس فاضي ومفيش حد واقف في الطرقة؟ رايح المهنديسن يا أسطي؟ أيوه إتفضل، لا حاسب حضرتك الكراسي الناحية دي مخصصة للحريم ممكن تقعد هنا براحتك، إيه ده كراسي للسيدات في الأتوبيس، أمال حضرتك إحنا بنقاوم التحرش.. مصر جميلة يا حضرت، إنت تقعد مرتاح والهانم تقعد مرتاحة، بسم الله ما شاء الله، ولا أنا باين عليا تايه إمال فين مصر بتاعت كل يوم، بتاخد كام للمهندسين يا أسطي، هو حضرتك مش معاك كارنية الكيلومترات ولا إيه؟ غريبة هو ده اللي في جيبي؟ أيوه هو متقلقش كده لسه قدامك شهر بالإشتراك إطمن، إيه الي أنا فيه ده؟ وإيه اللي أنا شايفه من الشباك؟ ده رصيف، معقول!! دول بيجروا علي الرصيف ودي حارة لركوب العجل، هو أنا فين؟ لو سمحت حضرتك ممكن تقولي إحنا فين؟ إحنا في الجيزة يا بني؛ وصلنا يا إستاذ، صحيح دي العمارة بتاعت الشغل، الأسانسير متصلح أهو الحمد لله.. صباح الخير يا شباب، صباح النور، إيه الظرف اللي علي مكتبي ده كمان؟ جواب "السيد فلان الفلاني نحيط سيادتكم علما أنه حان دوركم لاستلام شقتكم التي قمتم بحجزها منذ أربعة أشهر في مشروع إسكان الشباب، نعتذر عن التأخير وبناء عليه سيتم خصم 1000 جنيه من مستحقات الشركة عقوبة تأخير عن الموعد المقرر" الحكومة بتعاقب نفسها علي التأخير؟ أنا كده قربت أتجنن؟ أطلب أتأكد لايكون غلط! ألو تحت أمرك هنا مشروع إسكان الشباب، سيادتك عاوز استفسار ولا تحب نحولك علي الوزير علي طول؟ أكلم الوزير! فعلا؟ أنا مش قادر استوعب هاكلمكم تاني، وده إيه مانشيت الجرنال ده؟ مرتضي منصور يتسلم درع الدوري للمرة الخامسة علي التوالي، إيه الحلاوة دي، إحنا سنة كام، التاريخ ع الجرنال أهو، إيه كام 2056؟ ... بابا بابا اصحي يا بابا إنت بتزعق ليه قوم يا بابااااا.. إيه إيه في إيه.. كنت بتزعق وإنت نايم.. بسم الله الرحمن الرحيم إحنا فين؟ يااااااه يا حبيبي يابني سامحني أصلي حلمت إن الزمالك أخد الدوري.. ياحبيبي معلش يابابا هو قال إنه قادم بس مقالش سنه كام.
