هل لاحظت قبل كده وانت سايق عربيتك وجنبك حد، وعند أي صينية لفيت حوالين الدوران كله عشان تلف وترجع، إن اللي قاعد جنبك بيندهش! أو مثلًا هل لاحظت مرة والإشارة حمرا لكن مفيش عربيات في الجهة المقابلة لكنك وقفت تستنى الإشارة، إن اللي جنبك شتمك أو العربية اللي وراك عملت لك زفة واللي فيها بصلك باحتقار كأنك مجنون! طيب ركز في حاجة تانية واحد متهور حدف عليك وانت سايق فانت بصيت له ومشيت بس! يا ترى إحساس اللي قاعد جنبك إيه ونظرته ليك إنك "شاذ" هتكون واضحة أد إيه وإن انتظاره لأنك تطلَّع راسك من الشباك وتشتم بالأب والأم وتوقف الطريق ع الأقل نص ساعة هو الطبيعي والمعتاد! "إنت غريب جدًّا على فكرة" الجملة اللي دايمًا بتتقال لما حد يعمل أي سلوك شاذ، يعني عكس المعتاد، ومن الجملة دي وأي جمل شبيهة لها في المعنى بيقدر أي شخص سريع الملاحظة يتعرف على المعتاد في أي مكان وبيفهم طبيعة الناس وطريقة تفكيرهم، من عادتي لما بسافر أي مكان جديد إني أحاول اركز شويه في اللي بيندهش منه الناس في المكان ده، وبقدر من خلاله أفهم بعض من المعتاد عليه والمألوف، لكن الحقيقة فكرت إني أعمل ده في بلدي وبنفس الطريقة، ويا ريت كل واحد يحاول يعمل ده عشان يتفاجئ نفس مفاجئتي اللي هتخلينا نقف وقفة مع نفسنا كبيرة.. طيب في غير السواقة وآلامها وأوجاعها اليومية، لاحظت مرة وانت بتتسوق "من سوق شعبي أو مول كبير" في أي محل إن البياع في المحل لو ضحك وكان شكله سعيد، رغم انك تعبته كتير عشان تختار حاجة وماخترتش ومشيت، بتكون نظرتك ليه نظرة اندهاش! وبتخرج من المحل متعجب من الرقي ده؟ لأن الطبيعي إن أي بياع في بلدنا بيكون مكشر ومخنوق من الزبون ونفسه يشتمه، لولا إن أكل العيش مر. هل ركزت مرة إن فيه بنت ماشية في الشارع لابسة قصير وشكلها حلو، فبعد شوية اصحابك استغربوا جدًّا إنك مختش بالك وإنك ما بصيتش بصة ذئب وممكن يشكوا إنك "شاذ"، ركز مع اندهاشات الناس من أي سلوك وانت في الشارع أو في الشغل أو في السوق أو بتتفسح مع أولادك.. مع التركيز ده هنكتشف إننا "شواذ" وان كل شيء بديهي ومعتاد بقى عندنا شاذ والشذوذ هو الطبيعي، بقت كلمة "محترم زيادة عن اللزوم" تعبير عن التعجب والحسرة وبقت "أصله على نياته" معناها إنه عبيط، وبقى "مالوش شخصية" معناها إنه بيساعد مراته في شغل البيت أو بياخد رأيها في أي قرار أما بقى "بتاع ربنا" معناها على طول إنه أهبل.. جرب في مرة تبدي اندهاشك من أي حد بيعلق على شخص ماشي في الشارع "بص لابسه إيه؟" أو شوف الحمار لابس إيه مع إيه؟ أو بص البت شكلها عاوزة حاجة وواقفة هنا عشان كذا "هتلاقي الرد على اندهاشك باندهش أكبر "إنت يابني غريب أوي على فكرة".. الطبيعي هو الفطرة السليمة الصحيحة للإنسان، ولما يكون الطبيعي هو "الشذوذ" في أي مجتمع، فده معناها مش بس مشكلة أخلاقية ده معناه إن الفطرة نفسها فسدت؛ لإن كل مجتمع فيه ناس أخلاقهم مش سليمة، حتى في بعض المجتمعات، يمكن بيكون السائد فيها هو الأخلاق المتدنية لكن بيفضل المجتمع مندهش منها أو مستغربها ومدرك إنها مش الأصل رغم انتشارها، لكن المصيبة الأكبر أن تتحول لإنها تبقى العادي.. العادي والشاذ مدخل حقيقي لفهم كتير من مشاكلنا، ومرايا بتوضح حقيقة المجتمع ووصل لإيه، حتى في علم التربية الحديث فيه توصيات كتيرة في الاندهاش أمام الأطفال والتحذير منها؛ لأن الاندهاش أو التعجب بيحدد لأي طفل صغير إيه هو العادي والشاذ، بل إن بعض الخبراء بيوصوا بعمل سيناريوهات متعمدة أمام الأطفال، بتأدي لاندهاش معين لتكوين ثوابت أخلاقية عند الطفل.. إحنا أطفالنا حاليًا كلهم بيشوفونا واحنا بنندهش وبنستغرب، وبيزيد رسوخ العادي والشاذ عندهم، فماتتفاجئش لما ابنك في يوم يتعجب منك جدًّا إنك ما شتمتش أو ما كدبتش أو ما خدعتش.. إلخ.
